குழந்தை பருவத்திலிருந்தே தலைமுடிக்கு எண்ணெய் தேய்ப்பது நம் பாரம்பரிய பராமரிப்பு முறையின் முக்கிய அங்கமாக இருந்து வருகிறது. தேங்காய் எண்ணெய், பாதாம் எண்ணெய், ஆமணக்கு எண்ணெய், ஆலிவ் எண்ணெய் என ஒவ்வொரு இல்லத்திலும் குறைந்தது ஒரு வகை எண்ணெயாவது தலைமுடி பராமரிப்பில் இடம்பிடித்திருக்கும்.ஆனால், தலைமுடி வளர்ச்சிக்காக எண்ணெய் தேய்க்கும் சரியான நேரம் எது? காலை நேரமா? அல்லது இரவு நேரமா? என்ற கேள்வி பலரின் மனதிலும் தொடர்ந்து எழுந்துகொண்டே இருக்கிறது.

சிலர் காலை நேரத்தில் எண்ணெய் தேய்ப்பது தலைச்சருமத்தில் ரத்த ஓட்டத்தை தூண்டி முடி வளர்ச்சியை மேம்படுத்தும் என நம்புகின்றனர். மற்றொருபுறம், இரவு முழுவதும் எண்ணெய் ஊறவிட்டால் முடியின் வேர்களுக்கு ஆழமான ஊட்டச்சத்து கிடைக்கும் என்று பலர் கருதுகின்றனர்.

உண்மையில், இதற்கான பதில் ஒரே மாதிரி இல்லை. ஒருவரின் வாழ்க்கை முறை, தலைச்சருமத்தின் தன்மை, முடியின் அமைப்பு மற்றும் பராமரிப்பு பழக்கங்கள் ஆகியவற்றைப் பொறுத்தே இதன் பலன்கள் மாறுபடுகின்றன.தலைமுடிக்கு எண்ணெய் தடவுவது வெறும் பழக்கமல்ல; அது பல நன்மைகளை தரக்கூடிய பராமரிப்பு முறையாகும்.

இது தலைச்சருமத்திற்கு தேவையான ஊட்டச்சத்தை வழங்குகிறது. முடி உலர்வதை குறைக்கிறது. முடி வேர்களை வலுப்படுத்தி உடைதலை கட்டுப்படுத்துகிறது.மேலும், மென்மையான மசாஜ் ரத்த ஓட்டத்தை சீராக்கி, முடி வளர்ச்சியை ஊக்குவிக்க உதவுகிறது. அதோடு, முடியில் ஏற்படும் உராய்வை குறைத்து, முடி பிளவுபடுதல் மற்றும் சேதமடைவதிலிருந்தும் பாதுகாக்கிறது.

ஆனால், எண்ணெய் தேய்ப்பது மட்டும் போதுமானதல்ல. சத்தான உணவு, போதிய உறக்கம், மனஅழுத்த கட்டுப்பாடு மற்றும் சரியான பராமரிப்பு ஆகியவையும் ஆரோக்கியமான முடி வளர்ச்சிக்குத் தேவையான முக்கிய அம்சங்களாகும்.

முடி வளர்ச்சிக்கு எது சிறந்தது?
உலர்ந்த அல்லது சேதமடைந்த தலைமுடி கொண்டவர்கள் வாரத்திற்கு 1 அல்லது 2 முறை இரவு நேரத்தில் எண்ணெய் தேய்ப்பது நல்ல பலன் தரும்.எண்ணெய் சுரப்பு அதிகம் உள்ள தலைச்சருமம் கொண்டவர்கள் காலை நேரத்தில் எண்ணெய் தேய்த்து சில மணி நேரத்திற்குள் தலை அலசுவது சிறந்ததாகும்.வாரத்திற்கு 2 முதல் 3 முறை எண்ணெய் தேய்த்தாலே போதுமானது. மிக அதிக அளவில் எண்ணெய் பயன்படுத்துவது தவிர்க்கப்பட வேண்டும். மெதுவாக மசாஜ் செய்து, பின்னர் தலைச்சருமத்தை நன்றாக சுத்தம் செய்வதும் அவசியம்.உண்மையில், காலை அல்லது இரவு என்ற நேரத்தை விட தொடர்ச்சியான மற்றும் சரியான பராமரிப்பே முடி வளர்ச்சிக்கான முக்கிய ரகசியமாகும்.
காலை நேரத்தில் எண்ணெய் தேய்த்தால்...

நன்மைகள்:
தலைச்சருமத்தை புத்துணர்ச்சியுடன் வைத்திருக்க உதவும்.
தலைமுடி வறட்சியை குறைக்க உதவும்.
அதிக எண்ணெய் தேக்கம் ஏற்படாமல் பாதுகாக்கும்.
காலை நேரத்தில் லேசாக எண்ணெய் தேய்த்து 30 நிமிடங்கள் முதல் 2 மணி நேரம் வரை வைத்திருந்து தலை அலசலாம். எண்ணெய் பசை தன்மை அதிகம் உள்ளவர்கள் அல்லது முகப்பரு பிரச்சனை உள்ளவர்களுக்கு இது சிறந்த தேர்வாகும்.

குறைபாடுகள்:
எண்ணெய் முழுமையாக உறிஞ்ச போதிய நேரம் கிடைக்காமல் போகலாம்.
வெளியே செல்லும்போது தூசி, மாசு முடியில் ஒட்டக்கூடும்.
வெயில் நேரத்தில் தலைச்சருமத்தில் அழுக்கு சேரும் வாய்ப்பு அதிகரிக்கும்.
ஷாம்பு பயன்படுத்தி தலை அலசும் பழக்கம் உள்ளவர்களுக்கு காலை நேர எண்ணெய் பராமரிப்பு ஏற்றதாக இருக்கும்.
இரவு நேரத்தில் எண்ணெய் தேய்த்தால்...

நன்மைகள்:
எண்ணெய் நீண்ட நேரம் தலையில் ஊறி ஆழமான ஊட்டச்சத்தை வழங்கும்.
உலர்ந்த மற்றும் சேதமடைந்த முடியை சீராக்க உதவும்.
முடி உலர்தல் பிரச்சனை குறையும்.
தலை மசாஜ் மூலம் மனஅமைதி கிடைத்து நல்ல உறக்கத்திற்கும் உதவும்.

குறைபாடுகள்:
சிலருக்கு தலைச்சரும துளைகள் அடைபட்டு பொடுகு அதிகரிக்கலாம்.
முடியை முறையாக மூடாமல் தூங்கினால் தூசி ஒட்ட வாய்ப்பு உண்டு.
எண்ணெய் சுரப்பு அதிகம் உள்ளவர்களுக்கு இது பொடுகு மற்றும் ஒட்டுண்ணி பிரச்சனைகளை அதிகரிக்கலாம்.வறண்ட, சேதமடைந்த மற்றும் ஊட்டச்சத்து குறைந்த தலைமுடி கொண்டவர்களுக்கு இரவு நேர எண்ணெய் பராமரிப்பு மிகவும் ஏற்றதாக கருதப்படுகிறது.இறுதியாக, உங்கள் தலைமுடியின் தன்மையை புரிந்துகொண்டு அதற்கேற்ற பராமரிப்பை தேர்வு செய்வதே நீளமான, அடர்த்தியான மற்றும் ஆரோக்கியமான முடிக்கான சிறந்த வழியாகும்.