தமிழக அரசியல் களத்தில் தற்போது மிகுந்த எதிர்பார்ப்பை ஏற்படுத்தி வருபவர் மூத்த தலைவர் ஓ.பன்னீர்செல்வம். ஒருகாலத்தில் அதிமுகவின் முதன்மை முகமாகவும், மூன்று முறை முதலமைச்சராகவும் இருந்த ஓபிஎஸ், இன்று தனது அரசியல் எதிர்காலம் குறித்த மிகக் கடினமான முடிவை எடுக்க வேண்டிய சூழலில் நிற்கிறார். தை மாதம் பிறந்துள்ள நிலையில், அவர் தனது கூட்டணி முடிவை அறிவிப்பாரா என்ற கேள்வி அரசியல் வட்டாரங்களில் பெரும் ஆர்வத்தை உருவாக்கியுள்ளது.

அதிமுகவில் மீண்டும் இணைவதற்கான வாய்ப்பு முழுமையாக மூடப்பட்டுள்ள நிலையில், தனது அரசியல் வாழ்வை மட்டுமல்லாது, தனது மகன், நம்பிக்கைக்குரிய ஆதரவாளர்கள் மற்றும் முழு அணியையும் கரை சேர்க்க வேண்டிய பொறுப்பு ஓபிஎஸ் மீது விழுந்துள்ளது. எடப்பாடி பழனிசாமி தலைமையிலான அதிமுக, ஓபிஎஸ்-ஐ மீண்டும் கட்சிக்குள் ஏற்க தயாராக இல்லை என்பதை கடந்த சில மாதங்களாகவே தெளிவுபடுத்தி வருகிறது. மத்திய அமைச்சர் அமித்ஷாவை சந்தித்த பிறகும், “ஓபிஎஸ், சசிகலா இருவருக்கும் அதிமுகவில் இடமில்லை” என்ற நிலைப்பாட்டில் எடப்பாடி தரப்பு உறுதியாக நின்றது.

இதன் பின்னணியில், ஓபிஎஸ் “அதிமுக தொண்டர்கள் உரிமை மீட்பு குழு” என்ற அமைப்பை தனி அரசியல் இயக்கமாக மாற்றி செயல்படுத்த தொடங்கினார். இது, அதிமுக தலைமையிலிருந்து அவர் முழுமையாக விலகியிருப்பதற்கான அரசியல் அறிவிப்பாகவே பார்க்கப்பட்டது. கடந்த நாடாளுமன்றத் தேர்தலில் ராமநாதபுரம் தொகுதியில் சுயேச்சை சின்னத்தில் போட்டியிட்டு, அதிமுக வேட்பாளரை பின்னுக்கு தள்ளி இரண்டாம் இடம் பிடித்தது, அவரது அரசியல் செல்வாக்கு இன்னும் முடிவடையவில்லை என்பதை காட்டும் முயற்சியாக கருதப்பட்டது.

ஆனால் அதே நேரத்தில், ஓபிஎஸ்ஸை சுற்றியிருந்த பல முக்கிய ஆதரவாளர்கள் மற்றும் மாவட்ட நிர்வாகிகள் ஒருபின் ஒருபடியாக அணிமாறத் தொடங்கியது, அவரது அரசியல் பலம் மெதுவாக சிதறத் தொடங்கியதையும் வெளிப்படுத்தியது. தற்போது டிடிவி தினகரனுடன் இணைந்து செயல்பட்டு வந்தாலும், இந்த கூட்டணி அரசியல் ரீதியாக கூடுதல் பலத்தை வழங்கவில்லை என்பதே விமர்சகர்களின் கருத்தாக உள்ளது.

இதற்கிடையே, டிடிவி தினகரனை தனது கூட்டணிக்குள் கொண்டு வர எடப்பாடி பழனிசாமி ஓரளவு இறங்கி வந்துள்ளதாக தகவல்கள் வெளியாகின. ஆனால் ஓபிஎஸ்ஸை சேர்ப்பதில் எந்த சமரசத்தையும் காட்டாமல் பிடிவாதமாக இருப்பது, ஓபிஎஸ் தரப்பில் கடும் மனவருத்தத்தை ஏற்படுத்தியதாக கூறப்படுகிறது. மேலும், “ஓபிஎஸ்ஸிடமிருந்து தினகரனை பிரிக்க எடப்பாடி தரப்பு முயற்சி செய்கிறது” என்ற தகவல்களும் அரசியல் வட்டாரங்களில் பரவின.

