அப்பளம் போல் நொறுங்கிய 4 கோடி மதிப்புள்ள கார்.! நொடியில் உயிர் தப்பிய பாஜக முன்னாள் எம்எல்ஏ மகன்.!

மகாராஷ்டிரா மாநிலத்தில் உள்ள மீரா பயந்தர் தொகுதியில் பாஜக முன்னாள் எம்எல்ஏவாக இருந்தவர் நரேந்திர மேத்தா. இவருடைய மகன் தக்சீல். இவர் நேற்றிரவு ஹூராகேன் என்ற சொகுசு காரில் வந்து கொண்டிருந்தார். 
 
அப்போது, கார் திடீரென கட்டுப்பாட்டை இழந்து பாந்த்ரா-வொர்லி கடல் இணைப்பின் தண்டவாளத்தின் மீது பயங்கரமாக மோதியது. இந்த விபத்தில் தக்சீல் கையில் காயம் ஏற்பட்டது. 

இந்த விபத்தின் காரணமாக அப்பகுதியில் போக்குவரத்து பாதிக்கப்பட்டது. இதையறிந்த போலீசார் சம்பவ இடத்திற்கு விரைந்து வந்து விபத்துக்குள்ளான காரைக் கைப்பற்றி காவல் நிலையத்திற்கு கொண்டு சென்றனர். அந்த காரின் விலை இந்திய மதிப்பில் ரூ.4.1 கோடியாகும்.
 
இந்தச் சம்பவம் தொடர்பாக பாஜக முன்னாள் எம்எல்ஏவின் மகனான தக்சீல் மீது பல்வேறு பிரிவுகளின் கீழ் போலீஸார் வழக்குப் பதிவு செய்துள்ளனர். இந்த விபத்து தொடர்பாக போலீஸார் தெரிவித்ததாவது:- 

"மீரா பயந்தர் தொகுதியின் முன்னாள் பாஜக எம்எல்ஏவான நரேந்திர மேத்தாவின் மகன் தக்சீல், சொகுசு காரில் வொர்லி நோக்கிச் சென்று கொண்டிருந்தபோது திடீரென கட்டுப்பாட்டை இழந்து தண்டவாளத்தில் மோதியுள்ளது. இதில் தக்சீலின் வலது கையில் தீக்காயங்கள் ஏற்பட்டிருந்தாலும், விபத்தில் வேறு யாருக்கும் காயம் ஏற்படவில்லை" என்று தெரிவித்தனர்.