தமிழகத்தில் தவெக ஆட்சி அமைந்தது முதல் அரசியல் களம் பரபரப்பாகவே இருந்து வருகிறது. அந்த வகையில், சமீப நாட்களில் அதிகம் விவாதிக்கப்படும் நபராக உருவெடுத்திருப்பவர் தமிழக நிதியமைச்சர் மரிய வில்சன். “எம்ஜிஆருக்கு ஜேப்பியார் போல, விஜய்க்கு நான் இருப்பேன்” என்று கூறியதுடன், தனது முதல் பட்ஜெட்டை தாக்கல் செய்து கவனம் பெற்ற மரிய வில்சன் யார், அவரது பின்னணி என்ன என்பது அரசியல் வட்டாரங்களில் பேசுபொருளாகியுள்ளது.

தமிழகத்தின் பிரபல கல்வியாளரும், கல்வி நிறுவன அதிபருமான மறைந்த ஜேப்பியாரின் மருமகன்தான் மரிய வில்சன். ஜேப்பியாரின் மகள் ரெஜினாவை திருமணம் செய்துள்ள இவர், பி.டெக்., எம்.பி.ஏ. படிப்புகளை முடித்ததுடன், 2012ஆம் ஆண்டு மேலாண்மை அறிவியலில் முனைவர் பட்டமும் பெற்றுள்ளார்.

ஜேப்பியார் மறைவுக்குப் பிறகு, அவர் உருவாக்கிய கல்வி நிறுவனங்களின் நிர்வாகத்தில் முக்கியப் பங்காற்றிய மரிய வில்சன், ஜேப்பியார் ரெமிபாய் கல்வி அறக்கட்டளையின் நிர்வாக அறங்காவலராகவும், ஜேப்பியார் இன்ஸ்டிடியூட் ஆஃப் டெக்னாலஜியின் நிர்வாக இயக்குநராகவும் செயல்பட்டதாக கூறப்படுகிறது. மாணவர்களின் புதிய சிந்தனைகளை ஊக்குவிக்கும் வகையில் டிசைன் திங்கிங் கிளப் உள்ளிட்ட பல்வேறு முயற்சிகளையும் மேற்கொண்டதாக தகவல்கள் தெரிவிக்கின்றன.

ஜேப்பியார் அரசியலில் இருந்து விலகிய பல ஆண்டுகளுக்குப் பிறகு, அவரது மருமகன் மரிய வில்சன் அரசியலில் நுழைந்தார். 2025 ஜூன் 9ஆம் தேதி தவெக தலைவர் விஜய் முன்னிலையில் அவர் கட்சியில் இணைந்தார்.

அதன்பிறகு 2026 சட்டமன்றத் தேர்தலில் ஆர்.கே.நகர் தொகுதியில் போட்டியிட்டு வெற்றி பெற்றார். வடசென்னையின் உள்கட்டமைப்பு, வேலைவாய்ப்பு உள்ளிட்ட பிரச்சனைகளை முன்வைத்து பிரச்சாரம் செய்த அவர், 97,800 வாக்குகள் பெற்றதாக கூறப்படுகிறது. தேர்தல் வெற்றியைத் தொடர்ந்து, விஜய் தலைமையிலான அமைச்சரவையில் அவருக்கு முக்கியமான நிதியமைச்சர் பொறுப்பு வழங்கப்பட்டது.

குறிப்பாக, கரூர் பிரச்சாரத்தில் உயிரிழந்த 41 பேரின் குடும்பங்களுக்கு கல்வித் தகுதிக்கேற்ப வேலைவாய்ப்பு, ஆயுள் காப்பீடு மற்றும் மாதாந்திர நிவாரணம் உள்ளிட்ட அறிவிப்புகளை அவர் வெளியிட்டது அரசியல் வட்டாரத்தில் கவனம் பெற்றது.அரசியலில் வேகமாக உயர்ந்த மரிய வில்சன், தற்போது அடுத்தடுத்து சர்ச்சைகளில் சிக்கி வருவது பேசுபொருளாகியுள்ளது.

