பரந்தூர் பசுமைவெளி விமான நிலையத் திட்டம் கைவிடப்பட்டுள்ள நிலையில், இதனை அரசியல் வெற்றி அல்லது தோல்வியாக பார்க்கக்கூடாது என்றும், திட்டம் தொடங்கப்பட்டபோதே அதன் சாத்தியக்கூறுகள் குறித்து கேள்விகள் எழுந்திருந்ததாகவும் தமிழ்நாடு காங்கிரஸ் தலைவர் மாணிக்கம் தாகூர் தெரிவித்துள்ளார்.

அவர் வெளியிட்டுள்ள அறிக்கையில், ஏகனாபுரம் மற்றும் சுற்றுவட்டார கிராமங்களை சேர்ந்த விவசாயிகள் கடந்த 7 ஆண்டுகளாக தங்களது நிலம் மற்றும் வாழ்வாதாரத்தை பாதுகாக்க தொடர்ந்து போராடி வந்ததை சுட்டிக்காட்டியுள்ளார்.

பரந்தூர் விமான நிலையத் திட்டத்தை ரத்து செய்ததற்கு ஆதரவு தெரிவிப்பதற்கான காரணங்களை அரசின் ஆய்வுகள் மற்றும் அதிகாரப்பூர்வ ஆவணங்களின் அடிப்படையில் அவர் பட்டியலிட்டுள்ளார்.

இந்திய விமான நிலைய ஆணையம் கடந்த 2022-ம் ஆண்டு சமர்ப்பித்த சாத்தியக்கூறு அறிக்கையிலேயே, பரந்தூர் பகுதி ஏராளமான நீர்நிலைகளால் சூழப்பட்ட தாழ்வான பகுதியாக இருப்பது குறிப்பிடப்பட்டுள்ளதாக மாணிக்கம் தாகூர் தெரிவித்துள்ளார்.

தேர்வு செய்யப்பட்ட நிலப்பரப்பில் நான்கில் ஒரு பங்குக்கும் அதிகமான பகுதி பாசனக் குளங்களை கொண்டிருந்ததாகவும், 201 ஹெக்டேர் பரப்பளவு கொண்ட செயற்கை ஏரி ஒன்று திட்ட எல்லையில் இருந்து சுமார் 1.4 கிலோமீட்டர் தொலைவில் இருந்ததாகவும் அந்த அறிக்கையில் பதிவு செய்யப்பட்டிருந்ததாக அவர் குறிப்பிட்டுள்ளார்.

தற்போது திட்டத்தை கைவிடுவதற்காக முன்வைக்கப்படும் தாழ்வான நிலப்பரப்பு, நீர் தேங்கும் தன்மை உள்ளிட்ட காரணங்கள் மூன்று ஆண்டுகளுக்கு முன்பே அரசின் ஆவணங்களில் இடம்பெற்றிருந்ததாகவும் அவர் தெரிவித்துள்ளார்.சென்னைக்கு அருகில் விமான நிலையம் அமைப்பதற்கான மாற்று இடமாக பரிசீலிக்கப்பட்ட பன்னூருடன் ஒப்பிடும்போது, பரந்தூர் பல முக்கிய அம்சங்களில் பின்தங்கியிருந்ததாக மாணிக்கம் தாகூர் தெரிவித்துள்ளார்.

சென்னையிலிருந்து பன்னூர் சுமார் 27.6 கிலோமீட்டர் தொலைவில் இருந்த நிலையில், பரந்தூர் சுமார் 62 கிலோமீட்டர் தொலைவில் இருந்ததாகவும் அவர் குறிப்பிட்டுள்ளார்.மேலும், பன்னூர் திட்டத்தால் சுமார் 250 குடும்பங்கள் மட்டுமே இடம்பெயர வேண்டியிருந்ததாகவும், பரந்தூர் திட்டத்தில் சுமார் 1,005 குடும்பங்கள் பாதிக்கப்படும் நிலை இருந்ததாகவும் தெரிவித்துள்ளார்.

