சென்னை பட்டினப்பாக்கத்தில் ரூ.1,200 கோடி மதிப்பீட்டில் 25.55 ஏக்கர் பரப்பளவில் புதிய தலைமைச் செயலகம் கட்டப்படும் என்று முதலமைச்சர் விஜய் அறிவித்து, அதற்கான அரசாணையும் வெளியிடப்பட்டிருந்தது. எனினும், திட்டமிடப்பட்ட பட்டினப்பாக்கம் பகுதியைச் சுற்றி அமைந்துள்ள 9 மீனவக் கிராமங்களைச் சேர்ந்த 1,500-க்கும் மேற்பட்ட குடும்பத்தினர், தங்கள் வாழ்வாதாரம் மற்றும் மீன்பிடித் தொழில் பாதிக்கப்படும் எனக் கூறி இத்திட்டத்திற்குத் தொடர் எதிர்ப்பு தெரிவித்து வந்தனர்.

திமுகவின் சட்டப் போராட்டம்:

மீனவ மக்களின் கருத்துகளைக் கேட்காமல் தவெக அரசு இந்த அரசாணையை வெளியிட்டதாகக் குற்றம்சாட்டி, மயிலாப்பூர் தொகுதியின் முன்னாள் திமுக சட்டமன்ற உறுப்பினர் த.வேலு சென்னை உயர் நீதிமன்றத்தில் வழக்குத் தொடர்ந்தார். பட்டினப்பாக்கத்தில் புதிய தலைமைச் செயலகம் அமைக்க வெளியிடப்பட்ட அரசாணையை ரத்து செய்யக் கோரும் இம்மனு விரைவில் விசாரணைக்கு வரவுள்ளது.

அரசாணை ரத்து & மாற்று இடம் தேர்வு:

மீனவ அமைப்புகளின் தொடர் எதிர்ப்பு மற்றும் சட்டச் சிக்கல்கள் காரணமாக, பட்டினப்பாக்கத்தில் தலைமைச் செயலகம் அமைக்கும் முடிவைக் கைவிட அரசு தீர்மானித்துள்ளதாகத் தெரிகிறது. அதனடிப்படையில், பட்டினப்பாக்கத்திற்கான அரசாணையை ரத்து செய்ய முதலமைச்சர் உத்தரவிட்டுள்ளதாகவும் தகவல்கள் தெரிவிக்கின்றன.

பட்டினப்பாக்கத்திற்கு மாற்றாக, சென்னை பல்லவன் இல்லத்தில் உள்ள ஏறக்குறைய 20 ஏக்கர் பரப்பளவைக் கொண்ட இடத்தை அரசு பரிசீலித்து வருகிறது. தற்போது அங்கு இயங்கி வரும் மாநகர் போக்குவரத்துக் கழகம் (MTC) மற்றும் விரைவுப் போக்குவரத்துக் கழக (SETC) பணிமனைகளுக்கு மாற்று இடம் வழங்கிவிட்டு, அவ்வளாகத்தில் புதிய நிர்வாகக் கட்டிடங்களைக் கட்டுவது குறித்து அதிகாரிகள் ஆய்வு மேற்கொண்டு வருகின்றனர். இத்திட்டம் உறுதிசெய்யப்பட்டால், சட்டசபை மட்டும் தொடர்ந்து புனித ஜார்ஜ் கோட்டையிலேயே இயங்கும் எனக் கூறப்படுகிறது.