டெல்லியில் தலைமைத் தேர்தல் ஆணையர் ஞானேஷ் குமாரை பதவி விலக வலியுறுத்தி, நாடாளுமன்ற வளாகத்திலிருந்து தேர்தல் ஆணைய அலுவலகத்தை நோக்கிப் பேரணியாகச் சென்ற எதிர்க்கட்சி எம்பிக்கள் காவல்துறையினரால் தடுத்து நிறுத்தப்பட்ட சம்பவம் பெரும் பரபரப்பை ஏற்படுத்தியுள்ளது.

எதிர்க்கட்சிகள் பிரம்மாண்ட பேரணி: காங்கிரஸ் தலைவரும் மாநிலங்களவை எதிர்க்கட்சித் தலைவருமான மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி, சமாஜ்வாதி கட்சித் தலைவர் அகிலேஷ் யாதவ், காங்கிரஸ் எம்பி பிரியங்கா காந்தி உள்ளிட்ட 200-க்கும் மேற்பட்ட எம்பிக்கள் பேரணியில் பங்கேற்றனர்.

போலீசார் தடுத்து நிறுத்தம்: தேர்தல் ஆணைய அலுவலகப் பகுதியில் பாதுகாப்பு பலப்படுத்தப்பட்டு, தடுப்புகள் அமைக்கப்பட்டிருந்தன. வளாகத்திற்குள் நுழைய முயன்ற ராகுல் காந்தி, அகிலேஷ் யாதவ் உள்ளிட்ட மூத்த தலைவர்கள் காவல்துறையினரால் தடுத்து நிறுத்தப்பட்டனர்.

ராகுல் காந்தி கேள்வி: 300-க்கும் மேற்பட்ட எதிர்க்கட்சி எம்பிக்கள் தலைமைத் தேர்தல் ஆணையரைச் சந்திக்க விரும்பியும் அனுமதி மறுக்கப்பட்டதற்குக் கண்டனம் தெரிவித்த ராகுல் காந்தி, "மக்களைப் பிரதிநிதித்துவப்படுத்தும் எம்பிக்களைத் தேர்தல் ஆணையம் சந்திக்கவில்லை என்றால், ஜனநாயகத்திற்கு என்ன அர்த்தம்?" எனக் கேள்வி எழுப்பினார்.

கடும் குற்றச்சாட்டு: நரேந்திர மோடி, அமித் ஷா, மோகன் பாகவத் மற்றும் ஞானேஷ் குமார் ஆகியோர் இணைந்து நாட்டின் ஜனநாயகத்தைச் சீர்குலைத்து வாக்குகளைத் திருடியுள்ளதாக ராகுல் காந்தி பகிரங்கமாகக் குற்றம் சாட்டினார்.