நிலத்தை நிரப்பி சமன்படுத்த வேண்டிய பணிகளும் பரந்தூர் பகுதியில் பன்னூரை விட அதிகமாக இருந்ததாகவும், அரசு நிர்ணயித்த பல்வேறு அளவுகோல்களிலும் பன்னூர் வலுவான மாற்றாக இருந்ததாகவும் அவர் கூறியுள்ளார்.ஏகனாபுரம் மக்கள் 1,000 நாட்களுக்கும் மேலாக தொடர்ந்து போராடியது வளர்ச்சிக்கு எதிரான நடவடிக்கை அல்ல என மாணிக்கம் தாகூர் தெரிவித்துள்ளார்.

தங்களது நிலம், நீர் மற்றும் வாழ்வாதாரத்தை பாதுகாக்க ஒரு சமூகமே நீண்ட காலமாக நடத்திய போராட்டம் அது என்றும், தற்போது வெளியாகியுள்ள அரசு ஆவணங்கள் அவர்களின் அச்சங்கள் நியாயமானவை என்பதை உறுதிப்படுத்தியுள்ளதாகவும் அவர் தெரிவித்துள்ளார்.திட்டத்தை ரத்து செய்வதற்காக தற்போதைய அரசு முன்வைத்துள்ள தொழில்நுட்ப காரணங்கள் அனைத்தும் 2022-ம் ஆண்டிலேயே அரசின் ஆய்வுகளில் இடம்பெற்றிருந்ததாக மாணிக்கம் தாகூர் சுட்டிக்காட்டியுள்ளார்.

அப்போது பதிவாகியிருந்த இந்தக் குறைபாடுகள் மீது பல ஆண்டுகளாக உரிய நடவடிக்கை எடுக்கப்படவில்லை என்றும், இது ஒரு குறிப்பிட்ட கட்சி அல்லது ஆட்சியின் தோல்வியாக மட்டும் பார்க்க முடியாது என்றும் அவர் தெரிவித்துள்ளார்.

நிர்வாக ரீதியாகவும், அரசியல் ரீதியாகவும் பல ஆண்டுகளாக நீடித்த தவறான முடிவின் விளைவாகவே இதனை பார்க்க வேண்டும் எனவும் அவர் குறிப்பிட்டுள்ளார்.பெரிய உள்கட்டமைப்புத் திட்டங்களுக்காக நிலம் கையகப்படுத்துவதற்கு முன்பு, பாதிக்கப்படும் மக்களின் உண்மையான ஒப்புதல் மற்றும் முறையான சமூக தாக்க மதிப்பீடு அவசியம் என்பதே காங்கிரஸ் கட்சியின் நீண்டகால நிலைப்பாடு என மாணிக்கம் தாகூர் தெரிவித்துள்ளார்.

நிலம் கையகப்படுத்துதல், மறுவாழ்வு மற்றும் மறுகுடியமர்வு தொடர்பான சட்டத்திலும் இந்தக் கொள்கைகளுக்கு முக்கியத்துவம் வழங்கப்பட்டுள்ளதாக அவர் குறிப்பிட்டுள்ளார்.எனவே, பரந்தூர் திட்டம் ரத்து செய்யப்பட்டதற்கு காங்கிரஸ் அளிக்கும் ஆதரவு அரசியல் கணக்கீட்டின் அடிப்படையிலானது அல்ல என்றும், கொள்கை மற்றும் ஆதாரங்களின் அடிப்படையிலானது என்றும் அவர் தெரிவித்துள்ளார்.

பரந்தூர் திட்டத்துக்காக நிலம் கையகப்படுத்த மேற்கொள்ளப்பட்ட சட்ட நடைமுறைகளிலும் தீவிரமான குறைபாடுகள் இருந்ததாக மாணிக்கம் தாகூர் குற்றம்சாட்டியுள்ளார்.

தமிழ்நாடு நில ஒருங்கிணைப்பு சிறப்புத் திட்டங்கள் சட்டம், 2023 மூலம் ஏரிகள் மற்றும் நீர்நிலைகள் உள்ளிட்ட பகுதிகளை ஒருங்கிணைக்கும் நடவடிக்கைகள் மேற்கொள்ளப்பட்டதாகவும், அந்தச் சட்டம் சட்டப்பேரவையில் ஒரே நாளில் அறிமுகப்படுத்தப்பட்டு, விரிவான விவாதமின்றி குரல் வாக்கெடுப்பு மூலம் நிறைவேற்றப்பட்டதாகவும் அவர் தெரிவித்துள்ளார்.

