ஹரியானா மாநிலத்தைச் சேர்ந்த பிரபல ரவுடி மைன்பால் தில்லா, தனது கம்போடியக் காதலியைத் திருமணம் செய்து கொள்வதற்காகப் பலத்த காவல்துறை பாதுகாப்புக்கு மத்தியில் 12 மணி நேரத் தற்காலிக பரோலில் சிறையிலிருந்து வெளியே வந்துள்ளார்.

22 வழக்குகள் மற்றும் இன்டர்போல் நோட்டீஸ்:

கொலை, கொலை முயற்சி, கொள்ளை மற்றும் சட்டவிரோத ஆயுதக் கடத்தல் உள்ளிட்ட சுமார் 22 தீவிரக் குற்றவியல் வழக்குகளில் கைதாகி ஆயுள் தண்டனை அனுபவித்து வரும் மைன்பால் தில்லா, கடந்த 2014-ஆம் ஆண்டு சிறையில் அடைக்கப்பட்டார். தொடர்ந்து 2018-ஆம் ஆண்டு 6 வாரங்கள் பரோலில் வெளிவந்த அவர், பரோல் காலம் முடிந்ததும் மீண்டும் சிறையில் சரணடையாமல் கம்போடியா நாட்டிற்குத் தப்பிச் சென்றார்.

இதையடுத்து அவரைத் தேடப்படும் முக்கியக் குற்றவாளியாக அறிவித்த ஹரியானா காவல்துறை, 2024-ல் இன்டர்போல் (Interpol) மூலம் நோட்டீஸ் பிறப்பித்தது. இதன் தொடர்ச்சியாக ஜூலை 2025-ல் கம்போடியா அதிகாரிகளால் கைது செய்யப்பட்ட மைன்பால், செப்டம்பர் 2025-ல் இந்தியாவுக்கு நாடுகடத்தப்பட்டு ஹரியானாவில் உள்ள ஹிசார் மத்திய சிறையில் அடைக்கப்பட்டார்.

12 மணி நேர பரோலில் திருமணம்:

தற்போது ஹிசார் சிறையில் இருக்கும் மைன்பாலுக்கு, தனது காதலியான கம்போடியாவைச் சேர்ந்த மெட்டா சான் (Meta San - 4 குழந்தைகளின் தாய்) என்பவரைத் திருமணம் செய்துகொள்ள 12 மணி நேர பரோல் வழங்கப்பட்டுள்ளது. இதற்காக ஜஜ்ஜார் மாவட்டத்தில் திருமணம் நடைபெறும் இடத்திற்குத் துப்பாக்கி ஏந்திய சிறப்புப் படையினரின் பலத்த பாதுகாப்புடன் இன்று காலை 8 மணிக்குச் சாலை வழியாக அவர் அழைத்துச் செல்லப்பட்டார்.

பரோல் கெடு முடிந்து இன்று இரவு 8 மணிக்குள் மைன்பாலை மீண்டும் ஹிசார் சிறையில் அடைக்க உத்தரவிடப்பட்டுள்ளது. இதனால் திருமணம் நடைபெறும் பகுதியிலும் அதனைச் சுற்றியுள்ள மண்டப வளாகத்திலும் அசம்பாவிதங்கள் ஏதும் நடைபெறாமல் இருக்கக் காவல்துறை உயர் அதிகாரிகள் தலைமையில் தீவிரக் கண்காணிப்பும், ஆயுதம் ஏந்திய காவல் படையினரின் பாதுகாப்பும் பலப்படுத்தப்பட்டுள்ளது.