முக ஒப்பனையில் கண்கள், கன்னங்கள் எவ்வளவு முக்கியமோ, அதே அளவுக்கு உதடுகளின் அழகையும் மெருகேற்றுவது லிப் லைனர். வெறும் லிப்ஸ்டிக் மட்டும் பயன்படுத்தினால் சில நேரங்களில் உதடுகளின் இயற்கை வடிவம் தெளிவாகத் தெரியாமல் போகலாம். ஆனால், சரியான முறையில் லிப் லைனரைப் பயன்படுத்தினால் உதடுகள் செதுக்கப்பட்டதுபோல் நேர்த்தியாகவும், எடுப்பாகவும், கவர்ச்சிகரமாகவும் தோற்றமளிக்கும்.

முதலில் உதடுகளைத் தயார்படுத்துங்கள்
லிப் லைனர் பயன்படுத்துவதற்கு முன் உதடுகள் மென்மையாக இருப்பதை உறுதி செய்ய வேண்டும். வறண்ட தோல் அல்லது வெடிப்புகள் இருந்தால் கோடுகள் சீராக அமையாது. அதனால், சிறிதளவு சர்க்கரை மற்றும் தேன் கலந்து உதடுகளில் மெதுவாகத் தேய்த்து இறந்த தோல் செல்களை நீக்கலாம். பின்னர் ஈரப்பதமூட்டும் லிப் பாம் தடவி சில நிமிடங்கள் காத்திருந்தால் உதடுகள் மிருதுவாகி, லைனர் அழகாகப் பதியும்.

உதட்டுக்கு ஏற்ற நிறத்தைத் தேர்வு செய்யுங்கள்
லிப் லைனரின் நிறம், நீங்கள் பயன்படுத்தும் லிப்ஸ்டிக்கின் நிறத்துடன் பொருந்தியதாகவோ அல்லது அதைவிட ஒரு படி ஆழமான நிறமாகவோ இருக்க வேண்டும். இதனால் உதடுகளின் எல்லை தெளிவாகத் தெரியும். மேலும், லிப்ஸ்டிக் உதட்டைத் தாண்டி பரவுவதையும் கட்டுப்படுத்தும்.உதாரணமாக, அடர் சிவப்பு நிற லிப்ஸ்டிக் பயன்படுத்தினால் அதே நிறம் அல்லது மெரூன் கலந்த சிவப்பு லைனர் சிறந்த தேர்வாக இருக்கும். எந்த நிற லைனரைப் பயன்படுத்துவது என்ற குழப்பம் இருந்தால், உங்கள் உதட்டின் இயற்கை நிறத்தை ஒத்த ‘நியூட்’ லைனரைத் தேர்வு செய்யலாம். அது பெரும்பாலான லிப்ஸ்டிக் நிறங்களுடனும் இயல்பாகப் பொருந்தும்.

லைனரை எப்படி வரைய வேண்டும்?
முதலில் மேல் உதட்டின் நடுப்பகுதியில் உள்ள இயற்கை வளைவில் சிறிய ‘எக்ஸ்’ வடிவைக் குறித்துக் கொள்ள வேண்டும். அதன் பிறகு அந்தப் புள்ளியிலிருந்து இரு ஓரங்களையும் நோக்கி மெதுவாகக் கோடு இழுக்க வேண்டும்.அதேபோல் கீழ் உதட்டின் நடுப்பகுதியில் இருந்து தொடங்கி இரு முனைகளையும் இணைக்க வேண்டும். வரையும் போது உதடுகளைச் சற்றே தளர்த்தி வைத்தால் கோடுகள் சமமாகவும் துல்லியமாகவும் அமையும்.அதன்பின், விரல் நுனி அல்லது சிறிய பிரஷின் உதவியால் லைனரை உதட்டின் உள்பகுதி நோக்கி லேசாகப் பரப்ப வேண்டும். அதன் மேல் லிப்ஸ்டிக் பூசினால் நிறம் இயல்பாக ஒன்றிணைந்து, உதடுகள் நிறைவான தோற்றத்தைப் பெறும்.

லிப்ஸ்டிக் நீண்ட நேரம் மங்காமல் இருக்க
வெளிப்புறக் கோடு மட்டும் வரைவதை விட, லிப் லைனரை உதட்டின் முழுப் பரப்பிலும் மெல்லப் பூசுவது சிறந்தது. இதனால் லிப்ஸ்டிக் நீண்ட நேரம் மங்காமல் நிலைத்திருக்கும். இறுதியாக லிப்ஸ்டிக்கைப் பூசி, விரலால் மெதுவாக அழுத்திப் பரப்பினால் இயற்கையான ஒப்பனைத் தோற்றம் கிடைக்கும்.

இறுதியில் நேர்த்தியான ஃபினிஷிங்
லைனர் வரையும்போது கோடு சற்று விலகியிருந்தாலோ அல்லது உதட்டின் எல்லையைத் தாண்டியிருந்தாலோ பதற்றப்பட வேண்டியதில்லை. சிறிய பிரஷில் கன்சீலரை எடுத்து உதட்டின் வெளிப்புற ஓரங்களில் மென்மையாகத் தடவி சீரமைத்தால், உதட்டின் வடிவம் இன்னும் துல்லியமாகவும், செதுக்கப்பட்டதுபோல் அழகாகவும் மிளிரும்.லிப் லைனரை சரியான முறையில் பயன்படுத்துவது, உதடுகளின் வடிவத்தை மட்டுமல்லாமல், முழு முக ஒப்பனையின் அழகையும் பல மடங்கு உயர்த்தும். சிறிய இந்த ஒப்பனை நுணுக்கம், உங்கள் புன்னகைக்கு கூடுதல் பொலிவையும், முகத்திற்கு தனித்துவமான கவர்ச்சியையும் அளிக்கும்.