பாதிக்கப்படும் குடும்பங்களின் உண்மையான ஒப்புதலுக்கான உரிய நடைமுறை இல்லாத நிலையில், ஐந்து பேர் கொண்ட குழுவுக்கு அதிகாரம் வழங்கப்பட்டதாகவும் அவர் குறிப்பிட்டுள்ளார்.

மேலும், சுற்றுச்சூழல் அனுமதிகள், முழுமையான சுற்றுச்சூழல் தாக்க மதிப்பீடு மற்றும் மாநில ஈரநில ஆணையத்தின் தடையின்மைச் சான்று உள்ளிட்ட முக்கிய நடைமுறைகள் நிலம் கையகப்படுத்தும் நடவடிக்கைகள் மேற்கொள்ளப்பட்டபோதும் நிலுவையில் இருந்ததாக அவர் தெரிவித்துள்ளார்.

பரந்தூர் திட்டம் ரத்து செய்யப்பட்டதுடன் அரசின் பொறுப்பு முடிந்துவிடக்கூடாது என மாணிக்கம் தாகூர் வலியுறுத்தியுள்ளார்.சென்னையின் இரண்டாவது விமான நிலையத்திற்கான மாற்று இடத்தை முறையான சமூக தாக்க மதிப்பீடு மற்றும் பாதிக்கப்படும் மக்களின் உண்மையான ஒப்புதலுடன் தேர்வு செய்ய வேண்டும் என்றும், ஆய்வு முதல் இறுதி அனுமதி வரை ஒவ்வொரு கட்டத்திற்கும் தெளிவான காலக்கெடுவை அரசு பொதுவெளியில் அறிவிக்க வேண்டும் என்றும் அவர் கேட்டுக்கொண்டுள்ளார்.

சென்னையின் விமான நிலையம் முழுத் திறனை நெருங்கி வரும் நிலையில், ஒரு திட்டத்தை கைவிடுவது மாற்றுத் திட்டத்தை காலவரையின்றி தாமதப்படுத்துவதற்கான காரணமாக மாறக்கூடாது எனவும் அவர் தெரிவித்துள்ளார்.

நெல்வாய், நாகப்பட்டு, தண்டலம், போடவூர், வாலத்தூர் மற்றும் அக்கம்மாபுரம் உள்ளிட்ட பகுதிகளில் ஏற்கனவே நிலம் கையகப்படுத்தப்பட்ட விவசாயிகள் மற்றும் நில உரிமையாளர்களின் பக்கமும் தமிழ்நாடு காங்கிரஸ் கமிட்டி உறுதியாக நிற்கும் என மாணிக்கம் தாகூர் தெரிவித்துள்ளார்.

அவர்களின் நிலம் தொடர்பான அரசின் நிலைப்பாட்டை 3 மாதங்களுக்குள் தெளிவுபடுத்த வேண்டும் என்றும், இன்னும் வழங்கப்பட வேண்டிய சுமார் 30 சதவீத இழப்பீட்டுத் தொகையை உடனடியாக வழங்க வேண்டும் என்றும் அவர் வலியுறுத்தியுள்ளார்.

மேலும், பாதிக்கப்பட்ட பகுதிகளில் அடிப்படை குடிமை வசதிகளை மீண்டும் ஏற்படுத்துவதுடன், எதிர்காலத்தில் சென்னையின் இரண்டாவது விமான நிலையத்துக்கு எந்தப் பகுதி தேர்வு செய்யப்பட்டாலும், அங்கு வசிக்கும் மக்களுடன் வெளிப்படையான மற்றும் உண்மையான ஆலோசனை நடத்தப்பட வேண்டும் எனவும் அவர் கேட்டுக்கொண்டுள்ளார்.

சென்னைக்கு கூடுதல் விமானப் போக்குவரத்து வசதி தேவை என்பது மறுக்க முடியாத உண்மை. ஆனால், நகரத்தின் வளர்ச்சிக்காக ஒரு சமூகத்தின் நிலம், நீர், வாழ்வாதாரம் மற்றும் கண்ணியத்தை அவர்களின் உண்மையான ஒப்புதல் இல்லாமல் பலிகொடுக்கக்கூடாது என்பதே தங்களது நிலைப்பாடு என மாணிக்கம் தாகூர் தெரிவித்துள்ளார்.இவ்வாறு அவர் தனது அறிக்கையில் தெரிவித்துள்ளார்.