தமிழக அரசியலின் 'அடித்தளம்' என்று அழைக்கப்படும் மதுரையில், திமுக - காங்கிரஸ் கூட்டணிக்குள் தற்போது மோதல் வெடித்துள்ளது. தொகுதிப் பங்கீடு பேச்சுவார்த்தைக்கு முன்பே, மதுரையில் இரு கட்சியினரும் போஸ்டர்கள் மூலம் மல்லுக்கட்டி வருவது அரசியல் களத்தைச் சூடாக்கியுள்ளது.

மோதலின் பின்னணி: 'பூத் கமிட்டி' விமர்சனம்
மதுரை வடக்கு தொகுதி எம்.எல்.ஏ-வும், திமுக மாநகரச் செயலாளருமான கோ.தளபதி, சமீபத்தில் ஒரு பொதுக்கூட்டத்தில் பேசுகையில், "காங்கிரஸ் கட்சிக்கு பூத் கமிட்டி அமைக்கக்கூட ஆளில்லை" எனச் சகட்டுமேனிக்கு விமர்சித்தார். இந்தக் கருத்து காங்கிரஸ் தொண்டர்களிடையே கடும் கொந்தளிப்பை ஏற்படுத்தியது.

களத்தில் குதித்த காங்கிரஸ்:
தளபதியின் கருத்துக்கு எம்பிக்கள் மாணிக்கம் தாகூர் மற்றும் ஜோதிமணி கடும் கண்டனம் தெரிவித்தனர். அதனைத் தொடர்ந்து:

போஸ்டர் யுத்தம்: தளபதியின் சொந்தத் தொகுதியான மதுரை வடக்கில், காங்கிரஸ் கட்சியினர் "கைச் சின்னத்திற்கு வாக்களிப்பீர்" எனப் போஸ்டர் ஒட்டி அதிரடி காட்டினர்.

எம்.பி ஆதரவு: "தன்மானத்துடன் செயல்பட்ட இளைஞர் காங்கிரஸாரைப் பாராட்டுகிறேன். மதுரை வடக்கு தொகுதியை நாங்கள் கேட்டுப் பெறுவோம்; எங்களுக்குத் திருப்பி அடிக்கத் தெரியும்" என மாணிக்கம் தாகூர் பகிரங்கமாக எச்சரித்தார்.

திமுகவின் 'உதயசூரியன்' :
காங்கிரஸின் போஸ்டர்களுக்குப் பதிலடி கொடுக்கும் விதமாக, திமுகவினர் வேட்பாளர் அறிவிப்பிற்கு முன்பே கோ.தளபதியின் படத்தைப்போட்டு "வாக்களிப்பீர் உதயசூரியன்" எனத் தொகுதி முழுவதும் போஸ்டர் ஒட்டி தங்களது பிடியை உறுதிப்படுத்தியுள்ளனர்.