ரஜினிகாந்த் - நெல்சன் திலீப்குமார் கூட்டணியில் உருவாகி வரும் ‘ஜெயிலர் 2’ திரைப்படத்தின் முதல் பாடலான ‘அலா போலேலோ’ நாளை வெளியாக உள்ளது. இதையொட்டி, பாடலின் முன்னோட்ட காணொலியை படக்குழு வெளியிட்டு ரசிகர்களின் எதிர்பார்ப்பை மேலும் அதிகரித்துள்ளது.

நெல்சன் திலீப்குமார் இயக்கத்தில் ரஜினிகாந்த் நடிப்பில் கடந்த 2023-ம் ஆண்டு வெளியான ‘ஜெயிலர்’ திரைப்படம் ரசிகர்களிடம் பெரும் வரவேற்பை பெற்றது. சன் பிக்சர்ஸ் நிறுவனம் தயாரித்த இந்தப் படத்தில் ரம்யா கிருஷ்ணன், மிர்ணா, விநாயகன், வசந்த் ரவி உள்ளிட்ட பலர் நடித்திருந்தனர்.

அனிருத் இசையமைத்திருந்தார். உலகளவில் ரூ.600 கோடிக்கும் அதிகமாக வசூல் செய்ததாகத் தெரிவிக்கப்படுகிறது.முதல் பாகத்தின் வெற்றியைத் தொடர்ந்து, அதன் தொடர்ச்சியாக ‘ஜெயிலர் 2’ திரைப்படம் தற்போது உருவாகி வருகிறது. ரஜினிகாந்த் - நெல்சன் திலீப்குமார் கூட்டணி மீண்டும் கைகோர்த்துள்ளதால், படத்தின் மீதான எதிர்பார்ப்பு ரசிகர்கள் மத்தியில் நாளுக்கு நாள் அதிகரித்து வருகிறது.

முதல் பாகத்தில் இடம்பெற்றிருந்த மோகன்லால் மற்றும் சிவராஜ்குமார் ஆகியோரும் இரண்டாம் பாகத்தில் முக்கியமான சிறப்பு கதாபாத்திரங்களில் நடித்துள்ளதாகத் தெரிவிக்கப்படுகிறது.

இதனுடன் ரம்யா கிருஷ்ணன், பாலிவுட் நடிகர் மிதுன் சக்கரவர்த்தி, சந்தானம், சுராஜ் வெஞ்சரமூடு, யோகி பாபு உள்ளிட்ட பலரும் படத்தில் நடித்துள்ளனர்.‘ஜெயிலர் 2’ திரைப்படத்தின் படப்பிடிப்பு தமிழகம் மட்டுமின்றி கேரளா, கர்நாடகா, கோவா உள்ளிட்ட பல்வேறு பகுதிகளிலும் நடைபெற்றுள்ளது.

தற்போது படத்தின் இறுதிக்கட்ட பணிகள் விறுவிறுப்பாக நடைபெற்று வருவதாகத் தெரிவிக்கப்படுகிறது.இந்த திரைப்படம் அக்டோபர் 15-ம் தேதி திரையரங்குகளில் வெளியாகும் என அறிவிக்கப்பட்டுள்ளது. இதனால் ரஜினி ரசிகர்கள் படத்தின் அடுத்தடுத்த அறிவிப்புகளை ஆவலுடன் எதிர்பார்த்து வருகின்றனர்.

இந்த நிலையில், ‘ஜெயிலர் 2’ படத்தின் முதல் பாடலான ‘அலா போலேலோ’ நாளை வெளியாக உள்ளது. அனிருத் இசையமைத்து பாடியுள்ள இந்த பாடலின் முன்னோட்ட காணொலி தற்போது வெளியாகியுள்ளது.

இந்த முன்னோட்ட காணொலியில் நடிகை பூர்ணா சிறப்புத் தோற்றத்தில் நடனமாடியுள்ள காட்சிகள் இடம்பெற்றுள்ளன. பாடல் வெளியீட்டுக்கு முன்பே முன்னோட்ட காணொலி ரசிகர்களின் கவனத்தை ஈர்த்துள்ளதால், நாளை வெளியாகும் முழுப் பாடலுக்கு எதிர்பார்ப்பு மேலும் அதிகரித்துள்ளது.