தனுஷ், அண்ணாமலை ஆகியோர் எதிர்காலத்தில் புதிய அரசியல் கட்சி தொடங்கினால், தவெக அமைச்சர் சிடிஆர் நிர்மல்குமார் அங்கும் சென்று இணைந்துவிடுவார் என திமுக அமைப்புச் செயலாளர் ஆர்.எஸ்.பாரதி கிண்டலாக விமர்சித்துள்ளார்.

நாடாளுமன்ற மழைக்கால கூட்டத்தொடர் நிறைவடைந்ததைத் தொடர்ந்து, சபாநாயகர் ஓம் பிர்லா அளித்த தேநீர் விருந்தில் திமுக சார்பில் கனிமொழி பங்கேற்றது அரசியல் வட்டாரத்தில் விவாதத்தை ஏற்படுத்தியது. இந்தியா கூட்டணியில் இடம்பெற்றுள்ள பல கட்சிகள் விருந்தை புறக்கணித்த நிலையில், திமுக மட்டும் பங்கேற்றது திமுக–பாஜக இடையிலான உறவு குறித்து பல்வேறு கேள்விகளை எழுப்பியது.

இந்த நிலையில், அமைச்சர் சிடிஆர் நிர்மல்குமார் திமுக–பாஜக உறவு குறித்து கருத்து தெரிவித்திருந்தார். இரு கட்சிகளும் ஏற்கனவே மறைமுகமாக கூட்டணியில் இருந்ததாகவும், தற்போது நேரடி கூட்டணி உருவாகி வருவதாகவும் அவர் கூறியிருந்தார். மேலும், அரசியலில் நிரந்தர எதிரியும் இல்லை, நிரந்தர நண்பரும் இல்லை என்றும், 2001-ம் ஆண்டு இருந்த அரசியல் சூழல் மீண்டும் உருவாகலாம் என்றும் அவர் தெரிவித்திருந்தார்.

இதற்கு பதிலளித்த ஆர்.எஸ்.பாரதி, தொகுதி மறுவரையறை விவகாரத்தில் திமுக எந்த வகையிலும் பாஜகவுக்கு ஆதரவாக வாக்களிப்பதாக கூறவில்லை என விளக்கம் அளித்தார்.

மேலும், “சிடிஆர் நிர்மல்குமார் பல கட்சிகளுக்கு சென்று வந்தவர். அவர் ஒவ்வொரு நேரத்திலும் ஒவ்வொரு மாதிரி பேசக்கூடியவர்” என்று விமர்சித்த அவர், நிர்மல்குமார் ஏற்கனவே ஆர்எஸ்எஸ், பாஜக, அதிமுக உள்ளிட்ட பல்வேறு அமைப்புகள் மற்றும் கட்சிகளுடன் தொடர்பில் இருந்ததாகக் குறிப்பிட்டார்.

தற்போது அவர் தவெகவில் இருப்பதாகக் கூறிய ஆர்.எஸ்.பாரதி, அடுத்ததாக எந்தக் கட்சிக்கு செல்வார் என்பது தெரியாது என்றும் கிண்டல் செய்தார்.

இதன் தொடர்ச்சியாக தனுஷ் மற்றும் அண்ணாமலை புதிய கட்சிகளை தொடங்க உள்ளதாக வெளியாகும் தகவல்களை சுட்டிக்காட்டிய அவர், “யார் புதிதாக கட்சி தொடங்கினாலும் உறுப்பினர் அட்டை வாங்கி வைத்துக்கொள்வது சிலருக்கு பாரம்பரியமாக உள்ளது” என்று கூறினார்.

அந்தப் பட்டியலில் சிடிஆர் நிர்மல்குமார் மற்றும் ஆதவ் அர்ஜுனா ஆகியோர் முதன்மையாக இருப்பார்கள் என்றும் ஆர்.எஸ்.பாரதி விமர்சித்தார்.

தொகுதி மறுவரையறை விவகாரத்தில் திமுக தனது நிலைப்பாட்டை ஏற்கனவே தெளிவுபடுத்திவிட்டதாகவும், தாங்கள் முன்வைக்கும் திருத்தங்கள் ஏற்றுக்கொள்ளப்பட்டால் அதற்கேற்ப முடிவு எடுக்கப்படும் என்றும் அவர் தெரிவித்தார்.

அதேபோல், தவெக ஆட்சியில் நடைபெறும் சில பிரச்சனைகளை மறைப்பதற்காகவே திமுக–பாஜக உறவு குறித்த விவாதங்கள் எழுப்பப்படுவதாகவும் ஆர்.எஸ்.பாரதி குற்றம்சாட்டினார். குறிப்பாக கோவை மாணவர் கொலை, தூத்துக்குடி பெண் அளித்த புகார் மீது நடவடிக்கை எடுக்கப்படாதது, முதலீட்டாளர் மாநாடு உள்ளிட்ட பல்வேறு விவகாரங்களையும் அவர் சுட்டிக்காட்டினார்.

இதனால், திமுக–தவெக இடையிலான அரசியல் மோதலுடன், தனுஷ் மற்றும் அண்ணாமலை அரசியல் வருகை குறித்த விவாதத்தையும் ஆர்.எஸ்.பாரதி தனது விமர்சனத்தின் மூலம் இணைத்திருப்பது தமிழக அரசியல் வட்டாரத்தில் புதிய கவனத்தை ஏற்படுத்தியுள்ளது.