எந்தவித முன்னறிவிப்பும் இன்றி மஹிந்திரா நிறுவனம் தனது புதிய XUV 3XO EV மாடலை இந்திய சந்தையில் அதிகாரப்பூர்வமாக அறிமுகம் செய்துள்ளது. ஏற்கனவே XUV 300 மாடலின் ஃபேஸ்லிப்ட் வடிவமாக வெளியான XUV 3XO-வின் எலெக்ட்ரிக் அவதாரம்தான் இந்த புதிய கார். இதுவரை XUV 300-ன் எலெக்ட்ரிக் பதிப்பாக விற்பனையில் இருந்த XUV 400-க்கு மாற்றாகவே, இந்த XUV 3XO EV மாடலை மஹிந்திரா களமிறக்கியுள்ளது.

புதிய XUV 3XO EV-யில் XUV 3XO-வின் வடிவமைப்பும், XUV 400-ன் பேட்டரி மற்றும் பவர்ட்ரெயின் அமைப்பும் இணைக்கப்பட்டுள்ளன. மஹிந்திராவின் மற்ற எலெக்ட்ரிக் கார்களைப் போலவே இதில் பெரிய பேட்டரி பேக் வழங்கப்படவில்லை. XUV 400-ல் பயன்படுத்தப்பட்ட அதே 39.4 kWh பேட்டரி பேக் இதில் இடம் பெற்றுள்ளது. இதனுடன் 150 hp பவர் மற்றும் 310 Nm டார்க் வழங்கும் எலெக்ட்ரிக் மோட்டார் இணைக்கப்பட்டுள்ளது.

இந்த பவர்ட்ரெயின் அமைப்பு மூலம், இந்த கார் உண்மையான பயன்பாட்டில் சுமார் 285 கிமீ வரை ரேஞ்ச் வழங்கும் என மஹிந்திரா தெரிவித்துள்ளது. 50 kW DC ஃபாஸ்ட் சார்ஜரை பயன்படுத்தி, பேட்டரியை 0 முதல் 80% வரை வெறும் 50 நிமிடங்களில் சார்ஜ் செய்ய முடியும் என்பதும் குறிப்பிடத்தக்கது.

வடிவமைப்பைப் பொறுத்தவரை, XUV 3XO பெட்ரோல்/டீசல் மாடலைப் போலவே XUV 3XO EV காணப்படுகிறது. வெளிப்புற டிசைனில் பெரிய மாற்றங்கள் இல்லை. வசதிகளிலும் எந்த குறையும் வைக்கப்படவில்லை. XUV 3XO-வில் உள்ள அனைத்து அம்சங்களும் இந்த எலெக்ட்ரிக் மாடலிலும் வழங்கப்படுகின்றன.

இதில் இரண்டு 10.25-இன்ச் டிஸ்பிளேக்கள், வயர்லெஸ் ஆப்பிள் கார்ப்ளே, ஆண்ட்ராய்டு ஆட்டோ, LED லைட்கள், டூயல் ஸோன் கிளைமேட் கண்ட்ரோல், ஆட்டோ ஹோல்டுடன் கூடிய எலெக்ட்ரானிக் பார்க்கிங் பிரேக், வயர்லெஸ் சார்ஜர், 6 ஏர்பேக்குகள், ESP, க்ரூஸ் கண்ட்ரோல், பனோரமிக் சன்ரூஃப், லெதர் சீட்கள், 7 ஸ்பீக்கர்கள் கொண்ட ஹார்மன் கார்டன் ஆடியோ சிஸ்டம், 17-இன்ச் அலாய் வீல்கள் மற்றும் ADAS போன்ற மேம்பட்ட பாதுகாப்பு வசதிகள் இடம்பெற்றுள்ளன.

XUV 400-க்கு மாற்றாக வந்திருந்தாலும், புதிய XUV 3XO EV அளவில் சற்று சிறியதாகவே உள்ளது. XUV 400 4.2 மீட்டர் நீளமாக இருந்த நிலையில், XUV 3XO EV சப்-4 மீட்டர் காராக உள்ளது. இதனால் பூட் ஸ்பேஸ் XUV 400-ன் 378 லிட்டரை விட குறைவாக இருக்கும் என எதிர்பார்க்கப்படுகிறது.

மஹிந்திரா இந்த XUV 3XO EV-யை AX5 மற்றும் AX7L என இரண்டு வேரியன்ட்களில் மட்டும் அறிமுகம் செய்துள்ளது.
AX5 வேரியன்டின் எக்ஸ்-ஷோரூம் விலை ரூ.13.89 லட்சம்,
AX7L வேரியன்டின் எக்ஸ்-ஷோரூம் விலை ரூ.14.96 லட்சம் என நிர்ணயிக்கப்பட்டுள்ளது.

மேலும், 7.2 kW ஹோம் சார்ஜரை ரூ.50,000 கூடுதல் தொகை செலுத்தி வாங்கிக் கொள்ளும் வசதியும் வழங்கப்பட்டுள்ளது. புதிய XUV 3XO EV-யின் டெலிவரிகளை பிப்ரவரி 23-ம் தேதி முதல் தொடங்க மஹிந்திரா திட்டமிட்டுள்ளது.

இந்திய சந்தையில் டாடா நெக்ஸான் EV-க்கு நேரடி போட்டியாக மஹிந்திராவின் புதிய XUV 3XO EV களமிறங்கியுள்ளது. விலை, வசதிகள் மற்றும் பிராண்டு நம்பகத்தன்மை ஆகியவற்றால் இந்த மாடல் எவ்வளவு வரவேற்பைப் பெறும் என்பது விரைவில் தெரியவரும்.