எதிர்காலத்தில் தமிழ்நாட்டில் இருந்து நாட்டின் பிரதமர் உருவாகும் நிலை ஏற்பட வேண்டும் என்று பொதுப்பணித்துறை அமைச்சர் ஆதவ் அர்ஜுனா தெரிவித்துள்ளார்.தொகுதி மறுவரையறைக்கு எதிராக தமிழக சட்டசபையில் கொண்டுவரப்பட்ட அரசினர் தனித்தீர்மானத்தின் மீது பேசிய அவர், முதலமைச்சர் விஜய் முன்வைத்துள்ள இந்தத் தீர்மானம் வரலாற்று முக்கியத்துவம் வாய்ந்தது என்று குறிப்பிட்டார்.மாநிலங்களின் பங்களிப்பு இல்லாமல் ஒன்றிய அரசும், இந்தியாவின் ஒட்டுமொத்த வளர்ச்சியும் சாத்தியமில்லை என்று ஆதவ் அர்ஜுனா தெரிவித்தார்.

ஒன்றிய அரசு அனைத்து மாநிலங்களையும் சமமாக அணுகக்கூடியதாக இருக்க வேண்டும் என்றும், தேர்தல் அரசியலை மனதில் வைத்து சட்டங்களை உருவாக்கும் போக்கு இருக்கக்கூடாது என்றும் அவர் வலியுறுத்தினார்.பன்முகத்தன்மை கொண்ட இந்தியாவின் அடிப்படை கட்டமைப்பையும், அரசியலமைப்பின் மாண்பையும் பாதுகாப்பது அவசியம் என்றும், அதற்காகவே தொகுதி மறுவரையறைக்கு எதிரான தீர்மானம் சட்டசபையில் கொண்டு வரப்பட்டுள்ளதாகவும் அவர் தெரிவித்தார்.

தமிழ்நாடு வளர்ச்சியடைந்த மாநிலமாக திகழ்ந்தாலும், அதன் முன்னேற்றத்திற்கேற்ப அரசியல் பிரதிநிதித்துவம் அமையவில்லை என்று ஆதவ் அர்ஜுனா கூறினார்.மாநில சுயாட்சி தொடர்பாக முன்னாள் முதல்-அமைச்சர்கள் கருணாநிதி மற்றும் ஜெயலலிதா ஆகியோர் தொடர்ந்து குரல் எழுப்பியதை அவர் நினைவுகூர்ந்தார்.

தொகுதி மறுவரையறை காரணமாக நாடாளுமன்ற உறுப்பினர்களின் எண்ணிக்கையில் மாற்றம் ஏற்பட்டால், தமிழ்நாட்டின் உரிமைகளும் பிரதிநிதித்துவமும் பாதிக்கப்படும் அபாயம் இருப்பதாக அவர் எச்சரித்தார்.மேலும், நீட் விவகாரத்தைவிட தொகுதி மறுவரையறைக்கு எதிரான போராட்டம் மிக முக்கியமானது என்றும் அவர் தெரிவித்தார்.

இந்த விவகாரம் குறித்து முதன்முதலில் வலுவாக குரல் எழுப்பியவர்களில் மு.க.ஸ்டாலினும் ஒருவர் என்றும், அவரது நிலைப்பாட்டை வரவேற்பதாகவும் கூறினார்.தொகுதி மறுவரையறைக்கு எதிரான தீர்மானத்திற்கு ஆதரவு தெரிவித்த தி.மு.க. மற்றும் எதிர்க்கட்சித் தலைவருக்கு ஆதவ் அர்ஜுனா நன்றி தெரிவித்தார்.

எதிர்காலத்தில் நாடாளுமன்றத்தில் தொகுதி மறுவரையறை தொடர்பான மசோதா கொண்டுவரப்பட்டால், தமிழகத்தைச் சேர்ந்த 39 மக்களவை உறுப்பினர்களும் ஒருமித்த குரலில் அதற்கு எதிர்ப்பு தெரிவிக்க வேண்டும் என்றும், வெளிநடப்பு செய்வதைவிட மசோதாவுக்கு எதிராக வாக்களிக்க வேண்டும் என்றும் அவர் வலியுறுத்தினார்.

மேலும், இந்த விவகாரத்தில் தி.மு.க. மற்றும் காங்கிரஸ் கட்சிகள் அரசியல் ரீதியாக ஒன்றிணைந்து எதிர்ப்பை பதிவு செய்ய வேண்டும் என்றும் அவர் கேட்டுக்கொண்டார்.தொகுதி மறுவரையறை விவகாரத்தில் தென் மாநிலங்களின் நலன்களையும் அரசியல் பிரதிநிதித்துவத்தையும் பாதுகாப்பது மிகவும் அவசியம் என்று ஆதவ் அர்ஜுனா தெரிவித்தார்.

மக்களவை தொகுதிகளின் எண்ணிக்கையை 50 சதவீதம் உயர்த்தினால் தமிழ்நாட்டுக்கு நன்மை கிடைக்கும் என்ற கருத்து சரியானதல்ல என்றும் அவர் கூறினார்.தொகுதிகளின் எண்ணிக்கை அதிகரிக்கப்பட்டாலும், மக்கள் தொகை அடிப்படையிலான பிரதிநிதித்துவம் காரணமாக வட மாநிலங்களின் ஆதிக்கம் மேலும் அதிகரிக்கும் சூழல் உருவாகக்கூடும் என்றும் அவர் எச்சரித்தார்.

வடக்கு மற்றும் தெற்கு மாநிலங்களுக்கு இடையேயான அரசியல் பிரதிநிதித்துவ வேறுபாடு குறித்து அண்ணா அன்றே குரல் எழுப்பியதை சுட்டிக்காட்டிய ஆதவ் அர்ஜுனா, மாநிலங்களின் உரிமைகளை பாதுகாக்க அனைத்து அரசியல் கட்சிகளும் ஒன்றிணைந்து செயல்பட வேண்டும் என்று வலியுறுத்தினார்.

இந்தி பேசும் சில வட மாநிலங்கள் ஒன்றிணைந்தாலே நாட்டின் பிரதமரைத் தேர்ந்தெடுக்கும் அளவுக்கு அரசியல் பலம் உருவாகும் நிலை இருப்பதாகவும் அவர் குறிப்பிட்டார்.இந்த நிலை மாற்றப்பட வேண்டும் என்றும், தென் இந்தியாவுக்கும் சமமான அரசியல் வாய்ப்பும் பிரதிநிதித்துவமும் கிடைக்க வேண்டும் என்றும் தெரிவித்தார்.

நாட்டின் அரசியல் அதிகாரம் அனைத்து பகுதிகளுக்கும் சமமாக பகிர்ந்தளிக்கப்பட வேண்டும். எதிர்காலத்தில் தென் இந்தியாவில் இருந்தும், குறிப்பாக தமிழ்நாட்டில் இருந்தும் ஒரு பிரதமர் உருவாகும் சூழலை நாம் உருவாக்க வேண்டும்” என்று அமைச்சர் ஆதவ் அர்ஜுனா தெரிவித்தார்.