கரூர் வேலுச்சாமிபுரத்தில் கடந்த 27ஆம் தேதி நடைபெற்ற தமிழக வெற்றிக்கழக தலைவர் விஜய்யின் பிரசார கூட்டம், துயரத்தின் மேகமாக மாறியது.அந்த கூட்ட நெரிசலில் சிக்கி 41 பேர் உயிரிழந்து, 100-க்கும் மேற்பட்டோர் காயமடைந்தனர். இந்த சம்பவம் நாட்டையே அதிர்ச்சியில் ஆழ்த்தியது.

இந்த பேரழிவின் உண்மையான காரணம் என்ன? என்பதை வெளிக்கொணர, ஓய்வு பெற்ற நீதிபதி அருணா ஜெகதீசன் தலைமையில் ஒரு நபர் ஆணையம் அமைக்கப்பட்டது.அந்த ஆணையம் 3 மாதங்களுக்குள் விசாரணை அறிக்கையை சமர்ப்பிக்க தமிழக அரசு உத்தரவிட்டுள்ளது.

இதனிடையே, கரூர் காவலர்கள் த.வெ.க. நிர்வாகிகள் மீது வழக்குப் பதிவு செய்து இருவரை கைது செய்தனர்.இது அரசியல் வட்டாரங்களில் புதிய பரபரப்பை ஏற்படுத்தியுள்ளது.அதன் பிறகு, இந்த வழக்கு சென்னை உயர்நீதிமன்றத்தில் நீதிபதி செந்தில்குமார் முன்னிலையில் விசாரணைக்கு வந்தது.

அப்போது நீதிபதி, கரூர் கூட்ட நெரிசல் சம்பவத்தை சீராகவும், முழுமையாகவும் விசாரிக்க வடக்கு மண்டல ஐ.ஜி. அஸ்ரா கர்க் தலைமையில் சிறப்பு புலனாய்வு குழு (SIT) அமைக்க உத்தரவிட்டார்.மேலும், கரூர் காவலர்கள் கையிலுள்ள அனைத்து ஆவணங்களும் உடனடியாக SIT-க்கு ஒப்படைக்கப்பட வேண்டும் எனவும் நீதிமன்றம் கடுமையாக உத்தரவிட்டது.

அதனைத் தொடர்ந்து, ஐ.ஜி. அஸ்ரா கர்க் தலைமையிலான சிறப்பு புலனாய்வு குழு கரூருக்கு நேரடியாக வருகை தந்து சம்பவ இடத்தை பார்வையிட்டு, 3 பிரிவுகளாக அதிகாரிகள் குழு அமைத்து தீவிர விசாரணை மேற்கொண்டு வருகிறது.ஆனால், இந்நிலையில் புதிய திருப்பமாக, சிறப்பு புலனாய்வு குழுவின் விசாரணைக்கு தடை கோரி, தமிழக வெற்றிக்கழகம் (த.வெ.க.) சார்பில் மேல்முறையீடு செய்யப்பட்டுள்ளது.

அதிலும் முக்கியமாக, சிறப்புக்குழு விசாரணைக்கு சென்னை உயர்நீதிமன்றம் அளித்த உத்தரவுக்கு எதிராக, த.வெ.க. தற்போது உச்சநீதிமன்றத்தை நாடியுள்ளது.இது வழக்கில் புதிய சட்ட மாறுபாட்டை ஏற்படுத்தி, கரூர் துயரச் சம்பவம் மீண்டும் தேசிய கவனத்தை ஈர்த்துள்ளது