மத்​திய பிரதேசத்​தின் சிந்த்​வாரா மாவட்​டம், ஹதோடா ஹிரி கிராமத்​துக்கு செல்ல முறை​யான சாலை வசதி இல்லாத காரணத்தினால், அங்கு வசிக்​கும் சுமார் 20 குடும்​பங்​கள் பெரிதும் பாதிக்கப்பட்டுள்ளனர். குறிப்பாக மழைக்​காலத்​தில் ஆற்​றில் ஏற்படும் வெள்​ளம் காரண​மாக மற்ற பகுதிகளில் இருந்து துண்டிக்​கப் ​படு​கின்​றனர். இந்நிலையில், கடந்த புதன் ​கிழமையன்று அந்த கிராமத்​தைச் சேர்ந்த சவிதா விஸ்​வ கர்​மாவுக்கு (35)  பிரசவ வலி ஏற்பட்டுள்​ளது. 

அப்போது உறவினர்​கள் 108 ஆம்​புலன்ஸை அழைத்​துள்​ளனர். ஆனால், ஆற்றில் வெள்​ளம் ஓடிய​தால் ஆம்​புலன்​ஸால் வர முடிய​வில்​லை. வேறு வழி​யின்​றி, கிராம மக்​கள் அவரை கட்​டிலில் படுக்க வைத்து, தோளில் சுமந்​த​படி ஆற்​றைக் கடக்க முயன்றுள்ளனர். அப்போது வலி தீவிரமடைந்து வழி​யிலேயே சவிதாவுக்கு குழந்தை பிறந்துள்ளது. இது தொடர்​பான வீடியோ தற்போது சமூக வலைத்தளங்களில் வைரலாகி வரு​கிறது.

அதன் பின்​னர், தாயை​யும் குழந்​தையை​யும் பத்​திர​மாக ஆற்​றின் மறு​பக்​கத்​துக்​குக் கொண்டு வந்த கிராம மக்​கள், ஆம்புலன்ஸுக்காக நீண்ட நேரம் காத்​திருந்​துள்ளனர். அப்​போதும் ஆம்​புலன்ஸ் வரவில்லை. இதனால் தாய் மற்றும் சேயை ஒரு மோட்​டார் சைக்​கிளில் அமர​வைத்து அமர்​வாடா அரசு மருத்​து​வ​மனைக்​குக் கொண்டு சென்​றுள்ள அப்பளம் அரங்கேறியுள்ளது. இருப்பினும், தற்​போது தாயும் சேயும் நலமாக இருப்​ப​தாக மருத்துவ​மனை நிர்​வாகம் தெரி​வித்​துள்​ளது.

இந்த ஹதோடா ஹிரி கிராமம் ஒவ்​வொரு மழைக் ​காலத்​தி​லும் துண்டிக்கப்படுவ​தாக​வும், பாலம் மற்​றும் சாலை வசதி கேட்டு அதி​காரி​கள் மற்றும் மக்​கள் பிர​தி​நி​தி​களிடம் பலமுறை மனு அளித்​தும் எந்த நடவடிக்​கை​யும்எடுக்​கப்​பட​வில்லை என்​றும் கிராம மக்​கள் வேதனை​யுடன் தெரி​வித்​துள்​ளனர். இச்​சம்​பவம் அம்​மாநிலத்​தின் கிராமப்​புற மருத்​து​வக் கட்​டமைப்​பின் அவல நிலையை மீண்​டும் வெளிச்​சம்​ போட்​டுக்​ காட்​டி​யுள்​ளமை குறிப்பிடத்தக்கது.