வீட்டின் இதயமாகவும், குடும்பத்தின் இயக்க சக்தியாகவும் பெண்கள் திகழ்கிறார்கள். காலை முதல் இரவு வரை ஓய்வில்லாமல் சுழன்றுக்கொண்டே இருக்கும் அவர்களின் வாழ்க்கையில், வீட்டு வேலைகள் சில நேரங்களில் சோர்வையும் சலிப்பையும் ஏற்படுத்துவது இயல்பானதே. ஆனால், சிறிய மாற்றங்களும் புத்துணர்ச்சியான அணுகுமுறையும் இருந்தால், அன்றாட வேலைகளையே மகிழ்ச்சியான அனுபவமாக மாற்றலாம்.

ஒவ்வொரு நாளையும் உற்சாகமாக தொடங்குவது மிக முக்கியம். காலை எழுந்தவுடன் உங்களுக்கு மிகவும் பிடித்த பாடலை கேட்டு நாளை தொடங்குங்கள். அது மனதை இலகுவாக்கி புத்துணர்ச்சியை தரும்.வேலை செய்யும் நேரங்களில் மனதை சுறுசுறுப்பாக வைத்திருக்க நகைச்சுவை பேச்சுகள், ஊக்கமளிக்கும் சொற்பொழிவுகள் அல்லது இனிமையான பாடல்களை கேட்கலாம். இதனால் வேலை சுமையாக தோன்றாது.

ஒவ்வொரு வேலைக்கும் குறிப்பிட்ட நேர வரம்பு நிர்ணயித்துக் கொள்ளுங்கள். “இந்த வேலையை 30 நிமிடத்தில் முடிக்க வேண்டும்” என்ற சிறிய இலக்கு வைத்தாலே, வேலை வேகமாகவும் கவனமாகவும் முடியும்.வேலைகளுக்கு இடையே 5 நிமிட இடைவேளை எடுத்து அமைதியாக அமருங்கள். உங்கள் மூச்சின் ஓட்டத்தை மட்டும் கவனியுங்கள். இது மனஅழுத்தத்தை குறைத்து மன அமைதியை அதிகரிக்கும்.தினசரி செய்ய வேண்டிய வேலைகளை ஒரு பட்டியலாக எழுதி வைத்துக் கொள்ளுங்கள்.

ஒவ்வொரு வேலையும் முடிந்தபின் அதற்கு அருகில் குறியிடுவது மனநிறைவை தரும். அது அடுத்த வேலையை தொடங்கும் ஊக்கத்தையும் வழங்கும்.ஒரே வேலையை தொடர்ந்து செய்வது விரைவில் சலிப்பை ஏற்படுத்தும். அதனால் வேலைகளை மாறிமாறி செய்யுங்கள். சமையல், சுத்தம், துணி மடித்தல் என வேலையின் தன்மையை மாற்றுவது மனதை புத்துணர்ச்சியாக வைத்திருக்கும்.வீட்டில் இனிய நறுமணம் பரவுவது மனதுக்கும் நல்ல மாற்றத்தை தரும்.

சாம்பிராணி, ஊதுபத்தி அல்லது நறுமண திரவியங்களை பயன்படுத்துவது அமைதியான சூழலை உருவாக்கும்.வேலை செய்யும் போது வசதியான மற்றும் சுத்தமான உடைகளை அணியுங்கள். உடல் சுகமாக இருந்தால் மனமும் சுறுசுறுப்பாக இருக்கும்.காலையில் என்ன சமைப்பது என்று குழம்புவதற்குப் பதிலாக, முந்தைய இரவே அடுத்த நாள் சமையலை திட்டமிடுங்கள். தேவையான பொருட்களை முன்கூட்டியே தயாராக வைத்தால் காலையிலான அவசரம் குறையும்.

வேலை செய்யும் நேரங்களில் நல்ல எண்ணங்களை மட்டும் மனதில் வைத்திருங்கள். தேவையற்ற கவலைகளுக்கு இடமளிக்காதீர்கள். மனநிலை நன்றாக இருந்தால் வேலைகளும் இலகுவாக தோன்றும்.ஒரு வேலை முடிந்ததும் அதை ரசித்து பாருங்கள். சுத்தமான வீடு, ஒழுங்கான அறை—இவை அனைத்தும் “இது என் முயற்சி” என்ற பெருமையை உண்டாக்கும்.வீட்டை அலங்கரிப்பதை ஒரு கடமையாக அல்ல, உங்களின் பொழுதுபோக்காக கருதுங்கள்.

சிறிய மாற்றங்கள்கூட வீட்டிற்கு புத்தம் புதிய தோற்றத்தை தரும்.பெரிய வேலைகளை ஒரே நாளில் முடிக்க முயற்சிக்க வேண்டாம். ஒரு நாள் ஒரு பகுதி என்ற திட்டத்துடன் செயல்பட்டால் சோர்வில்லாமல் நேர்த்தியாக முடிக்கலாம்.வீட்டில் உள்ள மற்றவர்களையும் சிறு சிறு வேலைகளில் ஈடுபடுத்துங்கள்.

குழந்தைகளுக்கு பொறுப்பு உணர்வு வரும். உங்களின் சுமையும் குறையும்.வீட்டில் செடிகள் வளர்ப்பது மனதிற்கு இயற்கையான புத்துணர்ச்சியை தரும். பசுமை சூழல் மன அழுத்தத்தை குறைக்கும்.“இது என் வீடு... இது என் குடும்பம்...” என்ற அன்பான எண்ணம் இருந்தால் எந்த வேலையும் கடினமாக தோன்றாது.

அனைத்து வேலைகளும் முடிந்தபின் உங்களுக்காக சிறிது நேரம் ஒதுக்குங்கள். சின்ன அலங்காரம் செய்து கண்ணாடியில் உங்களை ரசிக்கவும். அது மனநிறைவை அதிகரிக்கும்.மொத்தத்தில், வீட்டு வேலைகளை வெறும் கடமையாக பார்க்காமல் அன்பின் வெளிப்பாடாக பார்க்கத் தொடங்கினால், சலிப்பும் சுமையும் மெதுவாக மறைந்து, அதற்குப் பதிலாக மகிழ்ச்சியும் மனநிறைவும் வந்து சேரும்.