தமிழக சட்டசபையில், 2026–2027ஆம் ஆண்டுக்கான தமிழ்நாடு அரசின் இடைக்கால நிதிநிலை அறிக்கையை நிதித்துறை அமைச்சர் தங்கம் தென்னரசு தாக்கல் செய்து, பல்வேறு மக்கள் நலத் திட்டங்களுக்கு முன்னுரிமை வழங்கப்பட்ட விரிவான நிதி ஒதுக்கீடுகளை அறிவித்தார்.

வளர்ச்சி, நலன் மற்றும் பாதுகாப்பு ஆகிய மூன்றையும் மையமாகக் கொண்டு வடிவமைக்கப்பட்ட இந்த பட்ஜெட்டின் முக்கிய அம்சங்கள் பின்வருமாறு:பால் பண்ணைகள் நவீனமயமாக்க ரூ.758 கோடி ஒதுக்கப்பட்டுள்ளதுடன், கைத்தறி மற்றும் கதர் தொழில்துறையை வலுப்படுத்த ரூ.1,943 கோடி வழங்கப்பட்டுள்ளது.

இலவச வேட்டி–சேலைத் திட்டத்திற்கு ரூ.612 கோடி ஒதுக்கீடு செய்யப்பட்டுள்ளதோடு, வீட்டுவசதி மற்றும் நகர்ப்புற மேம்பாட்டுத் திட்டங்களுக்கு ரூ.7,547 கோடி நிதி நிர்ணயிக்கப்பட்டுள்ளது. பொதுப்பணித்துறைக்கு ரூ.1,694 கோடி வழங்கப்பட்டுள்ளதுடன், உறுதியளிக்கப்பட்ட ஓய்வூதியத் திட்டத்திற்காக ரூ.11,000 கோடி பெரும் தொகை ஒதுக்கப்பட்டுள்ளது.

மத்திய அரசின் நிதி பற்றாக்குறையிலும் ஆசிரியர்கள் மற்றும் அரசு ஊழியர்களின் நலன் பாதுகாக்கப்பட்டு வருவதாகவும், அரசு பணியில் உயிரிழக்கும் ஊழியர்களின் குடும்பத்திற்கு ரூ.1 கோடி நிவாரணம் வழங்கப்படும் என்றும் அறிவிக்கப்பட்டுள்ளது. ஈட்டிய விடுப்பை பணமாக மாற்றிக் கொள்ளும் திட்டமும் தொடர்ந்து செயல்படுத்தப்படுகிறது.

சட்டம்–ஒழுங்கு துறையில், தமிழ்நாடு அமைதியான மாநிலமாக திகழ்வதை வலியுறுத்தி, கடந்த ஐந்து ஆண்டுகளில் 43 புதிய காவல் நிலையங்கள் தொடங்கப்பட்டுள்ளன. ‘மக்களுடன் முதல்வர்’ திட்டத்தின் கீழ் 23.50 லட்சம் மனுக்கள் தீர்க்கப்பட்டுள்ளன. மேலும், 17,318 புதிய காவலர்கள் பணியில் அமர்த்தப்பட்டுள்ளனர்.

போதைப்பொருள் தடுப்பில் கடுமையான சட்ட நடவடிக்கைகள் மேற்கொள்ளப்பட்டு, 4 லட்சம் மாணவர்கள் விழிப்புணர்வு தூதுவர்களாகப் பயிற்சி பெற்றுள்ளனர். பள்ளி, கல்லூரிகளில் 17,000 போதைப்பொருள் எதிர்ப்பு மன்றங்கள் செயல்படுகின்றன.

தொழில்துறையில், மின்னணு பொருட்கள் ஏற்றுமதியில் 41.23% பங்களிப்புடன் தமிழ்நாடு நாட்டில் முதலிடத்தை பிடித்துள்ளது. உள்துறை மற்றும் மதுவிலக்கு–ஆயத்தீர்வைத்துறைகளுக்காக ரூ.17,111 கோடி ஒதுக்கீடு செய்யப்பட்டுள்ளதும் குறிப்பிடத்தக்கது.

மொத்தத்தில், மக்கள் நலன், தொழில் வளர்ச்சி, பாதுகாப்பு மற்றும் சமூக முன்னேற்றம் ஆகியவற்றை ஒருங்கிணைக்கும் வகையில் இந்த இடைக்கால பட்ஜெட் வடிவமைக்கப்பட்டுள்ளது.