புதுக்கோட்டையில் தூய்மைப் பணியாளர்களுக்குக் காலை உணவு வழங்கும் திட்டத்தைத் தொடங்கி வைத்த பின் செய்தியாளர்களிடம் பேசிய சட்டத்துறை அமைச்சர் ரகுபதி, எதிர்க்கட்சிகள் மற்றும் கூட்டணி விவகாரங்கள் குறித்துப் பல்வேறு அதிரடி விமர்சனங்களை முன்வைத்தார்.

விஜய் மற்றும் எடப்பாடிக்கு பதிலடி:
வாக்கு வங்கி மாயை: தவெக-வுக்கு 42% வாக்கு இருப்பதாகக் கூறுவது நகைப்புக்குரியது. அது 24% இருந்தாலே பெரிய விஷயம். செங்கோட்டையனுக்கு அரசியல் புள்ளிவிவரங்களை விட 'டூர்' போடத்தான் நன்றாகத் தெரியும்.

கனவுலகில் இபிஎஸ்: திமுக - காங்கிரஸ் கூட்டணி உடைய வேண்டும் என்பது எடப்பாடியின் வீண் எதிர்பார்ப்பு. அவர் எப்போதும் கனவு கண்டு கொண்டிருப்பவர். அவரது பொய் வாக்குறுதிகளை மக்கள் நம்ப மாட்டார்கள்.

பிரதமர் மோடியின் இரட்டை நிலை:
பிரதமர் மோடி மலேசியாவிற்குச் சென்றால் தமிழைப் புகழ்வார். ஆனால் ஒடிசா மற்றும் பீகாருக்குச் சென்றால் அரசியல் ஆதாயத்திற்காகத் தமிழர்களை 'திருடன்' என விமர்சிப்பார். இது அவரது இரட்டை வேடத்தையே காட்டுகிறது எனச் சாடினார்.

கூட்டணி மற்றும் அதிகாரம்:
பொருளாதாரப் பார்வை: அன்புமணி ராமதாஸ் பொருளாதார மேதை அல்ல. இந்தியப் பொருளாதாரத்தை உயர்த்துவதில் தமிழகத்தின் திராவிட மாடல் ஆட்சியே முதன்மையாக உள்ளது.

ஆட்சியில் பங்கு: ஆட்சியில் பங்கு கேட்க அனைவருக்கும் உரிமை உண்டு; அதைக் கொடுக்கும் இடத்தில் முதல்வர் ஸ்டாலின் இருக்கிறார்.

அடிமை அரசியல்: திமுக யாரையும் அடிமையாக நடத்துவதில்லை. எடப்பாடி பழனிசாமி தான் அடிமையாக இருக்கிறார், ஆதவ் அர்ஜுனா விஜய்யின் அடிமையாக இருக்கிறார். இவர்களின் பேச்சுக்குப் பதில் சொல்ல வேண்டிய அவசியம் இல்லை.

"சரியான நேரத்தில் கூட்டணிப் பேச்சுவார்த்தைக் குழு அமைக்கப்படும்; முதல்வரின் வியூகத்தில் எந்தப் பிசுபிசுப்பும் இருக்காது" என ரகுபதி உறுதிபடத் தெரிவித்தார்.