தமிழக அரசியலில் கடந்த சில நாட்களாக நீடித்த பரபரப்புக்கு முக்கிய திருப்பமாக, நடிகர் விஜய் தலைமையிலான தமிழக வெற்றிக் கழகம் (தவெக) தற்போது பெரும்பான்மை எண்ணிக்கையை எட்டியுள்ளதாக தகவல்கள் வெளியாகியுள்ளன. இதன் மூலம் தமிழகத்தின் அடுத்த முதல்வராக விஜய் பதவியேற்கும் சூழல் உறுதியடைந்துள்ளது.

2026 சட்டமன்றத் தேர்தலில் 108 இடங்களில் வெற்றி பெற்று தனிப்பெரும் கட்சியாக உருவெடுத்த தவெக, தனிப்பெரும்பான்மைக்கு தேவையான 118 இடங்களை எட்டாததால் ஆரம்பத்தில் ஆட்சியமைப்பதில் சிக்கல் ஏற்பட்டது.

இதையடுத்து, விஜய் பல்வேறு கட்சிகளின் ஆதரவை நாடினார். முதற்கட்டமாக திமுக கூட்டணியில் இருந்த காங்கிரஸ் கட்சி தனது 5 எம்.எல்.ஏக்களின் ஆதரவை வழங்கியதாக தகவல்கள் வெளியானது. இதன் மூலம் தவெகின் பலம் 113 ஆக உயர்ந்தது.

ஆனால் அதுவே போதுமானதாக இல்லாததால், மீதமுள்ள ஆதரவுக்காக விஜய் இடதுசாரி கட்சிகள், விடுதலை சிறுத்தைகள் கட்சி (விசிக), இந்திய யூனியன் முஸ்லீம் லீக் ஆகியவற்றுடன் தீவிர பேச்சுவார்த்தை நடத்தினார்.

இந்த நிலையில், இடதுசாரி கட்சிகள் மற்றும் விசிக முடிவெடுப்பதில் தாமதம் ஏற்பட்டதால் அரசியல் பரபரப்பு மேலும் அதிகரித்தது. ஒருபுறம் திமுகவும் தங்களது கூட்டணியை தக்க வைத்துக்கொள்ள முயன்றதாக அரசியல் வட்டாரங்களில் தகவல்கள் பரவின.

இதற்கிடையே அதிமுகவும் அரசியல் நகர்வுகளை தீவிரப்படுத்தியது. புதுச்சேரியில் எம்.எல்.ஏக்களுடன் எடப்பாடி பழனிசாமி நடத்திய ஆலோசனையும் அரசியல் கணக்குகளை மாற்றக்கூடும் என பேசப்பட்டது.

ஆனால் இறுதியில், அகில இந்திய காங்கிரஸ் தலைவர் மல்லிகார்ஜுன கார்கே மற்றும் ராகுல் காந்தி நேரடியாக தலையிட்டதே இந்த நிலையை மாற்றிய முக்கிய காரணமாக பார்க்கப்படுகிறது.

காங்கிரஸ் தரப்பில் கார்கே, விசிக தலைவர் தொல். திருமாவளவனை தொடர்புகொண்டு பேசியதாகவும், அதேபோல் கம்யூனிஸ்ட் கட்சித் தலைவர்களுடனும் ஆலோசனை நடத்தியதாக தகவல்கள் வெளியாகியுள்ளன.

அதன் பின்னரே இடதுசாரிகள் தவெகவுக்கு ஆதரவு அளிக்க சம்மதித்ததாக கூறப்படுகிறது. விசிகவும் இந்திய யூனியன் முஸ்லீம் லீக்கும் ஆதரவு தெரிவிக்கத் தயாராக இருப்பதாக தகவல்கள் வெளியாகியுள்ளன.

இதன் மூலம் தவெக 118 என்ற பெரும்பான்மை எண்ணிக்கையை கடந்துள்ளதாக கூறப்படுகிறது. ஆளுநர் அழைப்பைத் தொடர்ந்து விஜய் விரைவில் ஆட்சியமைக்கும் நடவடிக்கைகள் தொடங்கலாம் என எதிர்பார்க்கப்படுகிறது.

தமிழக அரசியலில் இது மிகப்பெரிய மாற்றமாக பார்க்கப்படுகிறது. பல தசாப்தங்களாக திராவிடக் கட்சிகள் மாறி மாறி ஆட்சி அமைத்த நிலையில், புதிய அரசியல் சக்தியாக தவெக உருவெடுத்து ஆட்சியை பிடிக்கும் நிலை உருவாகியுள்ளது.

அடுத்த சில நாட்களில் நடைபெறவுள்ள பதவியேற்பு விழா மற்றும் அமைச்சரவை அமைப்பு தமிழக அரசியலின் புதிய அத்தியாயமாக அமையும் என அரசியல் வட்டாரங்கள் மதிப்பிடுகின்றன.