தமிழகத்தில் வரவிருக்கும் சட்டமன்றத் தேர்தலை முன்னிட்டு அரசியல் களம் சூடுபிடித்து வரும் நிலையில், பாஜக தேர்தல் பணி பொறுப்புகளில் இருந்து அண்ணாமலை விலகுவதாக அறிவித்தது அரசியல் வட்டாரத்தில் பெரும் பரபரப்பை ஏற்படுத்தியுள்ளது. கோவையில் நேற்று அவர் வெளியிட்ட இந்த அறிவிப்பு, தந்தையின் உடல்நலத்தை காரணமாக முன்வைத்தாலும், இதன் பின்னணியில் வேறு அரசியல் காரணங்கள் உள்ளனவா என்ற சந்தேகத்தை எழுப்பியுள்ளது.

ஏப்ரல் – மே மாதங்களில் தேர்தல் நடைபெறலாம் என எதிர்பார்க்கப்படும் சூழலில், அரசியல் கட்சிகள் தேர்தல் அறிக்கை, வேட்பாளர் தேர்வு, கூட்டணி பேச்சுவார்த்தை உள்ளிட்ட பணிகளில் தீவிரமாக ஈடுபட்டு வருகின்றன. அதிமுகவுடன் கூட்டணி அமைத்து தேர்தலை சந்திக்க தயாராகி வரும் பாஜக, 234 தொகுதிகளுக்கும் தேர்தல் பணிகளை கவனிக்க 72 மூத்த நிர்வாகிகளை நியமித்திருந்தது. இதில், பாஜக முன்னாள் மாநில தலைவர் மற்றும் தேசிய பொதுக்குழு உறுப்பினரான அண்ணாமலைக்கு கோவை சிங்காநல்லூர், மதுரை தெற்கு, காரைக்குடி, ஸ்ரீவைகுண்டம், விருகம்பாக்கம், பத்மநாபபுரம் ஆகிய 6 தொகுதிகளின் பொறுப்பு வழங்கப்பட்டிருந்தது.

இந்த நிலையில், தந்தையின் உடல்நிலை காரணமாக தேர்தல் பொறுப்புகளை தன்னால் கவனிக்க முடியாது என அண்ணாமலை அறிவித்துள்ளார். இந்த திடீர் முடிவு பாஜக நிர்வாகிகள் மற்றும் தொண்டர்கள் மத்தியில் அதிர்ச்சியை ஏற்படுத்தியுள்ளது. கடந்த நான்கு ஆண்டுகளுக்கும் மேலாக தமிழக பாஜகவின் முக்கிய முகமாக செயல்பட்டு வந்த அண்ணாமலை, இவ்வாறு விலகியதற்கு உடல்நலம் மட்டுமே காரணமா என்ற கேள்வி எழுந்துள்ளது.

அரசியல் பார்வையாளர்களின் கருத்துப்படி, கடந்த மக்களவைத் தேர்தலுக்கு முன்பு அதிமுக கூட்டணியில் இருந்து பாஜக வெளியேறி தனித்து போட்டியிட முக்கிய பங்கு வகித்தவர் அண்ணாமலை. ஆனால் அந்த முயற்சி எதிர்பார்த்த வெற்றியை தரவில்லை. அதன் பின்னர், சட்டமன்றத் தேர்தலை முன்னிட்டு பாஜக மேலிடம் மீண்டும் அதிமுகவுடன் கூட்டணி அமைக்க முடிவு செய்தது. இதே காலகட்டத்தில் அண்ணாமலை மாநில தலைவர் பதவியில் இருந்து மாற்றப்பட்டதும், அவருக்கும் அவரது ஆதரவாளர்களுக்கும் அதிருப்தியை ஏற்படுத்தியதாக கூறப்படுகிறது.

மேலும், மாநில தலைவர் பதவியிலிருந்து விலகியபோது தேசிய அளவில் முக்கிய பொறுப்பு வழங்கப்படும் என்ற எதிர்பார்ப்பு இருந்ததாகவும், அது நிறைவேறாததால் ஏமாற்றம் ஏற்பட்டதாகவும் பேசப்படுகிறது. இதனுடன், அதிமுக கூட்டணியில் பாஜக குறைந்தது 70 தொகுதிகளிலாவது போட்டியிட வேண்டும் என்ற அண்ணாமலையின் விருப்பத்திற்கு மாறாக, 25 முதல் 30 தொகுதிகளுக்குள் மட்டுமே ஒதுக்கப்படும் என்ற தகவல்களும் வெளிவந்துள்ளன. இதுவும் அவரது முடிவில் தாக்கத்தை ஏற்படுத்தியிருக்கலாம் என அரசியல் வட்டாரங்கள் கருதுகின்றன.

இதற்கிடையே, அண்ணாமலை தனிக்கட்சி தொடங்கலாம் அல்லது ராஜ்யசபா வாய்ப்பை நோக்கி நகர்கிறாரா என்ற யூகங்களும் நிலவி வருகின்றன. தமிழக பாஜகவில் ஒரு முக்கிய முகமாக இருந்த அண்ணாமலையின் இந்த விலகல், கட்சிக்கு ஒரு வகையில் பின்னடைவு என பாஜகவினரே ஒப்புக்கொள்ளும் சூழல் உருவாகியுள்ளது. அவரை மீண்டும் சமாதானப்படுத்தி செயலில் ஈடுபடுத்த பாஜக மேலிடம் முயற்சி மேற்கொண்டு வருவதாகவும் தகவல்கள் வெளியாகியுள்ளன.

அண்ணாமலையின் இந்த முடிவு தற்காலிகமா அல்லது அவரது அரசியல் பாதையில் ஒரு முக்கிய திருப்பமா என்பது, வரவிருக்கும் நாட்களில் வெளிப்படும் என அரசியல் வட்டாரங்கள் எதிர்பார்க்கின்றன.