தேமுதிக ஈரோடு கிழக்கு மற்றும் மேற்கு சட்டப்பேரவை தொகுதி வாக்குச்சாவடி முகவர்கள் மற்றும் கட்சி நிர்வாகிகள் ஆலோசனைக் கூட்டம் இன்று ஈரோட்டில் நடைபெற்றது. இதில் தேமுதிக பொதுச்செயலாளர் பிரேமலதா விஜயகாந்த் பங்கேற்று பேசினார்.

இதற்கு முன்னதாக அவர் செய்தியாளர்களுக்கு அளித்த பேட்டியில் கூறியதாவது: சட்டப்பேரவை தேர்தல் கூட்டணி குறித்து ஜனவரி மாதம் 09-ஆம் தேதி கடலூரில் நடக்கும் மாநாட்டில் அறிவிப்போம் என்று தெரிவித்துள்ளார். அத்துடன்,  தமிழகத்தில் சட்டம் ஒழுங்கு மிகப்பெரிய கேள்விக்குறியாக உள்ளதாகவும், கொலை சம்பவங்கள், பாலியல் வன்கொடுமைகள் அதிகரித்துள்ளமைக்கு முதல் காரணம் மதுக்கடைகள் தான் என்று குற்றம் சாட்டியுள்ளார்.

மேலும், மின் கட்டண உயர்வால் நெசவுத் தொழிலை நம்பியுள்ளவர்கள் கடுமையாக பாதிக்கப்பட்டுள்ளதாகவும்,  வரி உயர்வால் பல தொழில்கள் முடங்கி போயுள்ளதாக குறிப்பிட்டுள்ளார். அத்துடன், மக்கள் அவர்களிடம் தெரிவிக்கும் குறைகள் குறித்து அவர்கள் ஆட்சியாளர்களிடம் கேள்வி கேட்கிறதாகவும்,  திமுக அளித்த வாக்குறுதிகளில் 50 சதவீதம் மட்டுமே நிறைவேற்றப்பட்டு உள்ளது. எஞ்சிய காலத்தில் மற்ற வாக்குறுதிகளையும் திமுக அரசு நிறைவேற்ற வேண்டும் என்று தெரிவித்துள்ளார்.

அத்துடன், தமிழகத்தில் ஒரு எம்ஜிஆர் தான், ஒரு விஜயகாந்த் தான். இருவருடைய இடத்தையும் வேறு யாரும் நிரப்பமுடியாது என்று சுட்டிக்காட்டியுள்ளார். மேலும், திருப்பூர், ஈரோடு, கோவை மாவட்டங்களில் வட மாநிலத்தவர் ஏராளமானவர்கள் பணியாற்றி வருகின்றனர். வடமாநிலத்தவர்கள் இங்கு பணியாற்றலாம். ஆனால், அவர்களுக்கு வாக்குரிமை அளிக்கக்கூடாது என்றும் வலியுறுத்தியுள்ளார்.

ஏனெனெனில், அவரவர் சொந்த மாநிலத்தில் தான் அவர்களுக்கு வாக்குரிமை இருக்க வேண்டும் என்றும்,  வாக்காளர்கள் ஒவ்வொருவரும் தங்களுடைய வாக்குகளை உறுதிப்படுத்திக்கொள்ள வேண்டும் என்றும் தெரிவித்துள்ளார். அத்துடன்,  எஸ்ஐஆர் மூலம் வாக்குத் திருட்டு நடந்தால் தமிழகத்தில் நிச்சயமாக மக்கள் புரட்சி வெடிக்கும் என்று எச்சரிக்கை விடுத்துள்ளார். அது தமிழகத்தில் ஆளும் கட்சியாக இருந்தாலும், ஆண்ட கட்சியாக இருந்தாலும் கூட்டணி இல்லாமல் தேர்தலை சந்திக்க முடியாது என்றும் குறிப்பிட்டுள்ளார்.

தொடர்ந்து அவர் கூறுகையில், தேர்தல் முடிவு வெளியாகும் போது கூட்டணி அமைச்சரவை அமைக்க வேண்டிய சூழல் ஏற்படும் என்றும், 2026 சட்டப்பேரவை தேர்தலில் தேமுதிக இடம்பெறும் கூட்டணி வெற்றிபெறும் என்று அறிவித்துள்ளார். மேலும், தேமுதிக அமைச்சரவையிலும் அங்கம் வகிக்கும் என்றும் நம்பிக்கை தெரிவித்துள்ளார். அதிமுக மாநிலங்களை உறுப்பினர் பதவி தருவதாக கூறி எங்களை ஏமாற்றவில்லை என்றும்,  நாங்கள் 2025-ஆம் ஆண்டில் கேட்டோம், அவர்கள் 2026 இல் தருவதாக கூறியுள்ளார்கள் என்றும் தெரிவித்துள்ளார்.

தொடர்ந்து, ஒரு மாநிலங்களவை உறுப்பினர் பதவிக்காக தேமுதிக கூட்டணியை முடிவு செய்யாது என்றும், கடந்த 2011-ம் ஆண்டு நிர்வாகிகள், தொண்டர்கள், மக்கள் விரும்பிய கூட்டணியில் விஜயகாந்த் இணைந்தார். அவர் காட்டிய வழியில் 2026 தேர்தலில் தேமுதிக கூட்டணியை முடிவு செய்யும் என்றும்,  ஆட்சிக்கு எதிரான அலை உள்ளது என்று பிரேமலதா அவருடைய பேட்டியில் குறிப்பிட்டுள்ளார்.