மதுராந்தகம் தொகுதிக்கான இடைத்தேர்தல் களம் சூடுபிடித்துள்ள நிலையில், தவெக வேட்பாளர் மரகதம் குமரவேலுக்கு சில பகுதிகளில் பொதுமக்கள் எதிர்ப்பு தெரிவித்து வருவதாக கூறப்படுகிறது. முன்னாள் அதிமுக எம்எல்ஏவான மரகதம் குமரவேல், பதவியை ராஜினாமா செய்துவிட்டு தமிழக வெற்றிக் கழகத்தில் இணைந்த நிலையில், தற்போது மீண்டும் அதே தொகுதியில் வேட்பாளராக களமிறங்கியுள்ளார். முதல்வர் விஜய் நேரடியாக பிரச்சாரம் செய்த பின்னரும் சில இடங்களில் அவருக்கு எதிரான முழக்கங்கள் தொடர்வதாகவும், இதனால் காவல்துறை பாதுகாப்புடன் அவர் பிரச்சாரம் மேற்கொண்டு வருவதாகவும் தகவல்கள் வெளியாகியுள்ளன.

இந்த நிலையில், செங்கல்பட்டு மாவட்டம் மதுராந்தகம் சட்டமன்றத் தொகுதிக்கு உட்பட்ட செண்டிவாக்கம் கிராமத்தில் மரகதம் குமரவேலின் வருகைக்கு எதிர்ப்பு தெரிவித்து பொதுமக்கள் காவல்துறை வாகனத்தை முற்றுகையிட்ட சம்பவம் பரபரப்பை ஏற்படுத்தியுள்ளது. வேட்பாளர் பிரச்சாரத்திற்காக கிராமத்துக்கு வரவிருந்த நிலையில், பாதுகாப்பு மற்றும் முன்னேற்பாடுகளுக்காக காவல்துறை வாகனம் ஒன்று முன்கூட்டியே அங்கு சென்றதாக கூறப்படுகிறது.

அப்போது 50-க்கும் மேற்பட்ட கிராம மக்கள் ஒன்று திரண்டு காவல்துறை வாகனத்தைச் சூழ்ந்து முற்றுகைப் போராட்டத்தில் ஈடுபட்டதாக கூறப்படுகிறது. தங்கள் கிராமத்துக்குள் காவல்துறை வாகனம் வரக்கூடாது என்றும், வேட்பாளரும் பிரச்சாரத்திற்காக கிராமத்துக்குள் நுழையக்கூடாது என்றும் அவர்கள் முழக்கங்களை எழுப்பியதுடன், காவல்துறையினருடன் வாக்குவாதத்தில் ஈடுபட்டதாக தெரிகிறது.

இதனால் அப்பகுதியில் பதற்றமான சூழல் ஏற்பட்ட நிலையில், சம்பவ இடத்துக்கு வந்த காவல்துறையினர் பொதுமக்களிடம் பேச்சுவார்த்தை நடத்தி நிலைமையை கட்டுக்குள் கொண்டுவர முயன்றனர். ஆனால் பேச்சுவார்த்தை பலனளிக்காததால், மரகதம் குமரவேல் அந்தப் பகுதிக்குள் செல்லாமல் அங்கிருந்து திரும்பிச் சென்றதாக கூறப்படுகிறது.

இதேபோல் மதுராந்தகம் அருகே மொரப்பாக்கம், தண்டலம், பெரும்பாக்கம், கழனிபாக்கம் உள்ளிட்ட கிராமங்களிலும் மரகதம் குமரவேல் வாக்கு சேகரிப்பில் ஈடுபட்டதாக தகவல்கள் தெரிவிக்கின்றன. பெரும்பாக்கம் பகுதியில் பிரச்சாரம் மேற்கொண்டபோது சிலர் அவருக்கு எதிர்ப்பு தெரிவித்ததாகவும், அவர்களை காவல்துறையினர் வாகனத்தில் ஏற்றிச் சென்றதாகவும் கூறப்படுகிறது.

இதையடுத்து தகவல் அறிந்த சிலர் காவல்துறை வாகனத்தின் முன்பு நின்று போராட்டத்தில் ஈடுபட்டதாக தெரிகிறது. இதனால் அப்பகுதியில் மீண்டும் பரபரப்பு ஏற்பட்டது. எதிர்ப்பு தெரிவித்தவர்களை காவல்துறை வாகனத்தில் ஏற்றிச் சென்றதற்கு எதிர்ப்பு தெரிவித்து சிலர் தொடர்ந்து வாகனத்தை வழிமறித்து போராட்டம் செய்ததாகவும் கூறப்படுகிறது.

இதன் காரணமாக பெரும்பாக்கம் பகுதியில் நூற்றுக்கும் மேற்பட்ட காவல்துறையினர் பாதுகாப்புப் பணியில் ஈடுபடுத்தப்பட்டதாக தகவல்கள் தெரிவிக்கின்றன. வேட்பாளரின் பிரச்சாரத்தின்போது தொடர்ந்து எதிர்ப்புச் சம்பவங்கள் ஏற்படுவது தவெக தரப்புக்கு சவாலாக மாறியுள்ளதாக கூறப்படும் நிலையில், இடைத்தேர்தல் நெருங்கும் நேரத்தில் இந்த விவகாரம் அரசியல் களத்தில் கூடுதல் கவனத்தைப் பெற்றுள்ளது.