தே.மு.தி.க. பொதுச்செயலாளர் பிரேமலதா விஜயகாந்த், தமிழகத்தின் வடக்குக் கோட்டையான சென்னை முதல் தெற்குத் தொடுப்பான கன்னியாகுமரி வரை, “உள்ளம் தேடி – இல்லம் நாடி” என்ற பெயரில் கேப்டன் ரத யாத்திரையை உற்சாகமாக முன்னெடுத்து வருகிறார். மக்கள் மனங்களை நேரில் தொடும் இந்த பயணம் நேற்று கன்னியாகுமரி அருகிலுள்ள கொட்டாரம் சந்திப்பை வந்தடைந்து நிறைவு கட்டத்தை எட்டியது.

அங்கு நடைபெற்ற பொதுக்கூட்டத்தில் பேசும்போது, இந்த ரத யாத்திரை மக்களிடையே மிகப்பெரிய வரவேற்பைப் பெற்றதாகவும், இதன் மூலம் கட்சிக்கு புதிய எழுச்சியும் நம்பிக்கையும் உருவாகியுள்ளதாகவும் அவர் தெரிவித்தார்.

கல்வியறிவு மிகுந்த மாவட்டமாக கன்னியாகுமரி திகழ்கிறது என்றும், வரலாற்றுச் சிறப்புமிக்க குமரி கண்டமும், தமிழ்மொழியின் தொட்டிலும் இந்த மண்ணே என பெருமையாகக் குறிப்பிட்டார்.

மேலும், ஆட்சியில் இருப்பவர்களுக்கும், ஆண்ட கட்சிக்கும் சவாலாக தே.மு.தி.க. உருவெடுத்துள்ளதாக கூறிய அவர், 2026 சட்டமன்றத் தேர்தலில் தே.மு.தி.க. இடம்பெறும் கூட்டணியே பெரும் வெற்றியைப் பெறும் என உறுதிபட தெரிவித்தார்.

கூட்டணி தொடர்பான முக்கிய அறிவிப்பை பிப்ரவரி 3-ஆம் தேதி சென்னையில் வெளியிடப் போவதாகவும் கூறினார்.சர்வதேச சுற்றுலா மையமாக விளங்கும் கன்னியாகுமரியை மேலும் மேம்படுத்த நடவடிக்கை எடுக்கப்படும் என்றும், தே.மு.தி.க. ஆட்சிக்கு வந்தால் சுற்றுலா கட்டமைப்புகள் விரிவுபடுத்தப்படும் என்றும் உறுதியளித்தார்.

தோவாளை மலர் சந்தையில் சென்ட் தொழிற்சாலை அமைத்து மலர் விவசாயிகளுக்கு ஆதரவு வழங்கப்படும், மீனவர்களின் நீண்டகால கோரிக்கைகள் நிறைவேற்றப்படும், இலங்கை கடற்படை தாக்குதலிலிருந்து அவர்களுக்கு பாதுகாப்பு உறுதி செய்யப்படும் என்றார்.

அதேபோல், கனிம வளக் கொள்ளையைத் தடுக்கும் கடுமையான நடவடிக்கைகள் எடுக்கப்படும் என்றும், மயிலாடியில் கல் சிற்ப பூங்கா உருவாக்கப்படும், சுசீந்திரத்தில் தடுப்பணை கட்டப்படும் என பல்வேறு வளர்ச்சி திட்டங்களையும் அவர் அறிவித்தார்.