பாலிவுட்டின் பிரபல நட்சத்திர தம்பதியான கரீனா கபூர் மற்றும் சயீஃப் அலிகான், அண்மையில் தங்களது குழந்தைகளுடன் வெளிநாட்டுப் பயணத்தை முடித்துக்கொண்டு மும்பை திரும்பினர்.இதற்கிடையே, கரீனா கபூர் 3-வது முறையாக கர்ப்பமாக இருப்பதாக சமூக வலைதளங்களிலும் இணையதளங்களிலும் தகவல்கள் வேகமாக பரவின.

இந்தச் செய்தி ரசிகர்கள் மத்தியில் பெரும் பரபரப்பை ஏற்படுத்திய நிலையில், அது உண்மையல்ல என்று கரீனாவின் குடும்பத்தினரும், மேலாண்மைக் குழுவினரும் தெளிவுபடுத்தியுள்ளனர்.

சில நாட்களுக்கு முன்பு கரீனா கபூர் மும்பையில் உள்ள உடற்பயிற்சி நிலையத்துக்குச் சென்றுவிட்டு வெளியே வந்தார். அப்போது அவரைச் சுற்றி புகைப்படக் கலைஞர்கள் அதிகளவில் இருந்ததால், அவரது பாதுகாவலர்களும் குழுவினரும் குடையைப் பிடித்தபடி அவரை அழைத்துச் சென்றனர்.

அந்த நேரத்தில் எடுக்கப்பட்ட காணொளியில், கரீனா அணிந்திருந்த உடையில் அவரது வயிற்றுப் பகுதி சற்று பெரிதாகத் தெரிந்ததாக கூறப்படுகிறது. இதனை அடிப்படையாகக் கொண்டு, அவர் கர்ப்பமாக இருப்பதாக சமூக வலைதளங்களில் பலரும் தங்களது கருத்துகளை பதிவிடத் தொடங்கினர்.

மேலும், குடை பிடித்து அவரை மறைத்ததற்கு காரணம், கரீனாவின் கர்ப்பத்தை மறைப்பதற்காகத்தான் என்றும் சிலர் தகவல்களைப் பரப்பினர்.வதந்தி வேகமாக பரவிய நிலையில், கரீனா கபூருக்கு நெருக்கமானவர்கள் மற்றும் அவரது மேலாண்மைக் குழுவினர் இதற்கு மறுப்பு தெரிவித்துள்ளனர்.

கரீனா கபூர் கர்ப்பமாக இல்லை என்றும், இணையத்தில் பரவி வரும் தகவல்கள் முற்றிலும் தவறானவை என்றும் அவர்கள் திட்டவட்டமாக தெரிவித்துள்ளனர்.விடுமுறைப் பயணத்தின்போது விரும்பிய உணவுகளை சாப்பிட்டதால் வயிற்றுப் பகுதி சற்று பெரிதாகத் தெரிந்திருக்கலாம் என்றும் அவர்கள் நகைச்சுவையுடன் விளக்கம் அளித்துள்ளனர்.

சயீஃப் அலிகானின் சகோதரி சபா பட்டோடியும் இந்த வதந்திக்கு எதிர்ப்பு தெரிவித்து, கரீனாவை அவரது போக்கில் வாழவிட வேண்டும் என்ற கருத்தை தெரிவித்துள்ளார்.இந்த விவகாரம் குறித்து கரீனா கபூர் நேரடியாக நீண்ட விளக்கம் எதையும் அளிக்காமல், சமூக வலைதளத்தில் சுவாரசியமான முறையில் பதிலளித்துள்ளார்.

அவரது சிகை அலங்காரக் கலைஞர் மிடேஷ் ரஜானி, கரீனாவின் வயிற்றுப் பகுதியை பிடித்தபடி இருக்கும் புகைப்படத்தை அவர் மீண்டும் பகிர்ந்துள்ளார். அதனுடன் சிரிப்பு மற்றும் உணவு தொடர்பான குறியீடுகளையும் இணைத்துள்ளார்.இதன் மூலம், பரவி வரும் கர்ப்ப வதந்திக்கு பதிலாக அது வெறும் உணவால் ஏற்பட்ட வயிற்றுப் பெருக்கமே என்பதை நகைச்சுவையாக உணர்த்தியுள்ளார்.

கரீனா கபூர் மற்றும் சயீஃப் அலிகானுக்கு ஏற்கனவே தைமூர் மற்றும் ஜே ஆகிய இரு மகன்கள் உள்ளனர்.மேலும் குழந்தை பெற்றுக்கொள்ளும் திட்டம் இல்லை என்பதை கரீனா கபூர் ஏற்கனவே அளித்திருந்த பேட்டிகளில் தெளிவாக தெரிவித்திருந்தார்.

இந்த நிலையில், 3-வது முறையாக அவர் கர்ப்பமாக இருப்பதாக பரவிய தகவல் தற்போது மறுக்கப்பட்டுள்ளது.கரீனாவின் ஒரு புகைப்படமும், அதில் தெரிந்த சிறிய மாற்றமும் இணையத்தில் பெரும் பேசுபொருளாக மாறிய நிலையில், இறுதியில் அவரே நகைச்சுவையான பதிவின் மூலம் அந்த வதந்திக்கு முற்றுப்புள்ளி வைத்துள்ளார்.