ரஷியா-உக்ரைன் இடையிலான போர் நீண்டகாலமாகத் தொடர்ந்து வரும் நிலையில், இரு நாடுகளுக்கும் இடையே அமைதியை ஏற்படுத்துவதற்கான பேச்சுவார்த்தைகளில் குறிப்பிடத்தக்க முன்னேற்றம் ஏற்பட்டுள்ளதாக அமெரிக்க அதிபர் டொனால்டு டிரம்ப் தெரிவித்துள்ளார். போரை முடிவுக்குக் கொண்டுவரும் முயற்சிகள் நடைபெற்று வருவதால், பேச்சுவார்த்தை பாதிக்கப்படும் வகையிலான நடவடிக்கைகளைத் தவிர்க்க விரும்புவதாகவும் அவர் குறிப்பிட்டுள்ளார்.

ரஷியா–உக்ரைன் மோதலில் ஆயிரக்கணக்கானோர் உயிரிழந்துள்ள நிலையில், போரை நிறுத்துவதற்குப் பல்வேறு நாடுகள் தொடர்ந்து முயற்சி மேற்கொண்டு வருகின்றன. இருப்பினும், இரு நாடுகளுக்கும் இடையிலான மோதல் இன்னும் முடிவுக்கு வரவில்லை.இந்நிலையில், அமைதிப் பேச்சுவார்த்தை தொடர்பாக டிரம்ப் வெளியிட்டுள்ள பதிவில் தெரிவித்திருப்பதாவது,"ரஷியா தொடர்பான எனது நிலைப்பாடு மிகவும் தெளிவானது.

ரஷியா–உக்ரைன் போரை முடிவுக்குக் கொண்டுவந்து அமைதியை ஏற்படுத்துவதற்கான பேச்சுவார்த்தையில் நான் ஈடுபட்டு வருகிறேன். எனவே, ரஷியா பேச்சுவார்த்தை மேசையிலிருந்து வெளியேறும் நிலையை உருவாக்கும் எந்தவொரு நடவடிக்கையையும் நான் விரும்பவில்லை.அமைதிப் பேச்சுவார்த்தையில் குறிப்பிடத்தக்க முன்னேற்றம் ஏற்பட்டுள்ளது.

இதில், தற்போது நடைபெற்று வரும் பிணைக் கைதிகள் பரிமாற்றம் தொடர்பான பேச்சுவார்த்தைகளும் அடங்கும். இத்தகைய சூழலில், குறிப்பிட்ட ஆவணத்தில் இப்போதே கையெழுத்திடுவது ரஷியாவைப் பேச்சுவார்த்தையிலிருந்து விலகச் செய்யக்கூடும். எனவே, அந்த ஆவணத்தில் பின்னர் அல்லது நான் விரும்பும் நேரத்தில் கையெழுத்திட முடியும்.இதற்கிடையே, ஈரான் இஸ்லாமியக் குடியரசுக்கு ரஷியா மிகக் குறைந்த அளவிலேயே உதவி செய்து வருவதாக டிரம்ப் குறிப்பிட்டுள்ளார்.

ரஷியாவால் வழங்கக்கூடிய உதவியுடன் ஒப்பிடும்போது, தற்போது அளிக்கப்படும் உதவி மிகவும் குறைவு என்றும் அவர் தெரிவித்துள்ளார். இந்த நிலை தொடர வேண்டும் என்றும், தேவையற்ற தலையீடுகள் அமைதிப் பேச்சுவார்த்தையைப் பாதிக்கக் கூடாது என்றும் அவர் கூறியுள்ளார்.மேலும், ரஷியாவில் உள்ள டீசல் சுத்திகரிப்பு நிலையங்களைக் குறிவைத்து உக்ரைன் அதிபர் வொலோடிமிர் ஜெலென்ஸ்கி தாக்குதல்களை நடத்தி வருவதாகவும் டிரம்ப் குற்றம்சாட்டியுள்ளார்.

இந்தத் தாக்குதல்கள் உலகளாவிய டீசல் சந்தையிலும், அமெரிக்கச் சந்தையிலும் பாதிப்புகளை ஏற்படுத்துவதாக அவர் தெரிவித்துள்ளார்.இதன் காரணமாக விவசாயிகள், கால்நடை வளர்ப்போர் மற்றும் பல்வேறு தொழில் நிறுவனங்கள் பாதிப்பைச் சந்தித்து வருவதாகவும் அவர் குறிப்பிட்டுள்ளார். அதேவேளையில், ரஷியா உலக நாடுகளுக்குக் குறைந்த விலையில் பெருமளவு டீசலை வழங்கி வருவதாகவும் தெரிவித்துள்ளார்.

போரை முடிவுக்குக் கொண்டுவர வேண்டும் என வலியுறுத்தல்உக்ரைனுக்கு ஐரோப்பிய நாடுகள் பெருமளவில் நிதியுதவி வழங்கி வருவதாகவும், அமெரிக்காவின் முன்னாள் அதிபர் ஜோ பைடன் தலைமையிலான நிர்வாகமும் உதவிகளை வழங்கியதாகவும் டிரம்ப் தனது பதிவில் குறிப்பிட்டுள்ளார். இந்த உதவிகள் கிடைத்தபோதிலும், ஜெலென்ஸ்கி போரை முடிவுக்குக் கொண்டுவருவதில் போதிய ஆர்வம் காட்டவில்லை என்பது டிரம்பின் குற்றச்சாட்டாக உள்ளது.

இரண்டு ஆண்டுகளுக்கு முன்பே, தற்போது முன்வைக்கப்படும் ஒப்பந்தத்தைவிடச் சிறந்த ஒப்பந்தத்தை ஜெலென்ஸ்கியால் எட்டியிருக்க முடியும் என்றும் அவர் தெரிவித்துள்ளார்.தொடர்ந்து நடைபெறும் போரால் உக்ரைனின் பெரும் பகுதிகள் பாதிக்கப்பட்டுள்ளதாகவும், அதன் நிலப்பரப்பு மற்றும் கடல் சார்ந்த பகுதிகளில் இழப்புகள் ஏற்பட்டுள்ளதாகவும் டிரம்ப் குறிப்பிட்டுள்ளார்.

மேலும், உக்ரைனின் ஆண் மக்கள் தொகையிலும் பெரும் பாதிப்பு ஏற்பட்டுள்ளதாகவும், பலர் காயமடைந்தும் உயிரிழந்தும் உள்ளதாகவும் தெரிவித்துள்ளார்.ரஷியா–உக்ரைன் இடையிலான போர் விரைவில் முடிவுக்கு வந்து, அமைதி நிலவ வேண்டும் என்பதே தனது விருப்பம் என்றும் டிரம்ப் தெரிவித்துள்ளார்.இவ்வாறு அவர் தனது பதிவில் குறிப்பிட்டுள்ளார்.