சட்டசபையில் விவசாயிகள் மற்றும் கறிக்கோழி வளர்ப்பாளர்களின் வாழ்வாதாரப் பிரச்சனைகள் குறித்துப் பேச அனுமதி மறுக்கப்பட்டதால், எதிர்க்கட்சித் தலைவர் எடப்பாடி பழனிசாமி தலைமையில் அதிமுக எம்.எல்.ஏக்கள் இன்று வெளிநடப்பு செய்தனர்.

செய்தியாளர் சந்திப்பில் எடப்பாடியார் முன்வைத்த முக்கியக் குற்றச்சாட்டுகள்:

கறிக்கோழி விவசாயிகள் பாதிப்பு: சுமார் 5 லட்சம் கறிக்கோழி வளர்ப்பாளர்கள் கிலோவுக்கு வெறும் ₹6.50 மட்டுமே கூலியாகப் பெற்றுப் பெரும் பாதிப்பைச் சந்தித்து வருகின்றனர். இவர்களுக்கு ஆதரவாகச் செயல்படாமல், கறிக்கோழி வாங்கும் பெரிய நிறுவனங்களுக்குச் சாதகமாகத் தமிழக அரசு நடந்துகொள்வது கண்டிக்கத்தக்கது.

அவை மரபு மீறல்: அவசர கால முக்கியத்துவம் வாய்ந்த 'ஜீரோ ஹவர்' நேரத்தில் எதிர்க்கட்சித் தலைவரைப் பேச அனுமதிக்காதது ஜனநாயக விரோதமானது.

மடிக்கணினி அரசியல்: கடந்த சில ஆண்டுகளாக மாணவர்களுக்கான இலவச மடிக்கணினி திட்டத்தை நிறுத்தி வைத்திருந்த திமுக அரசு, தற்போது தேர்தல் நெருங்குவதால் மாணவர்கள் மத்தியில் உள்ள வெறுப்பைச் சமாளிக்க மீண்டும் மடிக்கணினிகளை வழங்குகிறது.

திட்டங்கள் காப்பி: மகளிருக்கு மாதம் ₹1500 வழங்கும் 'குலவிளக்கு' திட்டத்தை 2021-லேயே அதிமுக அறிவித்துவிட்டது. திமுக எப்போதும் அதிமுக-வின் தேர்தல் அறிக்கைகளையே பின்பற்றி வருகிறது.

கடந்த 6 மாதங்களாகப் போராடி வரும் விவசாயிகளுடன் பேச்சுவார்த்தை நடத்துவதாகக் கூறிவிட்டு, தற்போது அரசு பின்வாங்குவது ஏன் என இபிஎஸ் கேள்வி எழுப்பியுள்ளார். மாணவர்கள் மற்றும் விவசாயிகளின் வாக்குகளைக் கவரவே இத்தகைய கண்துடைப்பு நடவடிக்கைகளில் திமுக ஈடுபட்டுள்ளதாக அவர் சாடினார்.