தமிழ் திரையுலகில் புதுமுகமாக அறிமுகமானாலும், குறுகிய காலத்திலேயே ரசிகர்களின் மனதில் தனக்கென ஒரு இடத்தை பிடித்தவர் நடிகை பிரீத்தி முகுந்தன். அழகு, திறமை, மற்றும் தன்னம்பிக்கை மிக்க நடிப்பால் தற்போது கவனம் குவித்து வரும் இளம் நடிகைகளில் முக்கியமானவராக உருவெடுத்துள்ளார்.‘ஸ்டார்’ திரைப்படத்தின் மூலம் தமிழ் ரசிகர்களின் கவனத்தை ஈர்த்த பிரீத்தி முகுந்தன், தனது முதல் படத்திலேயே நல்ல வரவேற்பைப் பெற்றார்.

அதனைத் தொடர்ந்து, வித்தியாசமான கதைக்களங்களையும் சவாலான கதாபாத்திரங்களையும் தேர்வு செய்து தனது திரைப்பயணத்தை வெற்றிகரமாக முன்னெடுத்து வருகிறார்.‘நாக்ஜில்லா’, ‘கண்ணப்பா’ உள்ளிட்ட திரைப்படங்களில் நடித்து வரும் அவர், தென்னிந்திய திரையுலகில் வேகமாக உயர்ந்து வரும் நட்சத்திரமாக பார்க்கப்படுகிறார்.அவரது நடிப்பில் கடந்த மாதம் வெளியான ‘பிளாஸ்ட்’ திரைப்படம் ரசிகர்களிடையே நல்ல வரவேற்பைப் பெற்று வருகிறது.

அறிமுக இயக்குநர் சுபாஷ் கே. ராஜ் இயக்கியுள்ள இந்த திரைப்படத்தில் அர்ஜுன், அபிராமி உள்ளிட்டோர் முக்கிய கதாபாத்திரங்களில் நடித்துள்ளனர்.அதிரடி கதைக்களத்தில் உருவான இந்த திரைப்படத்தில், பிரீத்தி முகுந்தன் நடித்த சண்டைக் காட்சிகள் ரசிகர்களிடையே பெரும் வரவேற்பை பெற்றுள்ளன.

குறிப்பாக, அவரது துணிச்சலான நடிப்பும், திரையில் வெளிப்பட்ட தன்னம்பிக்கையும் பலரது பாராட்டைப் பெற்றுள்ளது.இந்நிலையில், சமீபத்தில் அளித்த பேட்டியில் ‘பிளாஸ்ட்’ திரைப்படத்தில் நடித்த அனுபவம் குறித்து பிரீத்தி முகுந்தன் மனம் திறந்து பேசியுள்ளார்.அப்போது அவர் கூறுகையில், “‘பிளாஸ்ட்’ திரைப்படத்தை தேர்ந்தெடுத்தது எனது திரைப்பயணத்தில் மிகவும் துணிச்சலான முடிவாக இருந்தது. எனது இடத்தில் வேறு யாரேனும் இருந்திருந்தால் இத்தகைய கதாபாத்திரத்தில் நடிக்க தயக்கம் காட்டியிருக்கலாம்.

ஆனால் எனக்கு எப்போதுமே அதிரடி கதாபாத்திரங்களில் நடிக்க வேண்டும் என்ற விருப்பம் இருந்தது.திரைப்படம் வெளியான பிறகு ரசிகர்களிடமிருந்து கிடைத்த பாராட்டுகளும் அன்பும் எனக்கு மிகுந்த மகிழ்ச்சியையும் புதிய நம்பிக்கையையும் அளித்தது” என்று தெரிவித்துள்ளார்.

மேலும், ‘பிளாஸ்ட்’ திரைப்படத்திற்கு முன்பே ‘இதயம் முரளி’ திரைப்படத்தில் நடிக்க ஒப்பந்தமானதாகவும் அவர் தெரிவித்துள்ளார்.அந்த திரைப்படத்தில் தனது கதாபாத்திரம் மிகவும் மென்மையான, இனிமையான தோற்றத்தில் அமைந்திருப்பதாகவும், ‘பிளாஸ்ட்’ திரைப்படத்தில் நடித்த கதாபாத்திரத்திலிருந்து முற்றிலும் மாறுபட்ட பரிமாணத்தில் ரசிகர்களை சந்திக்க உள்ளதாகவும் பிரீத்தி முகுந்தன் பகிர்ந்துள்ளார்.

தொடர்ச்சியாக வித்தியாசமான கதாபாத்திரங்களை தேர்வு செய்து வரும் பிரீத்தி முகுந்தன், தமிழ் திரையுலகின் நம்பிக்கைக்குரிய இளம் நட்சத்திரங்களில் ஒருவராக வேகமாக முன்னேறி வருகிறார்.