தமிழ் திரைப்பட உலகின் உச்ச நட்சத்திரமாக விளங்கும் விஜய் மற்றும் அவரது மனைவி சங்கீதா இடையேயான குடும்ப பிளவு விவகாரம் தற்போது தீவிர திருப்பத்தை எட்டியுள்ளது. செங்கல்பட்டு குடும்ப நல நீதிமன்றத்தில் இன்று (ஏப்ரல் 20) இந்த வழக்கு விசாரணைக்கு வருவது திரையுலகத்திலும் ரசிகர்கள் வட்டாரத்திலும் பெரும் பரபரப்பை ஏற்படுத்தியுள்ளது.

கடந்த சில ஆண்டுகளாகவே சங்கீதா பொது நிகழ்ச்சிகளில் காணப்படாதது குறித்து சமூக வலைதளங்களில் பல்வேறு ஊகங்களும் வதந்திகளும் பரவி வந்தன. குழந்தைகளின் கல்விக்காக வெளிநாட்டில் தங்கியிருப்பதாக தெரிவிக்கப்படுகின்ற நிலையில், கடந்த பிப்ரவரி 24ஆம் தேதி அவர் விவாகரத்து கோரி மனு தாக்கல் செய்தது அதிர்ச்சியை ஏற்படுத்தியது.

பிப்ரவரி 26ஆம் தேதி முதன்முதலில் விசாரணைக்கு எடுத்துக்கொள்ளப்பட்ட இந்த மனு, மேலதிக பரிசீலனைக்காக இன்று வரை ஒத்திவைக்கப்பட்டது. தனது மனுவில் சங்கீதா முன்வைத்துள்ள குற்றச்சாட்டுகள் பரபரப்பை கிளப்புகின்றன. குறிப்பாக, நடிகர் விஜய் ஒரு நடிகையுடன் திருமணத்தை மீறிய உறவில் இருந்ததாகவும், அதனால் தாம் ஆழ்ந்த ஏமாற்றத்துக்கும் மன உளைச்சலுக்கும் உள்ளானதாகவும் அவர் குறிப்பிட்டுள்ளார்.

மேலும், 2021ஆம் ஆண்டு முதல் ஒரே வீட்டில் வசித்தாலும், இருவரும் தனித்தனியாகவே வாழ்ந்து வந்ததாகவும் தெரிவிக்கப்படுகின்றது. எந்தவிதமான அழுத்தமும் வந்தால், சம்பந்தப்பட்ட அந்த நடிகையின் விவரங்களை நீதிமன்றத்தில் வெளிப்படுத்த தயார் என சங்கீதா எச்சரிக்கை விடுத்துள்ளதாகவும் தெரிவிக்கப்படுகின்றது.

இந்த வழக்கின் தொடக்க விசாரணைக்காக விஜய் நேரில் ஆஜராக வேண்டும் என நீதிமன்றம் ஏற்கனவே சம்மன் அனுப்பியுள்ளது. இருப்பினும், இரு தரப்பினரின் வழக்கறிஞர்கள் நடத்திய பேச்சுவார்த்தையின் விளைவாக, பரஸ்பர சம்மதத்தின் அடிப்படையில் (Mutual Consent) பிரிவதற்கான சுமூக முடிவு எட்டப்பட்டுள்ளதாகவும் தகவல்கள் தெரிவிக்கப்படுகின்றன.

இந்நிலையில், இன்று நீதிமன்றத்தில் விஜய் நேரில் ஆஜராகிறாரா அல்லது தனது வழக்கறிஞர்கள் மூலம் நிலைப்பாட்டை வெளிப்படுத்துகிறாரா என்பது குறித்து ரசிகர்கள் மத்தியில் எதிர்பார்ப்பு உச்சத்தை எட்டியுள்ளது.