சினிமாவும் ஆன்மிகமும் ஒன்றிணைந்த வித்தியாசமான நிகழ்வாக, ‘கிருஷ்ணாவதாரம்’ திரைப்படத்தின் ட்ரெய்லர் புனிதமான கிருஷ்ண ஜன்மபூமியில் வெளியிடப்பட்டது. இந்த நிகழ்வில் ஆயிரக்கணக்கான பக்தர்கள் கலந்து கொண்டு, பக்தி உணர்வில் மூழ்கியதாக கூறப்படுகிறது.

சாதாரண ட்ரெய்லர் வெளியீட்டைத் தாண்டி, இந்த நிகழ்வு ஆன்மிகச் சங்கமமாக மாறியது. பக்தி முழக்கங்கள் ஒலிக்க, கிருஷ்ணரின் பிறப்பிடத்தை நோக்கி திரண்ட மக்கள், விழாவை ஒரு பெரிய ஆன்மிக அனுபவமாக மாற்றினர். ராமன் ரேதி கோவில், ராதா ராணி கோவில், பிரேம் மந்திர் மற்றும் இஸ்கான் விரிந்தாவன் உள்ளிட்ட பல புனித தலங்களிலும் ட்ரெய்லர் வெளியிடப்பட்டு, இந்த நிகழ்வு பல இடங்களை இணைக்கும் பக்தி இயக்கமாக உருவெடுத்தது.

மூன்று பகுதிகளாக உருவாகும் இந்த திரைப்படத் தொடரின் முதல் பாகமாக ‘கிருஷ்ணாவதாரம்’ அமைந்துள்ளது. இந்த படம் வரும் மே 7ஆம் தேதி உலகம் முழுவதும் திரையரங்குகளில் வெளியாக உள்ளது.

இத்திரைப்படத்தை ஹார்திக் கஜ்ஜர் இயக்கியுள்ளார். கிரியேட்டிவ்லாண்ட் ஸ்டூடியோஸ் என்டர்டெயின்மென்ட் சார்பில் சஜன் ராஜ் குருப் மற்றும் ஷோபா சாந்த் தயாரித்துள்ள இந்த படத்தில், பூனம் ஷ்ரோஃப் மற்றும் பார்த் கஜ்ஜர் இணை தயாரிப்பாளர்களாக உள்ளனர்.

பிரகாஷ் கபாடியா மற்றும் ராம் மோரி கதையை எழுதியுள்ள நிலையில், அயனங்கா போஸ் ஒளிப்பதிவு செய்துள்ளார். பிரசாத் எஸ் இசையமைத்துள்ள இப்படத்தில், தயாரிப்பு வடிவமைப்பை சோகாஸ் பார்த்வாஜ் மேற்கொண்டுள்ளார். பாடல் வரிகளை இர்ஷாத் கமில் எழுதியுள்ளார்.

ஏஏ ஃபிலிம்ஸ் நிறுவனம் உலகளவில் இப்படத்தை விநியோகிக்கிறது. இசை உரிமையை சாரேகாமா பெற்றுள்ளது.

பெரும் தொழில்நுட்ப வசதிகளுடன் உருவாகும் இந்த படம், வெறும் பிரம்மாண்ட காட்சிகளை மட்டுமல்லாமல், பக்தியின் ஆழமான உணர்வையும், தெய்வீக காதலின் சாரத்தையும் உலகம் முழுவதும் உள்ள பார்வையாளர்களுக்கு கொண்டு செல்லும் நோக்கில் தயாரிக்கப்பட்டுள்ளதாக படக்குழு தெரிவித்துள்ளது.