தமிழக அரசியலில் நீண்ட காலமாக முக்கிய தலைவராக இருந்து வந்த முன்னாள் அமைச்சர் கே.ஏ. செங்கோட்டையனின் அரசியல் பயணம் தற்போது புதிய திருப்பத்தை எட்டியுள்ளது. ஒருகாலத்தில் அதிமுகவின் முக்கிய தூணாக கருதப்பட்ட அவர், தற்போது தவெக ஆட்சியில் முக்கிய அமைச்சராக பதவி ஏற்றிருப்பது அரசியல் வட்டாரத்தில் பரபரப்பை ஏற்படுத்தியுள்ளது.

எம்ஜிஆர் காலத்திலிருந்து அரசியலில் செயல்பட்டு வந்த செங்கோட்டையன், கொங்கு மண்டலத்தில் அதிமுகவின் மிகப்பெரிய முகமாக விளங்கியவர். ஈரோடு, கோபிச்செட்டிப்பாளையம் உள்ளிட்ட பகுதிகளில் தனிப்பட்ட செல்வாக்குடன் இருந்த அவர், பல முறை அமைச்சராக பதவி வகித்ததுடன், கட்சியின் அமைப்பை வலுப்படுத்திய முக்கிய நிர்வாகிகளில் ஒருவராகவும் கருதப்பட்டார்.

அதிமுகவில் ஏற்பட்ட உள்கட்சி மோதல்கள் மற்றும் தலைமைக்கு எதிரான கருத்து வேறுபாடுகள் காரணமாக, செங்கோட்டையன் படிப்படியாக ஓரங்கட்டப்பட்டார். பின்னர் அவர் கட்சியிலிருந்து நீக்கப்பட்ட சம்பவம் அரசியல் உலகில் பெரும் அதிர்ச்சியை ஏற்படுத்தியது. இதையடுத்து அவரது அரசியல் எதிர்காலம் முடிந்துவிட்டதாக பலரும் விமர்சித்தனர்.

ஆனால், எதிர்பாராத வகையில் விஜய் தலைமையிலான தமிழக வெற்றிக் கழகத்தில் செங்கோட்டையன் இணைந்தது அரசியல் களத்தில் பெரிய திருப்பமாக அமைந்தது. அப்போது அவரது இந்த முடிவு அரசியல் ரீதியாக மிகப்பெரிய ரிஸ்க் என பலர் கருத்து தெரிவித்தனர்.

இந்நிலையில், தற்போது அந்த முடிவே செங்கோட்டையனுக்கு புதிய அரசியல் உயிர் கொடுத்துள்ளதாக பார்க்கப்படுகிறது. தவெக வெற்றிக்கு அவரது அனுபவமும், கொங்கு மண்டலத்தில் இருந்த வாக்கு செல்வாக்கும் முக்கிய காரணமாக இருந்ததாக அரசியல் விமர்சகர்கள் கூறுகின்றனர்.

குறிப்பாக கிராமப்புறங்களில் செங்கோட்டையனுக்கு இருந்த பழைய ஆதரவாளர்கள் பலரும் தவெகவுக்கு திரும்பியதே கட்சிக்கு கூடுதல் பலமாக அமைந்ததாக மதிப்பிடப்படுகிறது.

தற்போது தவெக அமைச்சரவையில் செங்கோட்டையனுக்கு முக்கிய பொறுப்பு வழங்கப்பட்டிருப்பது, அவரது அரசியல் ரீஎன்ட்ரியை மேலும் வலுப்படுத்தியுள்ளது. “அரசியலில் சரியான நேரத்தில் எடுக்கப்படும் ரிஸ்க் வாழ்க்கையை முழுவதும் மாற்றிவிடும்” என்பதற்கான உதாரணமாக அவரது பயணம் பார்க்கப்படுகிறது.

இதற்கிடையில், கொங்கு மண்டலத்தில் திமுக மற்றும் அதிமுகவில் இருந்த சில முக்கிய நிர்வாகிகளும் தவெகவில் இணையத் தயாராக உள்ளதாக அரசியல் வட்டாரங்களில் தகவல்கள் வெளியாகி வருகின்றன.