பி.எம்.டபிள்யூ இந்தியா நிறுவனம் தனது புதிய 'i5 LWB' (Long Wheelbase) எலெக்ட்ரிக் செடான் மாடலை இந்தியச் சந்தையில் அதிகாரப்பூர்வமாக அறிமுகப்படுத்தியுள்ளது. இதன் ஆரம்ப விலை ரூ. 79.60 லட்சம் (எக்ஸ்-ஷோரூம்) என நிர்ணயிக்கப்பட்டுள்ளது. இது வழக்கமான ஐசிஇ (ICE) 5 சீரிஸ் மாடலின் விலையை விட ரூ. 3 லட்சம் மட்டுமே அதிகம் என்பது குறிப்பிடத்தக்கது. புதிய சொகுசு எலெக்ட்ரிக் காரின் விநியோகம் உடனடியாகத் தொடங்குகிறது.

5.18 மீட்டர் நீளம், 2.15 மீட்டர் அகலம், 1.52 மீட்டர் உயரம் மற்றும் 3.1 மீட்டர் வீல்பேஸ் கொண்ட இக்காரில் ஃபுல் எல்.இ.டி லைட்டிங், பி.எம்.டபிள்யூ எம்-ஸ்போர்ட் டூயல்-டோன் அலாய் வீல்கள், ஒளிரும் பிரம்மாண்டமான கிரில், இழுக்கும் வகை கதவு கைப்பிடிகள், 20-இன்ச் டயர்கள் மற்றும் மெல்லிய டெயில் லைட்கள் என வெளிப்புறத் தோற்றம் மிகவும் கம்பீரமாக வடிவமைக்கப்பட்டுள்ளது.

காரின் உட்புறத்தில் க்ரிஸ்டலைஸ்டு டிரைவ் செலக்டர், 12.3-இன்ச் டிஜிட்டல் இன்ஸ்ட்ரூமென்ட் கிளஸ்டர், 14.9-இன்ச் சென்டர் டச்ப்ஸ்கிரீன், வீகன் லெதர் அப்ஹோல்ஸ்டரி, பனோரமிக் கிளாஸ் ரூஃப், வென்டிலேட்டட் முன் இருக்கைகள், 4-ஜோன் ஆட்டோமேடிக் கிளைமேட் கண்ட்ரோல், போவர்ஸ் & வில்கின்ஸ் ஆடியோ சிஸ்டம், பி.எம்.டபிள்யூ ஓ.எஸ். 8.5 மற்றும் டிஜிட்டல் கீ பிளஸ் ஆகிய அதிநவீன வசதிகள் இடம்பெற்றுள்ளன.

செயல்திறனைப் பொறுத்தவரை, 264 ஹெச்பி பவர் மற்றும் 410 என்.எம் டார்க்கை வெளிப்படுத்தும் RWD மோட்டார் மற்றும் 81.6kWh பேட்டரி பேக் வழங்கப்பட்டுள்ளது. இது முழு சார்ஜில் 669 கிலோமீட்டர் வரை பயணிக்கும் ஆற்றல் கொண்டது. இக்கார் 0-100 கி.மீ வேகத்தை வெறும் 6.7 நொடிகளில் எட்டுகிறது. மேலும் 160kW DC ஃபாஸ்ட் சார்ஜிங் ஆதரவுடன் 33 நிமிடங்களில் பேட்டரியை 10 முதல் 80 சதவீதம் வரை சார்ஜ் செய்ய முடியும்.

பாதுகாப்பிற்கு 8 ஏர்பேக்குகள், 360-டிகிரி கேமரா மற்றும் பக்கவாட்டு மோதல் பாதுகாப்பு வசதிகள் உள்ளன. கார்பன் பிளாக் மெட்டாலிக் நிறத்துடன் பிரத்யேக அலங்காரங்கள் கொண்ட இதன் 'ஃபர்ஸ்ட் எடிஷன்' மாடல் 99 யூனிட்களாக மட்டுமே தயாரிக்கப்பட்டு, அவை அனைத்தும் ஏற்கனவே விற்றுத் தீர்ந்துவிட்டன என்பது குறிப்பிடத்தக்கது.