தமிழ்நாட்டில் காலியாக உள்ள மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் களம் தீவிரமடைந்துள்ள நிலையில், அம்மா மக்கள் முன்னேற்றக் கழகத்தின் (அமமுக) பொதுச்செயலாளர் டி.டி.வி. தினகரன் ஒரு முக்கியமான அரசியல் அறிவிப்பை வெளியிட்டுள்ளார். அதன்படி, வரும் அக்டோபர் 6-ஆம் தேதி நடைபெறவுள்ள இடைத்தேர்தலில் களமிறங்கும் அனைத்து இந்திய அண்ணா திராவிட முன்னேற்றக் கழகத்தின் (அதிமுக) வேட்பாளர்களுக்கு அமமுக முழுமையான ஆதரவை வழங்கும் எனத் தெரிவித்துள்ளார்.

மதுராந்தகம் (தனி) மற்றும் தாராபுரம் (தனி) ஆகிய இரு தொகுதிகளிலும் ஆளுங்கட்சியான தமிழக வெற்றிக் கழகத்தின் (தவெக) கூட்டணி வேட்பாளர்களும், பிரதான எதிர்க்கட்சியான திமுக வேட்பாளர்களும் தீவிரப் பிரச்சாரத்திற்குத் தயாராகி வருகின்றனர். இந்நீலையில், எதிர்க்கட்சி வாக்குகளை ஒருங்கிணைக்கவும், களத்தில் அதிமுகவிற்கு கூடுதல் பலம் சேர்க்கும் நோக்கோடும் இத்தகைய முடிவை அமமுக தலைமை எடுத்துள்ளதாக அரசியல் வட்டாரங்கள் தெரிவிக்கின்றன.

இதுதொடர்பாக வெளியிடப்பட்டுள்ள அறிவிப்பில், மதுராந்தகம் மற்றும் தாராபுரம் தொகுதிகளில் போட்டியிடும் அதிமுக வேட்பாளர்களின் வெற்றியை உறுதி செய்யும் பொருட்டு, அமமுகவின் மாவட்ட, ஒன்றிய, நகர மற்றும் கிளைக் கழக நிர்வாகிகள் மற்றும் தொண்டர்கள் அனைவரும் அதிமுகவினருடன் இணைந்து ஒருங்கிணைந்து தீவிரக் களப்பணியாற்ற வேண்டும் என்று டி.டி.வி. தினகரன் கேட்டுக்கொண்டுள்ளார். வேட்புமனுத் தாக்கல் தொடங்கி தேர்தல் களம் சூடுபிடித்துள்ள இந்தச் சூழலில், அமமுகவின் இந்த ஆதரவு அறிவிப்பு அதிமுக முகாமிற்கு பெரும் உற்சாகத்தை அளித்துள்ளது.

ஏற்கெனவே திமுக மற்றும் தவெக கூட்டணி இடையே கடுமையான போட்டி நிலவி வரும் சூழலில், அமமுகவின் இந்த ஆதரவு முடிவு தேர்தல் கணிப்புகளில் முக்கிய மாற்றத்தை ஏற்படுத்தும் என எதிர்பார்க்கப்படுகிறது. இதன் மூலம் மதுராந்தகம் மற்றும் தாராபுரம் தொகுதிகளில் இடைத்தேர்தல் களம் மும்முனைப் போட்டியாக உருவெடுத்து, அரசியல் சூட்டை மேலும் அதிகரித்துள்ளது.