தாராபுரம் சட்டமன்றத் தொகுதியில் அதிமுக மற்றும் திமுக இடையே கடுமையான போட்டி நிலவி வருவதாக ‘ஒன்இந்தியா தமிழ்’ மேற்கொண்ட முதல் நாள் கள ஆய்வில் தெரியவந்துள்ளதாக அந்த ஊடகம் தெரிவித்துள்ளது. ஆளும் கட்சியான தமிழக வெற்றிக் கழகம் பெரும்பாலான வாக்காளர்களால் மூன்றாவது தேர்வாகவே பார்க்கப்படுவதாகவும் கள ஆய்வில் தெரியவந்துள்ளதாக கூறப்பட்டுள்ளது.

தாராபுரம் மற்றும் மதுராந்தகம் தொகுதிகளுக்கான இடைத்தேர்தல் வரும் 6ஆம் தேதி நடைபெற உள்ள நிலையில், 9ஆம் தேதி வாக்கு எண்ணிக்கை நடைபெறுகிறது. இதையொட்டி இரு தொகுதிகளிலும் ‘ஒன்இந்தியா தமிழ்’ சார்பில் கள ஆய்வு மேற்கொள்ளப்பட்டு வருகிறது. ஏற்கனவே மதுராந்தகம் தொகுதியில் பல்வேறு கிராமங்கள் மற்றும் நகர்ப்புற பகுதிகளில் மேற்கொள்ளப்பட்ட ஆய்வில், இளம் பெண்கள் மத்தியில் தவெகவுக்கு ஆதரவு இருப்பதாகவும், ஆண்கள் மத்தியில் அதிமுகவுக்கும் அதற்கு அடுத்தபடியாக திமுகவுக்கும் ஆதரவு காணப்பட்டதாகவும் அந்த ஊடகம் செய்தி வெளியிட்டிருந்தது.

இந்நிலையில், தாராபுரம் தொகுதியில் நடைபெற்ற முதல் நாள் கள ஆய்வில் அதிமுக–திமுக இடையே நேரடி போட்டி நிலவுவதாகத் தெரியவந்துள்ளதாக கூறப்பட்டுள்ளது. தவெகவுக்கு வாக்களிப்போம் என்று கூறியவர்கள் குறைந்த எண்ணிக்கையிலேயே இருந்ததாகவும் அந்த ஆய்வில் தெரிவிக்கப்பட்டுள்ளது.

குறிப்பாக, சட்டமன்றத் தேர்தலில் அதிமுக சார்பில் வெற்றி பெற்ற சத்யபாமா, பின்னர் தனது பதவியை ராஜினாமா செய்துவிட்டு தவெகவில் இணைந்து இடைத்தேர்தலில் மீண்டும் அதே தொகுதியில் போட்டியிடுவது குறித்து சில வாக்காளர்கள் அதிருப்தி தெரிவித்ததாகவும் கூறப்பட்டுள்ளது. கட்சி மாறிய விவகாரம் தாராபுரம் தொகுதி மக்களிடையே பேசுபொருளாக இருப்பதாகவும் கள ஆய்வு தகவல்கள் தெரிவிக்கின்றன.

அதேவேளை, இளம் பெண்கள் மற்றும் இளம் ஆண்களின் அரசியல் நிலைப்பாட்டை முழுமையாக அறிந்து கொள்ள முடியவில்லை என்றும் அந்த ஊடகம் குறிப்பிட்டுள்ளது. மதுராந்தகத்தை ஒப்பிடும்போது தாராபுரத்தில் இளம் தலைமுறையினர் ஊடகங்களிடம் தங்களது அரசியல் கருத்துகளை வெளிப்படையாகத் தெரிவிக்க தயக்கம் காட்டியதாகவும் தெரிவிக்கப்பட்டுள்ளது.

இதனால் தாராபுரம் தொகுதியில் இளைஞர்களின் மனநிலை என்ன என்பது இன்னும் தெளிவாகவில்லை என்றும், தொடர்ந்து கள ஆய்வு மேற்கொண்டு கூடுதல் தகவல்கள் சேகரிக்கப்படுவதாகவும் கூறப்பட்டுள்ளது. முதல்வர் விஜய் பங்கேற்ற பிரச்சாரத்துக்குப் பின்னர் வாக்காளர்களின் மனநிலையில் மாற்றம் ஏற்பட்டுள்ளதா என்பதையும் அடுத்தகட்ட கள ஆய்வில் தெரிந்து கொள்ள முடியும் என அந்த ஊடகம் தெரிவித்துள்ளது.

தாராபுரம் தொகுதியில் தமிழக வெற்றிக் கழகம் சார்பில் சத்யபாமாவும், திமுக சார்பில் சுகன்யாவும், அதிமுக சார்பில் பானுமதியும், இந்திய கம்யூனிஸ்ட் கட்சி சார்பில் லட்சுமணனும், நாம் தமிழர் கட்சி சார்பில் கார்த்திகாவும் போட்டியிடுகின்றனர். தேர்தலுக்கு இன்னும் சில நாட்களே உள்ள நிலையில், இறுதிக்கட்ட பிரச்சாரம் மற்றும் வாக்காளர்களின் மனநிலை மாற்றங்கள் தேர்தல் களத்தில் முக்கியத்துவம் பெற்றுள்ளன.