ஹுருன் நிறுவனம் வெளியிட்டுள்ள இந்தியாவின் பெரும் செல்வந்தர்கள் பட்டியலில், ரிலையன்ஸ் இண்டஸ்ட்ரீஸ் அதிபர் முகேஷ் அம்பானி இந்த ஆண்டும் தனது அசைக்க முடியாத முதலிடத்தைத் தக்கவைத்துள்ளார்.

கடந்த ஆண்டில் மட்டும் அம்பானி குடும்பத்தின் சொத்து மதிப்பு 9 சதவீதம் உயர்ந்து, சுமார் ரூ. 9.8 லட்சம் கோடி என்ற மலைக்க வைக்கும் உச்சத்தை எட்டியுள்ளது. இதன் மூலம் இந்திய அளவில் மட்டுமல்லாது, ஆசியாவின் நம்பர் 1 பணக்காரர் என்ற மகுடத்தையும் அவர் சூடியுள்ளார்.

உலகளாவிய செல்வந்தர்கள் வரிசையில் முகேஷ் அம்பானி 17-வது இடத்தைப் பிடித்துப் பெருமை சேர்த்துள்ளார்.அவருக்கு அடுத்தபடியாக, ரூ. 7.5 லட்சம் கோடி சொத்து மதிப்புடன் கவுதம் அதானி குடும்பம் இரண்டாம் இடத்திலும், ரூ. 3.2 லட்சம் கோடி மதிப்புடன் ஹெச்.சி.எல் டெக் தலைவி ரோஷ்னி நாடார் குடும்பம் மூன்றாம் இடத்திலும் நீடிக்கின்றனர்.

குறிப்பாக, முதல் 10 இடங்களுக்குள் நுழைந்த ஒரே பெண்மணி என்ற பெருமையை ரோஷ்னி நாடார் பெற்றுள்ளார். இவர்களைத் தொடர்ந்து சைரஸ் பூனவல்லா (ரூ. 3 லட்சம் கோடி) மற்றும் குமார் மங்கலம் பிர்லா (ரூ. 2.5 லட்சம் கோடி) ஆகியோர் முறையே நான்கு மற்றும் ஐந்தாம் இடங்களை அலங்கரிக்கின்றனர்.

பட்டியலின் அடுத்தடுத்த இடங்களில் திலீப் சங்க்வி, அசிம் பிரேம்ஜி, நீரஜ் பஜாஜ் குடும்பம், அசோக் ஹிந்துஜா குடும்பம் மற்றும் ராதாகிஷன் தமானி ஆகியோர் 6 முதல் 10 வரையிலான இடங்களைப் பிடித்துள்ளனர்.

இந்தியாவின் பொருளாதார வளர்ச்சியைப் பறைசாற்றும் விதமாக, நாட்டின் மொத்த பில்லியனர்களின் எண்ணிக்கை 308-ஆக உயர்ந்துள்ளது; இது கடந்த 2025-ஆம் ஆண்டை விட 24 பேர் அதிகமாகும். அதிக பில்லியனர்களைக் கொண்ட நாடுகளின் வரிசையில் இந்தியா உலகளவில் மூன்றாவது இடத்தைப் பிடித்து சாதனை படைத்துள்ளது.

இந்தப் பட்டியலில் 1,110 பில்லியனர்களுடன் சீனா, அமெரிக்காவைப் பின்னுக்குத் தள்ளி முதலிடத்தில் ஆதிக்கம் செலுத்துகிறது. தற்போது உலகெங்கிலும் உள்ள பில்லியனர்களின் ஒட்டுமொத்த எண்ணிக்கை 4,000-ஐக் கடந்து புதிய வரலாற்றைப் படைத்துள்ளது குறிப்பிடத்தக்கது.