தமிழக காவல் துரையின் லஞ்ச ஒழிப்​புத் துறை காவல் ஆய்​வாளர் விமலா பணி இடைநீக்​கம் செய்​யப்​பட்​டது உள்​நோக்​கம் கொண்​டது என கூறி, அவரது பணியிடை நீக்கத்துக்கு இடைக்காலத் தடை விதித்து சென்னை உயர் நீதிமன்றம் உத்தரவு பிறப்பித்துள்ளது.

சென்னை ஆலந்​தூரில் உள்​ள தமிழக காவல் துறை​யின் லஞ்ச ஒழிப்​புத் துறை தலைமை அலு​வல​கத்தில் ஆய்​வாள​ராகப் பணி​யாற்​றிய​வர் விமலா. இவர் கடந்த 17-ஆம் தேதி பணி இடைநீக்​கம் செய்​யப்​பட்​டார்.

சென்னை பெருநகரக் காவல் துறை​யில் பாலியல் தடுப்பு பிரிவுகாவல் ஆய்​வாள​ராக பணியாற்​றிய ராஜலட்​சுமி மீது முதல் தகவல் அறிக்கை (எஃப்​ஐஆர்) பதிவு செய்ததன் காரணத்​துக்​காக, லஞ்சஒழிப்​புத் துறை அதிகாரிகள் உள்​நோக்​கத்​துடன் தன்னை இடைநீக்​கம் செய்து உத்​தர​விட்​டுள்​ள​தாக கூறி, சென்னை உயர் நீதி​மன்​றத்​தில் விமலா மனு தாக்​கல் செய்திருந்தார்.

இந்த மனு நீதிபதி பி.டி.ஆஷா முன்பு விசாரணைக்கு வந்தது. அப்​போது, மனு​தா​ரர் தரப்​பில் வழக்​கறிஞர் எஸ்​.அய்​யாத்​துரை​யும், எதிர்​மனு​தா​ரர்​கள் தரப்​பில் வழக்​கறிஞர் வி.சிவலிங்​க​மும் ஆஜராகி வாதிட்​டனர்.

இருதரப்பு வாதங்​களை​யும் கேட்ட நீதிபதி ஆஷா; நீதி​மன்​றத்​தில் தாக்​கல் செய்​யப்​பட்​டுள்ள ஆவணங்​களை ஆய்வு செய்​த​தில், காவல் ஆய்​வாளர் ராஜலட்​சுமி மீது எஃப்​ஐஆர் பதிவு செய்ய லஞ்ச ஒழிப்​புத் துறை இயக்​குநர் கடந்த ஜனவரி 06-ஆம் தேதி உத்​தரவிட்​டுள்​ளார்.

அதன்​படி, மனு​தா​ரர் விமலா, சம்​பந்​தப்​பட்ட ஆய்​வாள​ருக்கு எதி​ராக வரைவு எஃப்​ஐஆர் தயாரித்​து, இயக்​குநரின் ஒப்​புதலுக்​காக அனுப்பி வைத்​துள்​ளார். அதில் லஞ்ச ஒழிப்​புத் துறை எஸ்​.பி. சில திருத்​தங்​களை செய்து ஒப்​புதல் அளித்த பிறகே மனு​தா​ரர் அந்த எஃப்​ஐஆரை கடந்த பிப்ரவரி 12-ஆம் தேதி பதிவு செய்​துள்​ளார்.

ஆனால், சக காவல் ஆய்​வாளர் மீது எஃப்​ஐஆர் பதிவு செய்​தார் என்ற காரணத்​துக்​காக மனு​தா​ரரை இடைநீக்​கம் செய்​திருப்​பது உள்​நோக்​கம் கொண்​ட​தாகவே தெரி​கிறது என்று குறிப்பிட்டுள்ளார். ஆகையால், அவரது இடைநீக்​கத்​துக்கு ஜூலை 09-ஆம் தேதி வரை இடைக்​காலத் தடை விதிக்​கிறேன் என்றும், இந்த வழக்​கில் லஞ்ச ஒழிப்​புத் துறை அதி​காரி​கள் பதில் அளிக்க வேண்​டும் என்றும்  நீதிபதி ஆஷா உத்​தர​விட்டு விசா​ரணையை தள்​ளிவைத்​துள்ளார்.