தமிழக அரசியலில் நீண்டகால அனுபவம் கொண்ட மூத்த தலைவரும், திமுக பொதுச்செயலாளருமான அமைச்சர் துரைமுருகனைச் சுற்றி அரசியல் பரபரப்பு அதிகரித்துள்ளதாக கட்சி வட்டாரங்களில் தகவல்கள் வெளியாகியுள்ளன. தேர்தல் முடிவுகள் வெளியாகும் முன்பே, காட்பாடி தொகுதி நிலவரம் மற்றும் கட்சிக்குள் உருவாகியுள்ள உள்கட்டமைப்பு சிக்கல்கள் அவருக்கு கவலையை ஏற்படுத்தியுள்ளதாக கூறப்படுகிறது.

அரை நூற்றாண்டுக்கும் மேலாக திமுக அரசியலில் முக்கிய பங்காற்றி வரும் துரைமுருகன், இந்த தேர்தலிலும் போட்டியிட்டுள்ளார். ஆனால் வயது மற்றும் உடல்நலக் காரணங்களால் இந்த முறை அவர் ஓய்வு எடுக்க வேண்டும் என்ற ஆலோசனை கட்சித் தலைமையிலிருந்து முன்வைக்கப்பட்டதாக தகவல்கள் தெரிவிக்கின்றன. இந்த தகவல் அவரது மகன் கதிர் ஆனந்த் மூலமாகவே அவரிடம் சென்றதாக கூறப்படுகிறது.

இதையடுத்து, துரைமுருகன் நேரடியாக முதலமைச்சர் மு.க.ஸ்டாலினை சந்தித்து, தனது நீண்டகால அரசியல் பங்களிப்பு மற்றும் விசுவாசத்தை முன்வைத்து மீண்டும் போட்டியிடும் வாய்ப்பைப் பெற்றதாக கூறப்படுகிறது.

தற்போது வாக்குப்பதிவு முடிந்த நிலையில், காட்பாடி தொகுதியின் பூத் வாரியான வாக்கு நிலவரங்களை துரைமுருகன் தீவிரமாக ஆய்வு செய்து வருவதாக கூறப்படுகிறது. திமுகவின் பாரம்பரிய வாக்கு வங்கிகளாக கருதப்படும் பகுதிகளில் பதிவான வாக்கு சதவீதம் மற்றும் அதன் தாக்கம் குறித்து அவர் தொடர்ந்து மதிப்பீடு செய்து வருவதாக தகவல்கள் வெளியாகியுள்ளன.

அதே நேரத்தில், கட்சிக்குள்ளேயே சிலர் தமக்கு எதிராக செயல்பட்டிருக்கலாம் என்ற தகவல்கள் அவரை மேலும் கவலையில் ஆழ்த்தியுள்ளதாக கூறப்படுகிறது. வாக்குகள் சிதறச் செய்யும் வகையில் சில மறைமுக நடவடிக்கைகள் நடந்ததாகவும், இது வெற்றி வாய்ப்பை பாதிக்கக்கூடும் என்ற அச்சமும் நிலவுவதாக கட்சி வட்டாரங்கள் தெரிவிக்கின்றன.

இந்த தகவல்கள் அவரது மகன் கதிர் ஆனந்த் மூலமாகவே அவரிடம் சென்றுள்ளதாகவும் கூறப்படுகிறது. சொந்தக் கட்சியினரின் ஒத்துழைப்பில் சந்தேகம் எழுந்திருப்பது துரைமுருகனுக்கு மனவேதனையை ஏற்படுத்தியுள்ளதாக சொல்லப்படுகிறது.

மேலும், தேர்தலில் வெற்றி பெற்றாலும் அடுத்த அமைச்சரவையில் துரைமுருகனின் இடம் குறித்து உறுதி இல்லை என்ற தகவல்களும் வெளியாகியுள்ளன. அமைச்சரா அல்லது பொதுச்செயலாளரா என்ற இரண்டு பொறுப்புகளில் ஒன்றை மட்டும் தேர்வு செய்ய வேண்டிய சூழல் உருவாகலாம் என அரசியல் வட்டாரங்களில் பேசப்படுகிறது.

திமுகவில் பொதுச்செயலாளர் பதவி துரைமுருகனின் அரசியல் பயணத்தில் மிக முக்கியமான இடத்தைப் பெற்றுள்ளது. அதே நேரத்தில், அமைச்சரவைப் பொறுப்பும் அவரது அரசியல் செல்வாக்கின் முக்கிய அங்கமாக கருதப்படுகிறது. இந்த இரண்டிற்கும் இடையில் எப்படியான முடிவு எடுக்கப்படும் என்பது கவனிக்கப்படும் விடயமாக உள்ளது.

தேர்தல் முடிவுகளும், அதன் பின்னர் கட்சித் தலைமையின் முடிவுகளுமே துரைமுருகனின் அடுத்தகட்ட அரசியல் பாதையை நிர்ணயிக்கப் போவதாக அரசியல் பார்வையாளர்கள் கருதுகின்றனர்.