சட்டப்பேரவையில் தனது முதல் பொது பட்ஜெட்டை தாக்கல் செய்தபோது, அவரது தமிழ் உச்சரிப்பு குறித்து கடையநல்லூர் எம்.எல்.ஏ. ராஜேந்திரன் சுட்டிக்காட்டியதாக கூறப்படுகிறது. இதற்கு பதிலளித்த மரிய வில்சன், தனது கிறிஸ்தவ நம்பிக்கை மற்றும் அன்பு, அமைதி, இரக்கம் ஆகியவற்றை குறிப்பிட்டு ஆவேசமாக பேசியது அரசியல் ரீதியாக பெரும் சர்ச்சையை ஏற்படுத்தியது.

அமைச்சரின் இந்த பதில் மொழி விவகாரத்தை மத அடையாளத்துடன் இணைத்ததாக விமர்சனங்கள் எழுந்தன. பாஜக உள்ளிட்ட எதிர்க்கட்சிகளைச் சேர்ந்த சில தலைவர்களும் அவருக்கு எதிராக கருத்துகளை தெரிவித்தனர். சமூக வலைதளங்களிலும் அவரது பேச்சு தொடர்பாக பல்வேறு விமர்சனங்கள் முன்வைக்கப்பட்டு வருகின்றன.

ஒரு சட்டமன்ற உறுப்பினர் தமிழ் உச்சரிப்பு குறித்து சுட்டிக்காட்டியபோது, அதற்கு மொழி அல்லது நிர்வாக ரீதியாக விளக்கம் அளிப்பதற்குப் பதிலாக தனிப்பட்ட மத அடையாளத்தை முன்னிறுத்தி பதிலளித்தது தேவையற்ற சர்ச்சைக்கு வழிவகுத்ததாக அரசியல் விமர்சகர்கள் கூறுகின்றனர்.

மரிய வில்சனின் தற்போதைய சர்ச்சையை அவரது மாமனார் ஜேப்பியாரின் பொது வாழ்க்கையில் ஏற்பட்ட சர்ச்சைகளுடன் ஒப்பிட்டு சிலர் பேசத் தொடங்கியுள்ளனர்.

ஜேப்பியார் தனது கல்வி நிறுவனங்களில் கடுமையான விதிமுறைகளை அமல்படுத்தியதற்காகவும், மாணவர்கள் தொடர்பான சில கட்டுப்பாடுகள் குறித்து பேசியதற்காகவும் கடந்த காலங்களில் சர்ச்சைகளில் சிக்கியிருந்தார்.

அதேபோல், தற்போது மரிய வில்சனும் சட்டப்பேரவை போன்ற ஜனநாயக களத்தில் தனது கருத்தை வெளிப்படுத்திய விதத்தால் அரசியல் சர்ச்சையில் சிக்கியுள்ளார்.

இருவரின் பின்னணியும், அவர்கள் செயல்படும் களமும் வெவ்வேறானவை என்றாலும், பொது மேடைகளில் நிதானமாக விளக்கம் அளிப்பதற்குப் பதிலாக தங்களது தனிப்பட்ட நம்பிக்கைகள் மற்றும் கொள்கைகளை அழுத்தமாக முன்வைத்ததால் சர்ச்சைகளை எதிர்கொண்டவர்கள் என்ற ஒற்றுமையை அரசியல் விமர்சகர்கள் சுட்டிக்காட்டுகின்றனர்.

“எம்ஜிஆருக்கு ஜேப்பியார் போல, விஜய்க்கு நான் இருப்பேன்” என்று கூறிய மரிய வில்சன், தற்போது தனது மாமனார் போலவே அரசியல் மற்றும் பொது விவாதங்களில் கவனம் பெறத் தொடங்கியிருக்கிறார்.

ஆனால், இந்த சர்ச்சைகள் அவரது அரசியல் பயணத்திற்கு பலமாக அமையுமா அல்லது வடசென்னை மக்கள் அளித்த ஆதரவுக்கே பின்னடைவை ஏற்படுத்துமா என்பது இனிவரும் காலத்தில்தான் தெரியவரும். நிதியமைச்சராக நிர்வாகத் திறமையை நிரூபிப்பாரா, அல்லது சர்ச்சையான பேச்சுகளே அவரது அரசியல் அடையாளமாக மாறுமா? என்பதே தற்போதைய அரசியல் வட்டாரங்களின் கேள்வியாக உள்ளது.