பீஹார் சட்டசபை தேர்தல் முடிவுகள் வெளிவந்துள்ளன. மீண்டும் ஆளும் கட்சி கூட்டணி வெற்றி பெற்றுள்ளது. அந்த கூட்டணியில் உள்ள கட்சிகள் போட்டியிட்ட தொகுதிகளில் எத்தனை தொகுதிகளில் வெற்றி பெற்றன என்பது முக்கிய ஒன்றாக பார்க்கப்படுகிறது. அதனபடி, பீஹார் சட்ட மன்ற தேர்தலில் முன் எப்போதும் இல்லாத அளவு கடந்த 20 ஆண்டுகால சட்டசபை தேர்தல் அரசியலில் பாஜ தனிப்பெரும் கட்சியாக 93 தொகுதிகளில் வெற்றியை நோக்கி வேகமாக நகர்ந்து வருகிறது.

தேஜ கூட்டணியினர் தலா 101 தொகுதிகள் என்ற அடிப்படையில் போட்டியிட்டனர். பாஜ தாம் போட்டியிட்ட 101 தொகுதிகளில் 93 தொகுதிகளில் முன்னிலையில் உள்ளது. நிதிஷ் குமாரின் ஐக்கிய ஜனதா தளம் தாம் போட்டியிட்ட 101 தொகுதிகளில் 82 தொகுதிகளில் தொடர்ந்து முன்னிலையில் உள்ளது.

கூட்டணியாக இருந்த போதிலும், பீஹார் சட்டசபை தேர்தல் முடிவுகள் வரலாற்றில் தனிப்பெரும் கட்சியாக பாஜ உருவெடுத்துள்ளது. கடந்த 2020-ஆம் ஆண்டு சட்டசபை தேர்தலில், 74 தொகுதிகளில் பாஜ வெற்றி பெற்றிருந்தது. ஆனால், இம்முறை 100 தொகுதிகளை நோக்கி நகர ஆரம்பித்துள்ளது. இதற்கு முன் நடந்த தேர்தல்களில் பாஜ பெற்ற தொகுதிகளை விட 2025-ஆம் ஆண்டு தேர்தலில் அதிக தொகுதிகளில்  வெற்றிப் பெற்றுள்ளது.

2005-ஆம் ஆண்டு 37 தொகுதிகளிலும், 2010-ஆம் ஆண்டு 91 தொகுதிகளிலும், அதன் பின்னர் 2015-ஆம் ஆண்டு தேர்தலின் போது கொஞ்சம் குறைந்து 53 ஆக இருந்தது.ஆனால்,  கடந்த 20 ஆண்டுகால சட்டசபை தேர்தல் அரசியலில் பாஜ இம்முறை தான் அதிக தொகுதிகளை கைப்பற்றியுள்ளது.

இந்த வெற்றி பிஹார் அரசியலில் பாஜ பெற்ற குறிப்பிடத்தக்க வெற்றியாகும். ஏனெனில் 20 ஆண்டுகளில் தனிப்பெரும் கட்சியாக உருவெடுத்துள்ளது. இந்த வளர்ச்சி, அந்த கட்சியின் சாதனையாக கருதப்படுகிறது. 2005-ஆம் ஆண்டுடன் ஒப்பிடும் போது இந்த தேர்தல் வெற்றியானது மும்முடங்கு வெற்றி என்று அரசியல் பார்வையாளர்கள் கூறுகின்றனர்.