கடந்த 2005ஆம் ஆண்டு காங்கிரஸ் கூட்டணி அரசால் தொடங்கப்பட்ட மகாத்மா காந்தி ஊரக வேலைவாய்ப்பு உறுதித் திட்டத்தின் (MGNREGA) பெயரை, ‘புஜ்ய பாபு ஊரக வேலைவாய்ப்புத் திட்டம்’ என மத்திய பாஜக அரசு மாற்றத் திட்டமிடுவதாகத் தகவல்கள் வெளியாகியுள்ளன. இதற்கு காங்கிரஸ் கட்சி கடும் எதிர்ப்பு தெரிவித்துள்ளது.

காந்தி மீதான வெறுப்பு:
காங்கிரஸ் எம்.பி. பிரியங்கா காந்தி பேசுகையில், "முதலில் மகாத்மா காந்தியின் பெயரை மாற்றும்போது, எழுதுபொருள் முதல் அலுவலகங்கள் வரை அனைத்தையும் மறுபெயரிட வேண்டும். இது மிகவும் விலையுயர்ந்த மற்றும் தேவையற்ற செயல்முறை. இதற்குப் பின்னால் உள்ள மனநிலையை என்னால் புரிந்து கொள்ள முடியவில்லை" என்று தெரிவித்தார்.

நிதி ஒதுக்கீடு குறைப்பு:
காங்கிரஸ் பொதுச் செயலாளர் கே.சி. வேணுகோபால், பிரதமர் மோடி தலைமையிலான அரசு இந்தப் புரட்சிகரமான திட்டத்தின் பெயரை மாற்றுவது, காந்தியை இந்தியாவின் தேசிய மனசாட்சியிலிருந்து அழிப்பதற்கான மற்றொரு வழி என்று விமர்சித்தார்.

"மத்திய அரசு ஆண்டுதோறும் இந்தத் திட்டத்தின் ஒதுக்கீட்டைக் குறைத்து வருகிறது. நிலுவைத் தொகைகள் குவிந்து கொண்டே செல்கின்றன. இது திட்டத்தை மெதுவாகக் கொல்ல கவனமாகத் திட்டமிடப்பட்ட உத்தி" என்று அவர் குற்றம் சாட்டினார். மேலும், இந்தப் புரட்சிகரமான திட்டத்தை கிராமங்களுக்குக் கொண்டு வந்தவர்கள் டாக்டர் மன்மோகன் சிங் மற்றும் சோனியா காந்திதான் என்பதை மக்கள் அறிவார்கள் என்றும் அவர் எக்ஸ் தளத்தில் பதிவிட்டுள்ளார்.