ரஷ்யா நாட்டில் இருந்து மேலும் ஐந்து எஸ்-400 வான் பாதுகாப்பு ஏவுகணை அமைப்புகளை வாங்கும் Indian Air Force (இந்திய விமானப்படை) முன்மொழிவுக்கு முக்கிய ஒப்புதல் கிடைத்துள்ளது. பாதுகாப்பு செயலாளர் ராஜேஷ் குமார் சிங் தலைமையிலான பாதுகாப்பு கொள்முதல் வாரியம் (DPB), இந்த திட்டத்தை ஏற்று அடுத்த கட்டத்திற்கு அனுப்பியுள்ளது.

இப்போது, இந்த முன்மொழிவு ராஜ்நாத் சிங் தலைமையிலான பாதுகாப்பு கையகப்படுத்தல் கவுன்சிலின் (DAC) ‘அவசிய ஒப்புதல்’ பெறும் நிலைக்கு செல்கிறது. அதன் பின்னர் செலவு பேச்சுவார்த்தை குழு அமைக்கப்பட்டு, விலை நிர்ணயம் செய்யப்படும்.

இறுதியில் நிதி அமைச்சகம் வழியாக அமைச்சரவைக் குழு (CCS) இறுதி அனுமதி வழங்கும்.தற்போது இந்தியாவிடம் மூன்று எஸ்-400 அமைப்புகள் செயல்பாட்டில் உள்ளன. மேலும் இரண்டு அமைப்புகள் இந்த ஆண்டுக்குள் சேர்க்கப்படவுள்ளன.

வான்வழி அச்சுறுத்தல்களை துல்லியமாக கண்டறிந்து தகர்க்கும் திறனால், இந்த அமைப்பு இந்தியாவின் வான் பாதுகாப்பில் முதன்மை கவசமாக பார்க்கப்படுகிறது. குறிப்பாக, எதிரி போர் விமானங்கள், எச்சரிக்கை விமானங்கள் மற்றும் ரேடார் மையங்களை கட்டுப்படுத்துவதில் இதன் செயல்திறன் நிரூபிக்கப்பட்டுள்ளது.

இதனுடன், எஸ்-400 அமைப்புகளுக்கு கூடுதல் பாதுகாப்பாக ‘பான்சிர்’ குறுகிய தூர வான் பாதுகாப்பு அமைப்புகளையும் இந்தியா வாங்க திட்டமிட்டுள்ளது.

எல்லைப் பகுதிகளில் ட்ரோன்கள், தாக்குதல் ஹெலிகாப்டர்கள், ராக்கெட்டுகள், குறுகிய தூர ஏவுகணைகள் போன்ற அச்சுறுத்தல்களை தடுக்க இவை பயன்படும்.

இந்த ‘பான்சிர்’ அமைப்புகள் தற்போது ஐக்கிய அரபு அமீரகம் உள்ளிட்ட நாடுகளில் பயன்பாட்டில் உள்ளன. மேலும் ஈரான் சார்ந்த காமிகேஸ் ட்ரோன்களை சுட்டு வீழ்த்திய அனுபவத்தால், இதன் திறன் உலகளவில் கவனம் பெற்றுள்ளது.