தமிழ், தெலுங்கு, மலையாளம் என தனித்துவமான நடிப்பால் ரசிகர்களின் மனதை கவர்ந்த சாய் பல்லவி, தற்போது ஹிந்தி திரையுலகிலும் பெரிய அறிமுகத்தை பெற இருக்கிறார். பிரமாண்டமான பட்ஜெட்டில் உருவாகும் ‘ராமாயணம்’ படத்தில் சீதை கதாபாத்திரத்தில் நடிப்பது அதிகாரப்பூர்வ தகவலாகிவிட்டது. இதனால் பல்லவியின் நடிப்பு பயணம் தேசிய அளவில் உயர்கிறது என்று ரசிகர்கள் பெருமிதம் கொள்கிறார்கள்.

மலையாளத்தில் பிரேமம் மூலம் அறிமுகமான சாய் பல்லவி, தனது முதல்படத்திலேயே பிரமாதமான நடிப்பால் பாராட்டுகளை குவித்தார். அதன்பிறகு தமிழில் மாரி 2, என்ஜிகே, கார்கி போன்ற படங்களில் நடித்தாலும், வர்த்தக ரீதியான மிகப்பெரிய வெற்றி கிடைக்கவில்லை. கார்கி விமர்சகர்களின் பாராட்டைப் பெற்றாலும், பாக்ஸ் ஆபிஸில் எதிர்பார்த்த வெற்றியை பெறவில்லை.

அப்படிப்பட்ட சூழலில், சிவகார்த்திகேயன் நடித்த அமரன் படத்தில் இவர் நடித்த இந்து கதாபாத்திரம் மிகப்பெரிய கவனத்தை ஈர்த்தது. அந்த படத்தின் உணர்ச்சி காட்சிகளுக்கு உயிர் கொடுத்து, படத்தின் வெற்றிக்கு முக்கிய காரணமாக இருந்தார் சாய் பல்லவி. இதன் மூலம், தமிழ் ரசிகர்கள் மத்தியில் மீண்டும் வலுவான நிலைப்பாட்டை பெற்றார்.

இதற்கிடையில், தற்போது பாலிவுட்டில் சீதை கதாபாத்திரத்தின் மூலம் தேசிய அங்கீகாரம் பெறுகிறார். இதுவே அவரின் மார்க்கெட்டை பல மடங்கு உயர்த்தியுள்ளது.

இந்நிலையில், சாய் பல்லவி குறித்து மிகப்பெரிய தகவல் ஒன்று வெளியாகி ரசிகர்கள் உற்சாகத்தில் உள்ளனர்.மணிரத்னம் இயக்கத்தில் சாய் பல்லவி நடிக்கிறார்அவருக்கு ஜோடியாக விஜய் சேதுபதி நடிக்கிறார் — என தகவல்கள் வெளியாகியுள்ளன.சினிமா வட்டாரங்கள் கூறுவதாவது, இந்த இணைப்புக்கான அதிகாரப்பூர்வ அறிவிப்பு விரைவில் வெளியாகும் என்பது.

குறிப்பாக, சில மாதங்களுக்கு முன்பு ஒரு நிகழ்ச்சியில் பேசியிருந்த மணிரத்னம்,“நான் சாய் பல்லவியின் பெரிய ரசிகன்; அவருடன் வேலை செய்வதற்காக காத்திருக்கிறேன்”என்று கூறியிருந்தார். அந்த விருப்பம் இப்போது நனவாகும் நிலையில் இருப்பதாகக் கூறப்படுவதால், இது ரசிகர்களுக்கு கூடுதல் உற்சாகத்தை ஏற்படுத்தியுள்ளது.

சாய் பல்லவி – விஜய் சேதுபதி – மணிரத்னம் கூட்டணி உருவாகப் போவது, 2025–26 காலக்கட்டத்தில் தென்னிந்திய சினிமாவின் மிகப் பெரிய செய்தியாக இருக்கும் என்று ஆர்வலர்கள் கூறுகின்றனர்.