விஜய் டிவியில் ஒளிபரப்பான பிக் பாஸ் நிகழ்ச்சியில் தெரு நாய்களுக்கு ஆதரவாக பேசியது காரணமாக சமூக வலைதளங்களில் கடுமையாக விமர்சிக்கப்பட்ட நடிகை அம்மு ராமச்சந்திரன், தற்போது மீண்டும் ரசிகர்கள் மத்தியில் பேசுபொருளாகியுள்ளார். ஆனால், இவரது வாழ்க்கை கதையை கேட்டால் யாரும் கண்கலங்காமல் இருக்க முடியாது.

1985 ஆம் ஆண்டு மே 26 அன்று சென்னையில் பிறந்த அம்மு, சிறு வயதிலேயே தந்தையை இழந்தார். தாய் ஒருவரே குடும்பத்தை நடத்தி, மூன்று குழந்தைகளையும் வளர்த்தார். சிறு வயதிலேயே தாய்க்கு துணையாக பல வேலைகள் செய்து வந்த அம்முவிற்கு, ஒரு நாள் ஜெயா டிவியில் தொகுப்பாளராக பணியாற்றும் வாய்ப்பு கிடைத்தது. பின்னர் சன் டிவியிலும் நிகழ்ச்சிகளை தொகுத்து வழங்கினார்.

ஒருபுறம் படிப்பும், மறுபுறம் வேலைகளும் என சமநிலைப்படுத்திய அம்முவிற்கு, இளமை பருவத்தில் காதல், சுற்றுலா, ஜாலியான வாழ்க்கை போன்ற அனுபவங்கள் கிடைக்கவே இல்லை. “நான் என் இளமையை குடும்பத்திற்காக தியாகம் செய்தேன்” என அவர் ஒரு பேட்டியில் மனம் பிழிந்திருந்தார்.

அதற்கிடையில் சினிமா வாய்ப்புகளும் அம்முவை தேடியது. தமிழ், மலையாளம் ஆகிய மொழிகளில் 25-க்கும் மேற்பட்ட படங்களில் நடித்தார். அதில் சரோஜா திரைப்படம் அவருக்கு பெரும் பிரேக்காக அமைந்தது. அதில் எஸ்.பி. சாரனின் மனைவியாக நடித்த அவர், மரியாதை, மந்திர புன்னகை, ஒரு மோதல் ஒரு காதல் போன்ற பல படங்களிலும், தொடர்களிலும் நடித்தார்.

மூத்த மகளாக இருந்ததால், குடும்பத்தின் பொறுப்பு முழுவதும் அவர்மீதே விழுந்தது. தம்பி, தங்கை இருவரையும் நன்றாக படிக்க வைத்து, அவர்களின் திருமணத்தையும் செய்து வைத்த அம்மு, தனது வாழ்க்கையை அவர்களுக்காகவே அர்ப்பணித்தார். இதனால், தனது திருமணத்தை பற்றிப் நினைப்பதற்கே நேரம் இல்லை என்று கூறியுள்ளார்.

“திருமணம் செய்யக்கூடாது என்கிற எண்ணம் எனக்கில்லை. ஒரு நல்ல வாழ்க்கை கிடைத்தால் நிச்சயம் திருமணம் செய்வேன். இல்லையெனில், மாற்றுத் திறனாளிகள், மூத்தோர் ஆகியோருக்கு சேவை செய்வேன். என் வாழ்க்கையை கடவுள் தான் வழிநடத்துவார்,” என்று அவர் நம்பிக்கையுடன் கூறியுள்ளார்.

அம்முவை திருமணம் செய்து கொள்ள விரும்பியவர்கள் பலர் இருந்தபோதும், “குடும்பமே முக்கியம்” என சொல்லி அவர்களை மறுத்துவிட்டார். தற்போது 40 வயதான அவர், திருமணமாகாத நிலையிலும் தனிமையை சமாளித்து வலிமையாக வாழ்ந்து வருகிறார்.

இன்றைய சமூக வலைதளங்களில் “இரண்டாம் தாரமாக வேண்டுமா” எனக் கேட்கும் சிலரின் நடத்தையால் வேதனைப்பட்டாலும், “என் வாழ்க்கை என் தேர்வு” என தைரியமாக கூறும் அம்மு, தனது Instagram பக்கத்தில் அடிக்கடி ஆன்மீகம், விரதம், கடவுள் பற்றிய பதிவுகளைப் பகிர்ந்து வருகிறார்.

தற்போது அவர் பல வெப் சீரிஸ்களுக்கு குரல் கொடுத்து, Storytelling app-களிலும் செயல்பட்டு வருகிறார். வாழ்க்கை முழுவதும் குடும்பத்திற்காக தன்னை அர்ப்பணித்த அவர், இன்றும் அதே உறுதியுடன் தனக்கான பாதையில் முன்னேறி வருகிறார்.