தமிழக அரசியலில் சட்டமன்றத் தேர்தல் நெருங்கி வரும் நிலையில், தேசிய ஜனநாயக கூட்டணியில் அதிமுக தலைமையிலான அணியில் டிடிவி தினகரனின் அமமுக இணைந்துள்ளது பெரும் அரசியல் அதிர்வலைகளை ஏற்படுத்தியுள்ளது. எதிர்பார்த்தபடியே, இந்த இணைப்பு கூட்டணியின் வலிமையை அதிகரிப்பதற்குப் பதிலாக, தொகுதி பங்கீடு தொடர்பான அதிருப்தி மற்றும் குழப்பங்களை அதிகமாக்கி வருவதாக அரசியல் வட்டாரங்கள் தெரிவிக்கின்றன.

குறிப்பாக அதிமுகவின் பாரம்பரிய கோட்டைகளாகக் கருதப்படும் மாவட்டங்களில், சீட் விவகாரம் கட்சி நிர்வாகிகள் மற்றும் அடிமட்ட தொண்டர்களிடையே பெரும் கவலையை உருவாக்கியுள்ளது. அமமுகவிற்கு 10-க்கும் மேற்பட்ட சட்டமன்றத் தொகுதிகள் மற்றும் ஒரு மாநிலங்களவை இடம் ஒதுக்கப்படலாம் என்ற பேச்சுகள் கூட்டணிக்குள் நடந்ததாக கூறப்படுகிறது. ஆனால், அமமுக சில முக்கிய தொகுதிகளை பிடிவாதமாகக் கோருவது அதிமுக தரப்புக்கு பெரும் அதிர்ச்சியாக அமைந்துள்ளது.

வட மாவட்டங்களில் ஏற்கனவே பாமக போன்ற வலுவான கூட்டணிக் கட்சிகள் இருப்பதால், அங்குள்ள தொகுதிகளை தக்கவைத்துக்கொள்வதில் அதிமுகவுக்கு சிக்கல் ஏற்பட்டுள்ளது. திருப்பத்தூர் மாவட்டத்தில் பாமக எதிர்பார்ப்புகளுக்கு மத்தியில், இப்போது அமமுகவும் சீட் கேட்டு வருவது நிலைமையை மேலும் சிக்கலாக்கியுள்ளது. அங்கு அமமுக நிர்வாகி ஏ. ஞானசேகரனுக்கு சீட் வழங்க வேண்டும் என டிடிவி தினகரன் அழுத்தம் கொடுப்பதாக தகவல்கள் வெளியாகியுள்ளன.

அதேபோல், சோளிங்கர் தொகுதியில் என்.ஜி. பார்த்திபன், வந்தவாசியில் வெங்கடேசன் போன்ற அமமுக வேட்பாளர்கள் முன்வைக்கப்படுவதால், இந்த தொகுதிகளில் “இரட்டை இலை” சின்னத்தில் அதிமுக போட்டியிட முடியுமா என்ற அச்சம் கட்சி நிர்வாகிகளிடையே உருவாகியுள்ளது.

தென் மாவட்டங்களில் நிலைமை இன்னும் சிக்கலானதாகவே பார்க்கப்படுகிறது. தேனி மாவட்டத்தில் உள்ள நான்கு தொகுதிகளையும் கூட்டணி கட்சிகள் குறிவைப்பது அதிமுகவினரை பெரிதும் கலக்கம் அடைய வைத்துள்ளது. ஆண்டிபட்டி மற்றும் பெரியகுளம் தொகுதிகளை அமமுக குறிவைத்துள்ளதாகவும், கம்பம் தொகுதியை பாஜக தனது கணக்கில் வைத்துள்ளதாகவும் கூறப்படுகிறது. ஒருவேளை ஓ. பன்னீர்செல்வம் கூட்டணிக்குள் வந்தால், போடி தொகுதியையும் விட்டுக்கொடுக்க வேண்டிய நிலை ஏற்படலாம் என்ற பேச்சும் உலாவுகிறது.

ஓபிஎஸ்ஸின் அரசியல் செல்வாக்கு குறைந்த பிறகு, எடப்பாடி பழனிசாமி தரப்பினர் கஷ்டப்பட்டு வளர்த்தெடுத்த தொகுதிகளை கூட்டணிக் கட்சிகளுக்கு தாரைவார்க்க வேண்டிய கட்டாயம் ஏற்பட்டிருப்பது அதிமுக நிர்வாகிகளிடையே கடும் அதிருப்தியை ஏற்படுத்தியுள்ளது.

சிவகங்கை மாவட்டத்திலும் இதேபோன்ற இழுபறி நீடிக்கிறது. காரைக்குடி தொகுதியில் கடந்த தேர்தலில் கணிசமான வாக்குகளை பெற்ற அமமுக வேட்பாளர் தேர்போகி பாண்டியை மீண்டும் நிறுத்த டிடிவி தினகரன் ஆர்வம் காட்டி வருகிறார். ஆனால், அந்த தொகுதியை பாஜகவும் விடாப்பிடியாக கேட்டு வருவது குழப்பத்தை அதிகரித்துள்ளது. ஒருவேளை காரைக்குடி அமமுகவிற்கு ஒதுக்கப்பட்டால், பாஜக சிவகங்கை தொகுதியை கோரலாம் என்ற கணக்கும் பேசப்படுகிறது. ஆனால் அங்கு அதிமுக மாவட்டச் செயலாளர் செந்தில்நாதன் தற்போதைய எம்எல்ஏவாக இருப்பதால், யாருக்கு எந்த தொகுதி என்ற கேள்வி மேலும் சிக்கலாகியுள்ளது.

மொத்தத்தில், அமமுகவின் வருகை அதிமுகவின் வெற்றி வாய்ப்புகளை உயர்த்துமா, அல்லது தொகுதி பங்கீட்டில் உருவாகும் உள்நிலை அதிருப்தி கட்சியை பலவீனப்படுத்துமா என்பது கேள்விக்குறியாகவே உள்ளது. “இரட்டை இலை” சின்னத்தின் பாரம்பரிய வாக்கு வங்கியை நம்பி தேர்தலை எதிர்கொள்ள தயாராக இருந்த அதிமுகவினருக்கு, கூட்டணிக் கட்சிகளின் அதிகப்படியான கோரிக்கைகள் பெரும் சவாலாக மாறியுள்ளன. இந்த சூழலில், தொகுதி பங்கீடு தொடர்பான இழுபறியை அதிமுக தலைமை எவ்வாறு சமாளிக்கப் போகிறது என்பதே அடுத்த கட்ட அரசியல் எதிர்பார்ப்பாக உள்ளது.