பிரதமர் நரேந்திர மோடி அவர்கள் இன்று (ஜூலை 23)  இங்கிலாந்து மற்றும் மாலத்தீவு ஆகிய 2 நாடுகளுக்கு சுற்றுப் பயணமாக புறப்பட்டார். இன்று அரசுமுறை பயணமாக, டெல்லியிலிருந்து இங்கிலாந்து புறப்பட்டு சென்றார். அந்நாட்டு பிரதமர் கெய்ர் ஸ்டார்மருடன் பல்வேறு பிரச்சினைகள் குறித்து விரிவான பேச்சுவார்த்தை நடத்துகிறார்.

இதில் பிரதமர் மோடி முதலில், 23 மற்றும் 24-ந் தேதிகளில் இங்கிலாந்து செல்கிறார். அவர் இங்கிலாந்து செல்வது, இது 4-வது முறை ஆகும்.அப்போது இருதரப்பு உறவுகள் மட்டுமின்றி, பிராந்திய, சர்வதேச முக்கியத்துவம் வாய்ந்த பிரச்சினைகள் குறித்தும் இருவரும் உரையாடுகிறார்கள்.

இந்த பயணத்தின் முக்கிய அம்சமாக, இந்தியா-இங்கிலாந்து தடையற்ற வர்த்தக ஒப்பந்தம் கையெழுத்தாகும் என்று எதிர்பார்க்கப்படுகிறது. இரு நாடுகளும் 3 ஆண்டுகளாக பேச்சுவார்த்தை நடத்தியதன் இறுதியில், ஒப்பந்தத்தில் கையெழுத்திடுகின்றன.இதன் காரணமாக, 99 % இந்திய ஏற்றுமதி பொருட்களுக்கு வரி இருக்காது.

இங்கிலாந்து நிறுவனங்கள் விஸ்கி, கார் மற்றும் இதர பொருட்களை இந்தியாவுக்கு எளிதாக ஏற்றுமதி செய்யும். இங்கிலாந்து மன்னர் மூன்றாம் சார்லசையும் பிரதமர் மோடி சந்திக்கிறார்.அதன் பிறகு,இங்கிலாந்தில் சுற்றுப்பயணத்தை வெற்றிக்கரமாக முடித்து விட்டு அங்கிருந்து 25-ந் தேதி பிரதமர் மோடி மாலத்தீவு செல்கிறார்.

அவர் அங்கு செல்வது, இது 3-வது தடவை ஆகும். மாலத்தீவு அதிபராக முகமது முய்சு கடந்த 2023-ம் ஆண்டு நவம்பர் மாதம் பதவியேற்ற பிறகு இந்திய தலைவர் ஒருவர் செல்வது இதுவே முதல்முறை ஆகும்.அங்கு முகமது முய்சுவின் சீன ஆதரவு நிலைப்பாட்டால், இந்தியா-மாலத்தீவு உறவில் விரிசல் ஏற்பட்டது.

அதன்பிறகு பிரதமர் மோடி அங்கு செல்வதால், இப்பயணம் முக்கியத்துவம் பெறுகிறது. முகமது முய்சுவுடன் பரஸ்பர நலன் சார்ந்த பிரச்சினைகள் குறித்து பிரதமர் மோடி பேச்சுவார்த்தை நடத்துகிறார். 26-ந் தேதி நடக்கும் மாலத்தீவின் 60-வது சுதந்திர தின கொண்டாட்டத்தில் சிறப்பு விருந்தினராக பங்கேற்கிறார்.