இந்த ஆண்டு தீபாவளிக்கே வெளியாகவிருக்கும் “டியூட்” படம் தற்போது ரசிகர்களிடையே பெரும் எதிர்பார்ப்பை ஏற்படுத்தியுள்ளது. இயக்குநர் மற்றும் நடிகர் பிரதீப் ரங்கநாதன் நடிப்பில் உருவாகியுள்ள இந்த படம் தமிழ், தெலுங்கு மொழிகளில் வெளியாக உள்ளது.

படத்தின் புரோமோசன் பணிகள் வேகமாக நடைபெற்று வரும் நிலையில், ஹைதராபாத்தில் நடைபெற்ற புரோமோசன் நிகழ்ச்சியில் நடந்த ஒரு சம்பவம் தற்போது சமூக வலைதளங்களில் வைரலாகி வருகிறது.

அந்த நிகழ்ச்சியில் பிரதீப் ரங்கநாதன் பேசிக் கொண்டிருந்தபோது, ரசிகர்கள் கூட்டத்தில் இருந்து ஒருவர் —“மமிதா பைஜு எங்கே? ஏன் வரவில்லை?” எனக் கேள்வி எழுப்பினார்.

இதற்கு உடனே பிரதீப் ரங்கநாதன் சிரித்தபடி,“அவர் என் நெஞ்சில் இருக்கிறார்!” என்று தனது மார்பைப் தொட்டுக் காட்டியபடி கூறினார்.

அந்தச் சமயத்தில் வெட்கத்தோடும் நகைச்சுவையுடனும் அவர் கூறிய இந்த பதில், ரசிகர்களிடையே கைத்தட்டலுடன் வரவேற்கப்பட்டது.

பின்னர் அவர் சிரித்தபடி விளக்கம் அளித்து,“இது வெறும் விளையாட்டுக்காக சொன்னது தான். மமிதா பைஜு தற்போது சூர்யா சாரின் படத்தின் படப்பிடிப்பில் இருக்கிறார். வரும் 11ஆம் தேதியிலிருந்து டியூட் பட புரோமோசனில் கலந்து கொள்வார்,” என்று கூறினார்.

இதையடுத்து, அவரது இந்தப் பதிலை அடிப்படையாகக் கொண்டு இணையத்தில் பலரும் மீம்கள், வீடியோக்கள் பகிர்ந்து வருகின்றனர். சிலர் இருவரும் காதலில் இருக்கிறார்களா என்று ஆராய்ந்துவர, மற்றவர்கள் இதை பிரதீப்பின் நகைச்சுவை பாணியாகவே எடுத்துக் கொள்கிறார்கள்.

கீர்த்தீஸ்வரன் இயக்கத்தில் உருவாகியுள்ள “டியூட்” படத்திற்கு சாய் அபயங்கர் இசையமைத்துள்ளார். ஏற்கனவே வெளியான மூன்று பாடல்களும் ரசிகர்களிடையே நல்ல வரவேற்பைப் பெற்றுள்ளன.

மேலும், இந்தப் படத்தில் பிரதீப் ரங்கநாதன் பாடகராகவும் அறிமுகமாகியுள்ளார் என்பது குறிப்பிடத்தக்கது. தீபாவளிக்கு திரையரங்குகளை கலக்கவிருக்கும் “டியூட்” — பிரதீப் ரங்கநாதனின் இதயபூர்வமான புரோமோசன் ரசிகர்களை கவர்ந்துள்ளது!