சாதி–மதம் கடந்து சமத்துவம் பேசும் அரசியலமைப்பு...! ஆதவ் அர்ஜுனாவின் உறுதிமொழி...!

இந்திய அரசியலமைப்பு தினக் கொண்டாட்டத்தை முன்னிட்டு, தமிழக வெற்றிக்கழகத்தின் தேர்தல் பிரசார மேலாண்மைப் பொதுச்செயலாளர் ஆதவ் அர்ஜுனா தனது எக்ஸ் தள பதிவில் வெளியிட்டுள்ள செய்தியில், இந்திய குடிமக்கள் சாதி, மதம், இனம், பாலினம் போன்ற எந்தவித பாகுபாடுகளுக்கும் இடமில்லாமல் “அனைவரும் சமம்” என்ற கருத்தை வலியுறுத்தியுள்ளார்.

அவர் குறிப்பிட்டதாவது, “இந்திய மக்களாகிய நாம்” என தொடங்கும் அரசியலமைப்பின் முதல் வரிகள் நமது ஒற்றுமை, அனைவருக்குமான பிரதிநிதித்துவம், கூட்டுறவு வாழ்க்கை போன்ற முக்கியக் குணாதிசயங்களை எடுத்துக்காட்டுகின்றன. நீதி, சுதந்திரம், சமத்துவம், சகோதரத்துவம் ஆகிய பொன்விதிகள் இந்தியத் தேசத்தின் சிறப்பை பிரதிபலிக்கின்றன.

அதனால், இந்திய ஜனநாயகத்தின் அடையாளமாகவும், மதச்சார்பின்மையின் ஓர் வெளிப்பாடாகவும் உள்ள அரசியலமைப்பு சட்டத்தை இன்று, அரசியலமைப்பு தினத்தில், நாம் பாதுகாக்கும் உறுதியை மீண்டும் உறுதிப்படுத்துகிறோம்.