இந்தியாவில் தற்போது வாட்ஸ்அப்புக்கு மாற்றாக ஜோஹோ நிறுவனத்தின் “அரட்டை” செயலி வேகமாக பிரபலமடைந்து வருகிறது. மத்திய அமைச்சர்கள், தொழிலதிபர்கள், அரசியல் தலைவர்கள் என பலரும் இந்த உள்நாட்டு மெசேஜிங் ஆப்பை பதிவிறக்கம் செய்து பயன்படுத்த தொடங்கியுள்ளனர்.

இதே நேரத்தில், சமூக வலைதளத்தில் ஒருவர் எழுப்பிய கேள்வி அனைவரின் கவனத்தையும் ஈர்த்துள்ளது. “அரட்டை செயலியில் கணவன்–மனைவி இடையேயான நெருக்கமான புகைப்படங்களை பகிர்வது பாதுகாப்பானதா? ஜோஹோவில் உள்ளவர்கள் அவற்றை அணுக முடியுமா?” என ஒருவர் கேள்வி எழுப்பினார்.இதற்கு ஜோஹோ நிறுவனர் ஸ்ரீதர் வேம்பு நேரடியாக பதிலளித்துள்ளார்.

அவர் கூறியதாவது —“எங்களின் முழு வணிகமும் நம்பிக்கையை அடிப்படையாகக் கொண்டது. வாடிக்கையாளர்களின் தனிப்பட்ட தரவை நாங்கள் ஒருபோதும் அணுகுவதில்லை. அதற்காகவே ‘எண்ட் டு எண்ட் என்க்ரிப்ஷன்’ என்ற தொழில்நுட்பத்தை கொண்டு வந்துள்ளோம். நம்பிக்கை என்பது விலைமதிப்பற்றது. சர்வதேச அளவிலும் அந்த நம்பிக்கையை நாங்கள் தினமும் சம்பாதித்து வருகிறோம்,” எனத் தெரிவித்துள்ளார்.

இதன் மூலம், அரட்டை செயலியில் பகிரப்படும் புகைப்படங்கள், வீடியோக்கள் அல்லது உரையாடல்கள் எந்த மூன்றாம் தரப்பினராலும் அணுக முடியாது என்பதை ஸ்ரீதர் வேம்பு தெளிவாக விளக்கியுள்ளார்.

குறிப்பிடத்தக்கது என்னவெனில், “அரட்டை” ஆப் 2021 ஆம் ஆண்டு வெளியிடப்பட்டிருந்தாலும், தற்போது தான் மக்களிடையே மிகுந்த வரவேற்பைப் பெற்றுவருகிறது. இதற்கு முக்கிய காரணம், “Make in India” என்ற பிரதமர் நரேந்திர மோடியின் அழைப்பும், வெளிநாட்டு நிறுவனங்களுக்குப் பதிலாக இந்திய தயாரிப்புகளுக்கு மக்களின் ஆதரவும் ஆகும்.

தற்போது அமெரிக்க நிறுவனங்களின் தயாரிப்புகளுக்கு மாற்றாக இந்திய நிறுவனங்கள் உருவாக்கிய ஆப்கள் வேகமாக வளர்ந்து வருகின்றன. அதில் ஜோஹோவின் “அரட்டை” முக்கியமான ஒன்றாக மாறியுள்ளது.

முன்னதாக, ஜோஹோ நிறுவனத்தின் தலைமை நிர்வாக அதிகாரி மணி வேம்புவும் இதேபோல கூறியிருந்தார்.“வாட்ஸ்அப் போலவே, ‘எண்ட் டு எண்ட் என்க்ரிப்ஷன்’ அம்சம் அரட்டை செயலியிலும் கொண்டு வரப்படும். இதனால் தனிப்பட்ட உரையாடல்கள், புகைப்படங்கள், வீடியோ பகிர்வுகள் அனைத்தும் பாதுகாப்பாக இருக்கும்,” என அவர் உறுதியளித்தார்.

 அதாவது, “அரட்டை”யில் நடக்கும் உரையாடல், புகைப்படம், வீடியோ — எல்லாம் உங்களுக்கும், நீங்கள் அனுப்பும் நபருக்கும் மட்டுமே தெரியும்.