இந்தியாவின் சுதந்திர தினம் இன்று நாடு முழுவதும் உற்சாகமாகக் கொண்டாடப்படுகிறது. பள்ளிகள், கல்லூரிகள், அரசு அலுவலகங்கள் என அனைத்து இடங்களிலும் தேசியக் கொடி ஏற்றப்பட்டு, சுதந்திரப் போராட்ட வீரர்களின் தியாகங்கள் நினைவுகூரப்படுகின்றன.

இந்நிலையில், சமூக வலைதளங்களில் “2026-ம் ஆண்டு இந்தியாவின் 79-வது சுதந்திர தினமா அல்லது 80-வது சுதந்திர தினமா?” என்ற குழப்பம் நிலவி வருகிறது. இருவிதமாகவும் பதிவுகள் வெளியாகி வருவதால், எது சரி என்ற கேள்வி பலருக்கும் எழுந்துள்ளது.

இந்தியா 1947-ம் ஆண்டு ஆகஸ்ட் 15-ம் தேதி ஆங்கிலேய ஆட்சியிலிருந்து விடுதலை பெற்றது. அந்த நாளே இந்தியாவின் முதல் சுதந்திர தினமாகக் கொண்டாடப்பட்டது.அதன்படி, 1947 முதல் 2026 வரை கணக்கிட்டால் 79 ஆண்டுகள் நிறைவடைகின்றன. எனவே, 2026-ம் ஆண்டு ஆகஸ்ட் 15-ம் தேதி இந்தியா தனது 79-வது சுதந்திர ஆண்டை நிறைவு செய்கிறது.

ஆனால், சுதந்திர தினங்களை எண்ணும்போது 1947-ம் ஆண்டை முதல் சுதந்திர தினமாகக் கணக்கிடுவதால், 2026-ம் ஆண்டு கொண்டாடப்படுவது 80-வது சுதந்திர தினம் ஆகும்.எளிமையாகச் சொன்னால், “79 ஆண்டுகள் சுதந்திரம் நிறைவு” என்பதும், “80-வது சுதந்திர தினம்” என்பதும் ஒன்றுக்கொன்று முரணானவை அல்ல. 2026 ஆகஸ்ட் 15 அன்று இந்தியா 79 ஆண்டுகளை நிறைவு செய்து, 80-வது சுதந்திர தினத்தைக் கொண்டாடுகிறது.

இதனால்தான் இந்த ஆண்டை சிலர் 79-வது சுதந்திர தினம் என்றும், சிலர் 80-வது சுதந்திர தினம் என்றும் குறிப்பிடுகின்றனர்.சுதந்திர தினத்தன்று மாநிலங்களில் முதல்வர்கள் தேசியக் கொடியை ஏற்றுவதற்கான நடைமுறைக்கும் தமிழக அரசியல் வரலாற்றில் ஒரு முக்கிய பின்னணி உள்ளது.

1974-ம் ஆண்டு வரை மாநிலங்களில் சுதந்திர தினம் மற்றும் குடியரசு தின நிகழ்ச்சிகளில் ஆளுநர்களே தேசியக் கொடியை ஏற்றி வந்தனர். மாநில முதல்வர்களுக்கும் சுதந்திர தினத்தில் கொடியேற்றும் உரிமை வழங்கப்பட வேண்டும் என அப்போதைய தமிழக முதல்வர் மு.கருணாநிதி வலியுறுத்தினார்.

இதையடுத்து 1974-ம் ஆண்டு முதல் மாநில தலைநகரங்களில் சுதந்திர தினத்தன்று முதல்வர்கள் தேசியக் கொடியை ஏற்றும் நடைமுறை அமலுக்கு வந்தது.இன்றும் அந்த நடைமுறை தொடர்கிறது. டெல்லியில் பிரதமர் செங்கோட்டையில் தேசியக் கொடியை ஏற்றும் நிலையில், ஒவ்வொரு மாநில தலைநகரிலும் அந்தந்த மாநில முதல்வர்கள் தேசியக் கொடியை ஏற்றி சுதந்திர தின உரையாற்றுகின்றனர்.

எனவே, 2026 ஆகஸ்ட் 15 — இந்தியாவின் 80-வது சுதந்திர தினம்; அதே நேரத்தில் சுதந்திரம் பெற்றதிலிருந்து 79 ஆண்டுகள் நிறைவடையும் நாள் என்பதே குழப்பத்திற்கு சரியான விளக்கம்.