மேற்கத்திய நாடுகளுடனான மோதலுக்கு மத்தியில், ரஷியா தனது சொந்தத் தயாரிப்பான 'மேக்ஸ்' (Max) என்ற சூப்பர் ஆப்பை முன்னிறுத்த, உலகளவில் பிரபலமான வாட்ஸ்அப் மற்றும் டெலிகிராம் செயலிகளுக்குக் கடும் கட்டுப்பாடுகளை விதித்துள்ளது.

'மேக்ஸ்' செயலி அறிமுகம்: சீனாவின் 'வீசாட்' (WeChat) பாணியில் உருவாக்கப்பட்ட இந்த ஆப் மூலம் அரசு சேவைகளைப் பெற முடியும். உள்நாட்டுத் தளங்களை ஊக்குவிக்கவே வாட்ஸ்அப் முடக்கப்படுவதாகத் தெரிகிறது.

டெலிகிராம் மீதான கட்டுப்பாடு: பயங்கரவாதம் தொடர்பான வழக்குகளில் தரவுகளைப் பகிர மறுப்பது மற்றும் ரஷிய சட்டங்களுக்குப் புறம்பான தகவல்களை நீக்காதது போன்ற காரணங்களால், டெலிகிராம் மீது அந்நாட்டின் ரோஸ்கோம் நாட்சோர் (Roskomnadzor) ஆணையம் நடவடிக்கை எடுத்துள்ளது.

மெட்டா (WhatsApp): "இது 10 கோடிக்கும் அதிகமான பயனர்களைத் தனிமைப்படுத்தும் பிற்போக்குச் செயல். மக்களைப் பாதுகாப்பான தகவல் பரிமாற்றத்திலிருந்து பிரித்து, அரசின் கண்காணிப்பு வளையத்திற்குள் கொண்டுவரவே இந்தத் தடை" என வாட்ஸ்அப் செய்தித் தொடர்பாளர் சாடியுள்ளார்.

டெலிகிராம் நிறுவனர் பவெல் துரோவ் இந்த நடவடிக்கையைச் சுதந்திரமான தகவல் பரிமாற்றத்திற்கு எதிரான ஒரு தாக்குதல் என விமர்சித்துள்ளார்.

அரசாங்கத்தின் 'மேக்ஸ்' செயலி ஒரு 'உளவு பார்க்கும் கருவி' (Surveillance Tool) என்றும், மக்களின் அந்தரங்கத்தைப் பறிக்கவே இது கொண்டுவரப்பட்டதாகவும் சர்வதேச அளவில் விமர்சனங்கள் எழுந்துள்ளன.