மனித குலத்துக்கு இயற்கை தந்த அரிய பொக்கிஷம் – அதுதான் இளநீர்.
சுத்தமானதும், சுவையானதுமான இந்த பானம், உடலுக்குத் தேவையான பல சத்துக்களையும் தன்னுள் கொண்டுள்ளது.

இளநீருக்கு பல்வேறு வகைகள் உள்ளன. செவ்விளநீர், பச்சை இளநீர், ரத்த சிவப்பு நிறம் கொண்ட இளநீர் என்று பல வித்தியாசங்கள் காணப்படுகின்றன. எப்படிப்பட்ட வகையாக இருந்தாலும், இளநீரில் மருத்துவ குணங்கள் நிறைந்தே உள்ளன.

உடலில் அளவுக்கு அதிகமாக இருக்கும் வாதம், பித்தம், கபம் ஆகியவற்றை தணிக்கச் சிறந்த மருந்து இளநீரே. வெப்பத்தை தணித்து, உடலில் குறையும் நீர்ச்சத்தை பூர்த்தி செய்கிறது. ஜீரண சக்தியை அதிகரிக்கிறது. சிறுநீரகத்தை சுத்திகரிக்கிறது. ஆண்களின் உடல்நலத்திற்கு தேவையான விந்து சக்தியையும் உயர்த்துகிறது.

மேலும், நீரிழிவு நோய், குடல் புழுக்கள், ஜீரணக் கோளாறுகள் ஆகியவற்றுக்கும் இளநீர் சிறந்த மருந்தாகக் கருதப்படுகிறது. குழந்தைகளுக்கே கூட, ஜீரணக்கோளாறால் அவதிப்படும் நேரங்களில் இளநீர் நன்மை தருகிறது.

உடலில் ஏற்படும் நீர் – உப்புப் பற்றாக்குறையை சரி செய்வதில் இளநீர் தனி இடம்பிடித்திருக்கிறது. அதில் உள்ள உப்புத்தன்மை மற்றும் வழுவழுப்பு தன்மை, காலரா நோயாளிகளுக்கு மிகவும் பயனுள்ளதாக இருக்கிறது.

இளநீரில் உள்ள ஆற்றல் வாய்ந்த கரிமச் சத்துக்கள், பல மருத்துவ அவசரநிலைகளில் கூட உதவக்கூடியவையாக இருக்கின்றன. மருத்துவர்கள் கூறுவதாவது – ரத்தத்தில் உள்ள பிளாஸ்மாவுக்கு மாற்றாக, சில அவசரநிலைகளில் இளநீரை நரம்பு மூலம் செலுத்த கூட இயலும். ரத்தத்தில் கலந்துள்ள நச்சுப் பொருள்களை அகற்றவும் இளநீர் பயனுள்ளதாக செயல்படுகிறது.

இளநீரில் சர்க்கரை சத்துடன் பல தாதுக்கள் நிறைந்து காணப்படுகின்றன. பொட்டாஷியம், சோடியம், கால்சியம், பாஸ்பரஸ், இரும்பு, செம்பு, கந்தகம், குளோரைடு என உடலுக்குத் தேவையான பல சத்துக்கள் இதில் அடங்கியுள்ளன.

அதுவும் மட்டும் அல்லாமல், இளநீரில் உள்ள புரதச் சத்து, தாய்ப்பாலின் புரதச்சத்துக்கு இணையானது என்பது குறிப்பிடத்தக்க விஷயம்.

ஆனால், இளநீர் குடிக்கும் முறையிலும் கவனம் அவசியம். வெறும் வயிற்றில் இளநீர் குடிக்கக் கூடாது. ஏனெனில் அதில் உள்ள அமிலத் தன்மை, வயிற்றில் புண் ஏற்படுத்தக் கூடியது. ஆகவே, ஏதாவது ஆகாரம் எடுத்த பின்னரே இளநீர் குடிக்க வேண்டும்.

இயற்கை தந்த இந்த பொக்கிஷமான இளநீரை, சரியான முறையில் குடித்தால் – அது உடலுக்கு ஒரு மருந்து, ஆரோக்கியத்திற்கு ஒரு காவலன் எனச் சொல்லலாம்.