சமீபத்தில் நடைபெற்ற “அதிமுக தொண்டர்கள் உரிமை மீட்புக் கழக” மாவட்டச் செயலாளர்கள் கூட்டத்தில், “எடப்பாடி பழனிசாமி தலைமையை ஏற்கவே முடியாது; மூன்று தொகுதிகளுக்காக அந்த அணிக்கு செல்லக்கூடாது” என்று பலரும் ஒரே குரலில் வலியுறுத்தினர். இந்த கருத்தை ஓபிஎஸ்ஸும் வெளிப்படையாக வழிமொழிந்தார். இதன் மூலம், அதிமுக கூட்டணிக்கு திரும்பும் வாய்ப்பு முழுமையாக முடிந்துவிட்டது என்பது உறுதி செய்யப்பட்டது.

இந்த நிலையில், ஓபிஎஸ் முன் தற்போது மூன்று அரசியல் ஆப்ஷன்கள் மட்டுமே இருப்பதாக அரசியல் விமர்சகர்கள் கூறுகிறார்கள். ஒன்று, பாஜக கூட்டணி; இரண்டாவது, திமுக கூட்டணி; மூன்றாவது, நடிகர் விஜய் தலைமையிலான தமிழக வெற்றி கழகம் (தவெக). பாஜக கூட்டணியில் இணைந்தால், தேசிய அரசியல் ஆதரவு கிடைக்கலாம். ஆனால் தமிழ்நாட்டில் தனிப்பட்ட வாக்குவங்கி குறைவாக இருப்பது பெரிய சவாலாக இருக்கும். திமுக கூட்டணியில் சேர்ந்தால் உடனடி அரசியல் பாதுகாப்பு கிடைக்கலாம் என்றாலும், நீண்டகால அரசியல் அடையாளம் திமுகவில் கரைந்துவிடும் அபாயம் இருப்பதாக ஓபிஎஸ் ஆதரவாளர்கள் கருதுகின்றனர்.

இதனால், ஓபிஎஸ் தவெக-வை நோக்கி சாய்வதற்கான வாய்ப்புகளே அதிகம் என அரசியல் வட்டாரங்கள் தெரிவிக்கின்றன. இதற்கு முக்கிய காரணமாக மூத்த தலைவர் செங்கோட்டையன் குறிப்பிடப்படுகிறார். அவர் தொடர்ந்து ஓபிஎஸ்ஸை தவெக-வில் இணைக்க முயற்சி செய்து வருவதாகவும், இணைந்தால் தெற்கு மண்டல பொறுப்பாளர் பதவி, கௌரவமான அதிகாரப் பகிர்வு மற்றும் உரிய அந்தஸ்து வழங்கப்படும் என தூது விட்டதாகவும் தகவல்கள் வெளியாகியுள்ளன.

ஆனால் பல அரசியல் ஏமாற்றங்கள், சட்டப் போராட்டங்கள் மற்றும் உட்கட்சிப் பிளவுகளை அனுபவித்த ஓபிஎஸ், இனி வெறும் பெயரளவு பதவிக்காக மற்றொரு கட்சியில் இணைய விரும்ப மாட்டார் என்பதே அவரது ஆதரவாளர்களின் நிலைப்பாடு. கவுரவமான அதிகாரப் பகிர்வு, தெளிவான அரசியல் அடையாளம் மற்றும் தனது அணியின் எதிர்காலம் உறுதி செய்யப்பட்டால் மட்டுமே, ஓபிஎஸ் தனது அடுத்த கட்ட அரசியல் நகர்வை அறிவிப்பார் என கூறப்படுகிறது.

“தை பிறந்தால் வழி பிறக்கும்” என்று மட்டும் இதுவரை கூறி வந்த ஓபிஎஸ், இன்று தை மாதம் பிறந்துள்ள நிலையில் என்ன முடிவு எடுப்பார் என்பதே தமிழக அரசியல் களத்தில் மிகப்பெரிய கேள்வியாக உள்ளது. செங்கோட்டையனின் தூது முயற்சி வெற்றி பெறுமா? ஓபிஎஸ் தவெக-வை நோக்கி பயணிப்பாரா? அல்லது அரசியல் கணக்குகள் மாறி வேறு பாதையைத் தேர்வு செய்வாரா? என்பதற்கான பதிலை அரசியல் வட்டாரம் ஆவலுடன் எதிர்நோக்கி காத்திருக்கிறது.